ID-DEPUTAT SPEAKER ĊENSU GALEA JIEĦU SEHEM FIL-KONFERENZA DINJIJA GĦAL PRESIDENTI TAL-PARLAMENT FL-ISVIZZERA
pr1319
16/07/2010
| Nhar il-Ħadd li ġej, | l-Onor. Ċensu Galea se jħalli Malta sabiex jattendi għat-Tielet Konferenza Dinjija għall-Presidenti tal-Parlament, li tiltaqa’ kull ħames snin mill-Unjoni Inter-Parlamentari. Il-Konferenza ta’ din is-sena se tinżamm f’Ġinevra, l-Isvizzera, bejn it-Tnejn 19 u l-Erbgħa 21 ta’ Lulju. |
| Bħala tema ewlenija | ta’ din il-Konferenza, se jiġi diskuss kif il-parlamenti jistgħu jsaħħu l-kontabilita’ tagħhom fit-twettiq ta’ ħidmiethom. Fl-istess waqt li tkun għaddejja s-sessjoni plenarja tal-Konferenza, għandhom jiġu ttrattati żewġ temi oħrajn: dik dwar il-ħidma kollettiva sabiex jintlaħqu l-Għanijiet tal-Millenju għall-Iżvilupp, u dwar kif tista’ toktor u tissaħħaħ il-fiduċja bejn il-parlament u l-poplu. |
| Għall-Konferenza ġew | mistiedna jattendu l-Presidenti ta’ 150 parlament minn madwar id-dinja li bħal Malta huma membri tal-Unjoni Inter-Parlamentari, kif ukoll Presidenti ta’ parlamenti oħrajn, Kapijiet ta’ Programmi u Aġenziji tan-Nazzjonijiet Uniti u tal-Organizzazzjoni Dinjija tal-Kummerċ, flimkien mar-Rappreżentanti Permanenti akkreditati għan-Nazzjonijiet Uniti stazzjonati f’Ġinevra. |
| Sa minn qabel | tnehdiet l-ewwel Konferenza ta’ din ix-xorta għaxar snin ilu, kienet tinħass il-ħtieġa li jinħoloq forum fejn il-Presidenti tad-diversi Parlamenti madwar id-dinja, filwaqt li jiltaqgħu bejniethom taħt saqaf wieħed, ikollhom l-opportunita’ jaqsmu ma’ xulxin l-esperjenzi rispettivi tagħhom fl-iżviluppi leġislattivi li jkunu qed iseħħu f’pajjiżhom. Għan ieħor kien sabiex jippromwovu linji ta’ gwida dwar kif il-parlamenti jħaddmu prattiċi dejjem aktar demokratiċi fl-iżvolġiment tax-xogħol li jwettqu għall-ġid komuni. Kif stqarr il-President tal-Unjoni Inter-Parlamentari, Theo-Ben Gurirab, “il-Konferenza tal-iSpeakers saret fattur importanti li qed jgħin lill-parlamenti madwar id-dinja jkollhom rwol aktar proattiv fid-dinja moderna, u b’hekk il-pajjiżi jitqarrbu dejjem iżjed lejn xulxin permezz ta’ relazzjonijiet internazzjonali msaħħa bejniethom.” |
| Id-Deputat Speaker | Ċensu Galea se jkun akkumpanjat tul iż-żjara tiegħu fl-Isvizzera mill-Ambaxxatur Gaetan Naudi, Konsulent Diplomatiku fl-Uffiċċju tal-iSpeaker. |
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990