Left arrow Mur Lura

STQARRIJA MILL-MINISTERU GĦALL-AFFARIJIET BARRANIN U EWROPEJ: Negozji Maltin qed ikomplu jżidu l-attività kummerċjali fl-Afrika

pr211947
Date Icon 27/10/2021

Il-Ministru Evarist Bartolo f’laqgħat ma’ Ministri Afrikani fir-Rwanda

“Il-Gvern Malti jqis lill-Afrika bħala art mimlija opportunitajiet fejn in-numru ta’ negozji Maltin li joperaw fl-Afrika qiegħed jiżdied u jeħtieġ li jkompli jkun sostnut”. Qal dan il-Ministru għall-Affarijiet Barranin u Ewropej Evarist Bartolo meta ltaqa’ ma’ bosta Ministri minn pajjiżi Afrikani waqt it-tieni laqgħa Ministerjali bejn l-Unjoni Afrikana u l-Unjoni Ewropea, fir-Rwanda. Il-Ministru Bartolo ltaqa’ wkoll mal-Kummissarju għall-Affarijiet Soċjali tal-Unjoni Afrikana, Amira Elfadil. 

Fid-diskors tiegħu, il-Ministru Bartolo qal li l-Ewropa u l-Afrika m’għandhomx ikunu biss ġirien twajba, iżda għandhom jaħdmu qatigħ biex ikunu sħab indaqs. Il-Ministru Bartolo fisser kif il-passat kolonjali m’għandux ikun perpetwat fil-futur, inkella ma jkunx jista’ jiġi meqjus bħala passat. Semma kif ta’ kull sena, skont l-UNCTAD, mas-76 biljun ewro jinħarġu mill-Afrika b’mod illeċitu, bid-detriment li bosta popli jkunu mċaħħda minn servizzi soċjali u ħtiġijiet bażiċi.

Matul is-sena li għaddiet, 70% tal-esportazzjoni mill-Unjoni Ewropea lejn l-Afrika kienet karatterizzata minn prodotti manifatturati. Filwaqt li fl-istess perjodu, 61% tal-esportazzjoni mill-Afrika lejn l-Unjoni Ewropea kienet tikkonsisti minn ikel u xorb, materja prima u enerġija. Il-Ministru Bartolo qal li biex wieħed jindirizza dawn ix-xejriet jeħtieġ iżjed opportunitajiet ta’ edukazzjoni, taħriġ u impjiegi liż-żgħażagħ tal-Afrika li bosta minnhom jesperjenzaw il-qgħad u l-faqar. Il-Ministru Bartolo qal li dwar il-kwistjoni tal-immigrazzjoni jeħtieġ li ċ-ċaqliq tal-persuni jkun wieħed regolat. Għamel referenza għall-ħtieġa ta’ fruntieri sikuri, fejn it-traffikanti tal-persuni jkunu mwaqqfa f’kull fażi tal-operat tagħhom u kull persuna li tixraqilha l-ażil tingħata l-protezzjoni kif mistħoqq. 

Matul din il-laqgħa bosta Ministri Afrikani u Ewropej wasslu l-messaġġ tagħhom dwar kif l-Afrika u l-Ewropa jistgħu jikkoperaw flimkien fil-ġejjieni, għall-ġid taż-żewġ naħat. It-temi prinċipali li ġew diskussi tul din il-laqgħa kienu l-paċi, is-sigurtà, il-governanza u l-immigrazzjoni, kif ukoll il-ħtieġa ta’ investimenti li jsaħħu s-sostenibbiltà u l-investiment fil-kapital uman f’oqsma bħax-xjenza, it-teknoloġija, l-edukazzjoni u l-iżvilupp tal-ħiliet.

Il-materji li spikkaw tul il-laqgħa kienu l-effetti tal-bidla fil-klima fuq l-ekonomiji Afrikani, il-ħtieġa ta’ qafas u strumenti biex ikun hemm iżjed sostenn għal proċessi favur il-paċi, il-kwestjoni tal-immigrazzjoni u ċ-ċaqliq tal-persuni mill-pajjiż taloriġini, il-qasam diġitali bħala mezz tat-tisħiħ tal-koperazzjoni bejn it-tnejn, kif ukoll it-tisħiħ tar-rabtiet kulturali. 

Il-Ministru Bartolo kien akkumpanjat mis-Segretarju Permanenti s-Sur Christopher Cutajar. Din il-ħidma fi Rwanda hija xhieda ħajja tat-twettiq tal-istrateġija għall-Afrika adottata mill-Ministeru f’Jannar tas-sena li għaddiet. 

STQARRIJA MILL-MINISTERU GĦALL-AFFARIJIET BARRANIN U EWROPEJ: Negozji Maltin qed ikomplu jżidu l-attività kummerċjali fl-Afrika
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow