Left arrow Mur Lura

STQARRIJA MILL-MINISTERU GĦALL-AGRIKOLTURA, IS-SAJD, L-IKEL U D-DRITTIJIET TAL-ANNIMALI: Jiltaqa’ l-Kunsill tal-Ministri Ewropej għall-Agrikoltura fil-Lussemburgu

PR211890
Date Icon 15/10/2021

Bejn it-Tnejn 11 u t-Tlieta 12 ta’ Ottubru ltaqa’ l-Kunsill tal-Ministri Ewropej għall-Agrikoltura fil-Lussemburgu. 

Fost it-temi diskussi f’dan il-Kunsill kien hemm il-preparamenti għal-Laqgħa Annwali tal-Kummissjoni Internazzjonali għall-Konservazzjoni tat-Tonn Atlantiku, fejn Malta qablet mal-Kummissjoni Ewropeja li, għas-sena 2022, jinżammu l-kwoti attwali tat-tonn. Minkejja dan, fid-dawl li rapporti riċenti tal-IUCN qed juru li t-Tonn tal-Atlantiku m’għadux ikkunsidrat bħala speċi fil-periklu ta’ estinsjoni, Malta talbet ukoll sabiex issir l-istima xjentifika tal-ħażna tat-tonn tant mistennija, bil-possibilità li dawn il-kwoti jkunu jistgħu jiżdiedu mill-iktar fis possibbli abbażi tax-xjenza.

Barra minn hekk, intlaħaq qbil bejn l-istati membri dwar l-opportunitajiet tas-sajd għas-sena 2022 fil-Baħar Baltiku, filwaqt li saru wkoll diskussjonijiet preparatorji għan-negozjati li ġejjin dwar opportunitajiet tas-sajd għal stokkijiet tal-ħut maqsuma mar-Renju Unit, in-Norveġja u l-istati kostali tal-Baħar tat-Tramuntana għas-sena 2022.

Waqt id-diskussjoni fuq temi agrikoli, l-istati membri taw stampa ċara dwar il-preparamenti tal-Pjan Strateġiku tal-Politika Agrarja Komuni (PAK). Malta spjegat li hija impenjata b’mod attiv fl-abbozzar tal-Pjan Strateġiku tal-PAK u li fil-preżent għaddejja ħidma fuq it-tfassil tal-interventi bil-ħsieb li jitfasslu l-miżuri futuri.

Dan il-Kunsill iddiskuta wkoll r-reviżjoni tal-istandards tal-kummerċjalizzazzjoni ta’ prodotti agrikoli. Malta uriet l-appoġġ tagħha għal din il-proposta u qalet li l-istati membri għandu jkollhom il-flessibbiltà li jiddefinixxu u jfasslu standards xierqa li huma adattati għall-ħtiġijiet tagħhom. Malta esprimiet it-tħassib tagħha li din il-proposta m’għandhiex twassal għal nuqqas ta’ profittabilità għall-bdiewa, żieda fil-prezzijiet għall-konsumaturi, u għal aktar ħela ta’ ikel. Fil-fatt, Malta ssuġġeriet li għandu jkun hemm skemi finanzjarji għall-ipproċessar ta’ prodotti li ma jkunux laħqu l-istandards ta’ kummerċjalizzazzjoni meħtieġa. Malta għamlet enfasi fuq prodotti tal-għasel kummerċjalizzati fl-istati membri tal-Unjoni Ewropea u pproponiet li jsir rekwiżit li fuq it-tikketta ta’ prodotti tal-għasel jitniżżel il-pajjiż minn fejn ikun oriġina l-prodott. Din l-informazzjoni għandha twassal għal inqas possibilità ta’ frodi tal-ikel filwaqt li tagħti s-setgħa lill-konsumaturi li jagħmlu għażliet aktar infurmati meta jixtru l-għasel.

Waqt il-laqgħa tal-Kunsill, Malta appoġġjat dikjarazzjoni mressqa mill-Belġju dwar is-sitwazzjoni tas-settur tal-majjali fl-Unjoni Ewropea. Malta ilha għal żmien twil issemmi t-tħassib tagħha dwar il-prezzijiet għoljin tal-għalf li l-bdiewa tagħna qegħdin jesperjenzaw. Malta spjegat ukoll li stati membri gżejjer jiffaċċjaw żieda addizzjonali fl-ispejjeż relatati mat-trasport, speċjalment dak bil-baħar, għall-importazzjoni ta’ prodotti bażiċi li jintużaw fil-produzzjoni tal-għalf għall-annimali. Għaldaqstant, Malta tenniet li tixtieq tara li l-Kummissjoni Ewropea tagħti sostenn xieraq lill-industrija tal-majjali.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow