Left arrow Mur Lura

STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA: Iffirmat MoU dwar l-Ispiżerija tal-Għażla Tiegħek (POYC)

pr220161
Date Icon 04/02/2022

Id-Deputat Prim Ministru u l-Ministru għas-Saħħa Chris Fearne ħabbar l-iffirmar ta’ ftehim ġdid mal-Kamra tan-Negozji Żgħar u Medji u mar-rappreżentanti tal-Kamra tal-Ispiżjara, dwar l-Ispiżerija tal-Għażla Tiegħek.

L-Ispiżerija tal-Għażla Tiegħek jew kif inhi magħrufa, POYC, ilha fis-seħħ 14-il sena, b’numru ta’ klijenti li jagħmlu użu minnha dejjem jiżdied tant li llum ilaħħaq mal-150,000 klijent regolari, b’223 spiżerija fil-komunità msieħba fil-POYC. Dawn l-ispiżeriji bejniethom iqassmu mal-€34 miljun f’mediċini fis-sena. 

“Is-suċċess tal-POYC huwa evidenti u fl-aħħar snin is-suċċess kiber, filwaqt li l-problema tal-mediċini out of stock ġiet solvuta. Dan huwa frott l-impenn tad-Dipartiment tal-POYC innifsu u s-CPSU, iżda wkoll tal-impenn tal-ispiżjara fl-ispiżeriji fil-komunità,” qal id-deputat prim ministru. 

Is-servizz aġġornat tal-POYC se jara lill-ispiżjara jagħmlu review tal-pazjenti li qegħdin fis-sistema ta’ POYC sabiex b’mod uffiċjali jsegwu kif ikun qed jimxi t-trattament. Dan il-ftehim il-ġdid ifisser ukoll li l-ispiżeriji li jkun imisshom jiftħu fil-Ħdud u fil-festi pubbliċi jiftħu wkoll waranofsinhar (mill-16.00 sas-19.00).

Ikomplu jonqsu l-miżuri restrittivi

Waqt l-istess konferenza tal-aħbarijiet, id-deputat prim ministru qal li fid-dawl li 78% tal-adulti residenti Malta u Għawdex tlaqqmu bil-booster, u 40% tat-tfal ta’ bejn il-5 u l-11-il sena ħadu mqar l-ewwel doża tal-vaċċin, se jkomplu jonqsu l-miżuri restrittivi sabiex sal-aħħar tar-rebbiegħa jkunu tneħħew il-maġġoranza kbira tal-miżuri restrittivi.

Spjega li peress li n-numru ta’ każijiet fil-komunità qed jistabbilizza ruħu u l-każijiet fl-Isptar Mater Dei u fl-ITU huma maniġibbli, minn nhar it-Tnejn 7 ta’ Frar, se jkunu estiżi l-ħinijiet ta’ viżitaturi ta’ Mater Dei matul in-nofstanhar ta’ filgħodu. Minn nhar it-Tnejn ukoll, il-miżura restrittiva li f’dar residenzjali m’għandux ikun hemm iżjed minn 4 households se titneħħa. 

Mill-14 ta’ Frar 2022, persuni li jaslu f’pajjiżna b’permess ta’ xogħol approvat “in principle” li jipprovdu residenza fissa u li huma fil-pussess ta’ ċertifikat validu tal-vaċċin, jistgħu japplikaw biex jagħmlu l-kwarantina marbuta mal-ivjaġġar fir-residenza msemmija, minflok fil-quarantine hotel skont l-istandards ippubblikati. Dan filwaqt li mill-istess jum, il-kwarantina marbuta ma’ vjaġġar għal dawk il-persuni li jaslu minn pajjiżi fil-lista l-ħamra skura u li jkunu fil-pussess ta’ ċertifikat tal-vaċċin validu, se tinżel minn 14-il ġurnata għal 10 ijiem. 

Id-deputat prim ministru ħabbar ukoll li minn nhar it-Tnejn, se jibdew ikunu rikonoxxuti ċ-ċertifikati tal-vaċċin maħruġa mill-Jordan u mill-Maldivi.  

Id-Deputat Prim Ministru Fearne sostna li jekk il-previżjonijiet jibqgħu l-istess, mill-21 ta’ Frar 2022, il-kwarantina għall-primary contacts, iġifieri għall-persuni li jkunu f’kuntatt ma’ persuna pożittiva u li ma jgħixux fl-istess residenza mal-każ pożittiv, u li jkunu fil-pussess ta’ ċertifikat tal-vaċċin validu, se tinżel minn sebat ijiem għal ħamest ijiem bi swab test fl-aħħar jum li jirriżulta fin-negattiv. Dan japplika wkoll għat-tfal ta’ bejn il-5 u l-11-sena li għandhom ċertifikat tal-vaċċin, u li bħalissa jistgħu jibbenefikaw mill-kwarantina ridotta ta’ 7 ijiem bi swab test negattiv. Huwa fisser li eventwalment, il-kwarantina tal-kuntatti primarji se tinqata’, madanakollu dan isir fi żmien opportun. 

Dwar it-tiġijiet, Chris Fearne spjega li mill-1 ta’ April 2022, jekk koppja tagħżel li tistieden persuni li huma fil-pussess ta’ ċertifikat tal-vaċċin validu, it-tieġ jista’ jsir għal 300 persuna bilwieqfa jew 500 persuna bilqiegħda. Dan filwaqt li l-avvenimenti bilwieqfa huma stmati li jerġgħu jkunu permessi lejn it-tieni nofs ta’ April 2022. 

STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA: Iffirmat MoU dwar l-Ispiżerija tal-Għażla Tiegħek (POYC)
STQARRIJA MILL-UFFIĊĊJU TAD-DEPUTAT PRIM MINISTRU U L-MINISTERU GĦAS-SAĦĦA: Iffirmat MoU dwar l-Ispiżerija tal-Għażla Tiegħek (POYC)
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

 PRESS RELEASE BY THE MINISTRY FOR YOUTH, WELLBEING AND THE IMPLEMENTATION OF THE ELECTORAL PROGRAMME Student Councils receive recognition

PR261950en

PRESS RELEASE BY THE MINISTRY FOR YOUTH, WELLBEING AND THE IMPLEMENTATION ...

 STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI TAL-PROGRAMM ELETTORALI Jingħata rikonoxximent lill-kunsilli tal-istudenti

PR261950

STQARRIJA MILL-MINISTERU GĦAŻ-ŻGĦAŻAGĦ, IL-BENESSERI U L-IMPLIMENTAZZJONI ...

Aktar Stqarrijiet Right arrow