ĠNIEN ĠDID F’MARSALFORN
pr1790
01/10/2010
| ‘Il-viżjoni eko-Għawdex tagħti wkoll aktar spazji | rikreattivi għall-familji fil-gżira ta’ Għawdex’. Dan qalitu l-Onor Giovanna Debono, Ministru għal Għawdex, waqt żjara li hija għamlet fis-sit fejn qed isir xogħol strutturali fil-ħolqien ta’ spazju rikreattiv għall-familji f’Marsalforn. |
| Il-proġett ta’ Ġnien it-Tliet Għoljiet | f’Marsalforn huwa l-ewwel minn erba’ proġetti ta’ taħwil ta’ siġar li ġew imfassla bħala parti mill-pjan ta’ azzjoni marbuta mal-viżjoni eko-Għawdex. Il-pjan ta’ afforestazzjoni huwa maħsub li joffri spazji b’aktar siġar li minbarra li jkomplu jsebbħu d-dehra ġenerali tal-gżira ta’ Għawdex ser ikunu qed joffru wkoll aktar postijiet ta’ rikreazzjoni għall-familji. Ix-xogħol fuq dan il-ġnien qed ikun koordinat mill-Ministeru għal Għawdex filwaqt li l-kumpanija Magro Brothers Foods Ltd ser tkun qed tipprovdi s-siġar li ser jitħawlu hekk kif x-xogħol strutturali jkun lest. Dan qed isir biex din il-kumpanija li tipproduċi prodotti ta’ l-ikel f’Għawdex tfakkar s-70 anniversarju minn meta bdiet tipproduċi l-ewwel prodott taħt il-marka Three Hills. |
| Il-Ministru Giovanna Debono setgħet issegwi x-xogħol | li qed isir bħalissa fuq dan is-sit li jinkludi bini ta’ ħitan u passaġġi li ser jiffurmaw il-bażi ta’ dan il-ġnien flimkien ma’ ġibjun għall-ilqugħ ta’ ilma tax-xita għall-użu fl-istess ġnien. Inħarġu s-sejħiet għall-offerti biex jiġu provduti servizzi u materjal relatati ma’ installazzjonijiet ta’ dawl, irrigazzjoni u drenaġġ, filwaqt li qed jiġu preparati sejħiet oħra għal provediment ta’ garden furniture u strutturi tal-logħob adattati għat-tfal. |
| Il-Ministru spjegat kif il-Ministeru għal Għawdex | beda bl-implimentazzjoni tal-pjan ta’ azzjoni relatat mal-viżjoni eko-Għawdex. Flimkien max-xogħol fuq dan il-ġnien, għaddej xogħol preparatorju fuq tlett siti ta’ afforestazzjoni oħra; filwaqt li beda programm ta’ tindif ta’ lqugħ ta’ ilma tax-xita fil-widien prinċipali ta’ Għawdex. Dan sabiex tiġi mtejba l-ħażna ta’ l-ilma tax-xita għall-użu agrikolu, waqt li tonqos il-pressjoni fuq l-watertable. |
| Hekk kif | ingħata bidu għal sena skolastika oħra ser jibda jintuża għall-ewwel darba pakkett ta’ riżorsi għall-għalliema biex it-tema eko-Għawdex tiġi nkluża fit-tagħlim ta’ suġġetti relatati fosthom is-saħħa, il-kultura, l-istorja u x-xjenza naturali. |
| Qed isir | studju biex jiġu ndividwati possibiltajiet li jiġu stallati sistemi ta’ enerġija alternattiva fuq bini publiku filwaqt li sar ħafna xogħol preparatorju bi tħejjija għall-proġett ta’ pixxina indoor u faċilitajiet sportivi oħra qrib il-kumpless sportiv ta’ Għawdex. |
| Proġett | importanti ieħor marbut mal-ġonna huwa dak li għaddej fil-ġnien Villa Rundle li ser ikun ko-finanzjat mill-Fond Ewropew għal Żvilupp Reġjonali. Dan il-proġett ser jirriżulta f’titjib u tisbiħ sostanzjali f’dan il-ġnien publiku storiku fil-qalba tal-Belt Victoria, bil-għan li joffri aktar spazji ta’ rikreazzjoni għal publiku Għawdxi kif ukoll għal eluf ta’ viżitaturi li jżuru lil Għawdex għal btala. |
| ‘Dak | kollu li qed isir flimkien ma’ dak li hemm ippjanat huwa ntiż li jgħinna nilħqu l-miri ta’ żvilupp sostenibbli biex inkunu nistgħu nwettqu fir-realtà l-viżjoni eko-Għawdex’, temmet tghid il-Ministru Debono. |
Stqarrijiet Oħra:
PR261993
STQARRIJA MILL-MINISTERU GĦALL-INKLUŻJONI U L-VOLONTARJAT “Meta nappoġġjaw...
PR261992