STQARRIJA MILL-MINISTERU GĦALL-EKONOMIJA U L-INDUSTRIJA Mas-70 ħaddiem tal-Awtorità tal-Artijiet jibbenefikaw minn ftehim kollettiv ġdid
Jidħol fis-seħħ ftehim kollettiv iffirmat bejn l-Awtorità tal-Artijiet u l-General Workers Union li minnu ser jibbenefikaw madwar 70 ħaddiem tal-awtorità, li huma fil-grad ta' managers u professjonisti. Permezz tiegħu numru t'impjegati se jibbenefikaw minn żieda finanzjarja. L-iffirmar kien ippresedut mill-Ministru għall-Ekonomija u l-Industrija Silvio Schembri u l-Kap Eżekuttiv tal-Awtorità tal-Artijiet, is-Sur Robert Noel Vella.
Il-Ministru Schembri spjega kif dawn l-impjegati b'mod immedjat ħa jibbenefikaw minn arretrati datati mill-2019 sal-lum, li jammontaw għal total ta' €335,000.
Huwa żied jgħid li sabiex tiġi żgurata l-istabbiltà, dan il-ftehim kollettiv ikopri sa mill-2019 sal-2024. F'termini konkreti, hu fisser li jekk ikollna nħarsu lejn dan l-investiment fuq bażi ta' sitt snin, l-investiment kumulattiv fis-salarji ta' dawn il-ħaddiema tal-Awtorità tal-Artijiet, bejn dawk fi grad ta' professjonisti u dawk fi grad maniġerjali se tkun qabżet il-€1,300,000.
Il-Ministru saħaq li l-għan tal-ftehim kollettiv mhuwiex biss dak finanzjarju, iżda anke sabiex l-ħaddiema jkollhom gwida ċara dwar il-kundizzjonijiet tax-xogħol, bil-għan li jservi t'aspirazzjoni għall-impjegati. Dan sabiex jimmassimizzaw il-prestazzjoni fuq ix-xogħol, jipprogressaw fil-karriera u jippromwovu r-reklutaġġ estern flimkien mal-preservazzjoni tal-impjegati attwali.
Huwa nnota kif l-iffirmar ta' dan il-ftehim qed iwassal sabiex issa l-ħaddiema kollha tal-Awtorità tal-Artijiet li jammontaw għal madwar 230 persuna huma koperti minn ftehim kollettiv. Fakkar kif fl-2020, l-Awtorità tal-Artijiet kienet daħlet fis-seħħ Ftehim Kollettiv li kien affetwa lill-madwar 140 impjegat tal-Awtorità, flimkien m'impjegati oħra li ġew reklutati wara l-iffirmar tal-ftehim kollettiv, fejn dan ikkumpensa b'mod finanzjarju lil dawk il-gradi kollha meqjusa bħala overtime grades.
“Dan huwa tassew Gvern li jinvesti fil-ħaddiema tiegħu. L-Awtorità qed tagħmel ħilitha sabiex tipprovdi lill-impjegati tagħha b'kumpens xieraq għax-xogħol tagħhom. Flimkien qegħdin nimmiraw li l-ħaddiema ikollhom ħeġġa biex javvanzaw fil-karriera personali tagħhom. Fil-fatt, il-ftehim huwa biss parti minn sensiela t'inizjattivi pożittivi li qegħdin jittieħdu, marbuta ma' titjib fil-kundizzjonijiet tax-xogħol. Id-Dipartiment tar-riżorsi umani qiegħed jippermetti wkoll arranġamenti ta' teleworking, flexible hours u anke poloz tas-saħħa," qal il-Ministru Schembri.
Iżda mhux biss. Qed isir ukoll investiment fil-ħiliet u l-kapaċitajiet tal-ħaddiema. Hawn hu ħabbar li l-Awtorità tinsab f'diskussjonijiet sabiex tara li jiġi żviluppat programm ġdid ta' studju fejn l-impjegati attwali flimkien mar-rekluti l-ġodda jkollhom possibbiltà li javvanzaw fl-istudji tagħhom u jiksbu siploma billi jipparteċipaw fi programmi magħmulin apposta għalihom. Dawn il-programmi jinkludu aspetti legali, tekniċi u ta' ġestjoni tal-art.
Fil-konklużjoni tiegħu l-Ministru Schembri saħaq kif għal dan il-Gvern il-ħaddiema huma meqjusa bħala s-sinsla t'ekonomija b'saħħitha u fil-qalba tad-deċiżjonijiet tiegħu dejjem qed ipoġġi l-ġid tagħhom. Fakkar kif fil-baġit 2022 introduċa bosta miżuri, bħat-tnaqqis fit-taxxa għal part-timers, tnaqqis fit-taxxa fuq l-overtime, taxxa fuq l-overtime ta' 15% fuq l-ewwel €10,000 u €150 fis-sena f'in-work benefit għal 40,000 ħaddiem li jaħdmu ħinijiet mhux tas-soltu.
Il-Kap Eżekuttiv is-Sur Robert Noel Vella qal kif l-Awtorità tqis il-ħaddiema tagħha bħala l-ispina tas-servizz li toffri. B'hekk, b'dan il-ftehim kollettiv qed tirrikonoxxi l-bżulija u tippremja l-isforzi u l-ħidma effiċjenti. Qal li b'dan l-istess ftehim qed tingħata individwalment ukoll l-importanza mistħoqqa lil dawn il-ħaddiema li jagħmlu xogħol tant siewi fejn tidħol l-amministrazzjoni tal-art u l-propjetajiet tal-Gvern. Qal li ser ikompli jagħti prijorita' lit-titjib fl-istrutturi tas-salarji, l-benefiċċji u l-kundizzjonijiet tax-xogħol tal-impjegati kollha.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958