STQARRIJA MILL-MINISTERU GĦAT-TRASPORT, L-INFRASTRUTTURA U L-PROĠETTI KAPITALI Se jkun qed isir l-istħarriġ magħruf bħala n-National Household Transport Survey
Il-Ministru għat-Trasport, l-Infrastruttura u l-Proġetti Kapitali Ian Borg ħabbar li se jkun qed isir l-istħarriġ magħruf bħala n-National Household Transport Survey, proġett ta' kollaborazzjoni bejn Transport Malta u l-NSO, li jsir bejn wieħed u ieħor kull 10 snin. L-aħħar li kien sar fl-2010. Din is-sena se tkun qed timmarka r-raba' edizzjoni ta' dan is-survey u għall-ewwel darba se jseħħ b'mod online.
In-National Household Transport Survey huwa maħdum sabiex jagħti stampa ċara tal-imġieba fit-toroq u anke jagħtu mudell tal-modi ta' vjaġġar mill-familji f'pajjiżna.
Il-Ministru Ian Borg qal li dan is-survey se jkun mod ieħor effettiv ħafna li permezz tiegħu se jiffaċilità il-pjanijiet għall-futur ta' pajjiżna u li se juri bl-aktar mod ċar l-aħjar modi possibbli ta' kif għandha ssir il-bidla b'mod naturali għall-aktar mobbilità u trasport nadif.
“F'dawn l-aħħar 10 snin saru bosta tibdiliet u speċifikament f'dawn l-aħħar snin rajna ħafna titjib fis-settur tat-trasport fejn anka tajna aktar opportunitajiet u inċentivajna lin-nies sabiex jużaw modi oħra aktar sostenibbli ta' kif wieħed jivjaġġa. Se nkunu qed nagħtu trasport pubbliku b'xejn lil kulħadd. Din hija miżura li intlaqet tajjeb ħafna fil-baġit ta' din is-sena li permezz tagħha se nkunu qegħdin nilħqu kull sfera tas-soċjetà tagħna u b'konformità mal-viżjoni ta' dan il-gvern soċjali naraw li ma jitħalla ħadd barra. Tajna l-akbar pakkett ta' grants sabiex nerfgħu mill-piż minn fuq il-poplu u nkomplu ninċentivaw il-bidla għall-vetturi li jaħdmu bl-elettriku u għalhekk iniġġsu inqas. Nedejna servizzi ta' bike-sharing, tajna servizz tal-fast ferry li tajjeb wieħed jirrimarka li diġà fl-ewwel erba' xhur total ta' 250,000 persuna użaw dan is-servizz tal-baħar. Se nkunu qed nagħtu l-itwal cycle lane ta' pajjiżna b'tul ta' 4.3km bħala parti mill-proġett tas-Central Link li dalwaqt se jkun inawgurat. Ċerti deċiżjonijiet bħall-metro jeħtieġu ammonti kbar ta' data biex jiġu ttestjati, u d-data ta' dan is-survey se tippermettilna nipperfezzjonaw aktar il-proposta attwali", qal il-Ministru Ian Borg.
L-NSO se tkun qed tagħmel is-survey kif ukoll tiġbor id-data meħtieġa. Id-data se tintuża biex tintroduċi politika u miżuri ġodda li għandhom jiġu inklużi fl-aġġornament tat-Transport Master Plan sal-2030 u se jkun kontribut effettiv li jgħin sabiex jintlaħqu l-EU targets fejn jidħol l-ambjent.
Is-survey jikkonsisti f'żewġ partijiet. L-ewwel parti tinkludi mistoqsijiet ġenerali inklużi dawk rigward il-membri tad-dar u l-vetturi li għandhom aċċess għalihom. Din il-parti tal-istħarriġ għandha titlesta qabel Jum l-Ivvjaġġar li hu fis-17 ta' Novembru 2021. It-tieni parti titlob lil kull membru tad-dar ta' 'l fuq minn 14-il sena sabiex jirreġistra l-vjaġġi li jkunu saru f'Jum l-Ivvjaġġar li jkun is-17 ta' Novembru.
Sabiex wieħed jipparteċipafis-survey, dan jista' jżur il-website: https://nhts21.gov.mt
Għall-membri tad-dar li m'għandhomx aċċess għall-internet jew li mhumiex f'pożizzjoni li jimlew is-survey online, dawn jistgħu iċemplu fuq in-numru 8007 4474.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958
pr211921c.pdf