DISKORS MILL-ONOR LAWRENCE GONZI, PRIM MINISTRU FL-OKKAŻJONI TAĊ-ĊERIMONJA TAL-GĦOTI TAL-ĦATRA TAL-MEMBRI TAL-KUMITATI AMMINISTRATTIVI, FIS-SALA TAL-AMBAXXATURI, FIL-BERĠA TA’ KASTILJA, IL-BELT VALLETTA – L-ERBGĦA, 14 TA’ LULJU 2010
pr1311
14/07/2010
| Il-politiku Franċiż Jacques Delors, li serva bħala | President tal-Kummissjoni Ewropea għal żewġ leġislaturi, darba qal li lest jagħti għotja ta’ flus lil min joħroġ bi spjegazzjoni miktuba f’anqas minn paġna ta’ xi tfisser il-kelma sussidjarjetà. |
| F’Malta, | dan il-kunċett qed inwettquh l-aktar fil-Kunsilli Lokali. Il-kunċett huwa wieħed vast iżda fil-konkret ifisser li d-deċiżjonijiet tħallihom jittieħdu minn dawk li lilhom ikunu se jaffettwaw l-iżjed. Is-sussidjarjetà tfisser iżjed poter liċ-ċittadin. Tfisser li liċ-ċittadin tagħtih ir-rwol li jkun iżjed responsabbli tal-ambjent ta’ madwaru u li bid-deċiżjonijiet tiegħu jiddeċiedi għalih u għal dawk ta’ madwaru. |
| Dan | il-prinċipju li daħħalnih fl-1993 meta twaqqfu l-Kunsilli Lokali kompla jiġi żviluppat. Il-Gvern dakinhar iddeċieda li jgħaddi parti mill-poter tiegħu lil gruppi eletti ta’ ċittadini f’kull lokalità f’Malta u Għawdex. Konxju mill-fatt li b’din is-sistema l-ġdida l-lokalitajiet tagħna kienu se jimxu ’l quddiem ... iżjed residenti kienu se jiddedikaw ħinhom għall-ġid tan-nies ta’ madwarhom u li b’ħidma kontinwa minn dawn il-Kunsilli Lokali, il-pajjiż kien se jagħmel pass ieħor ’il quddiem. |
| Illum, | sbatax-il sena wara, inħarsu lura u naraw li kien esperiment li rnexxa. Il-Kunsilli Lokali kibru, ħadu iżjed setgħat, wettqu ħafna u llum għandna 68 Gvern Lokali bi programm ta’ ħidma mill-iżjed vast, li ma jkoprix biss l-iżjed affarijiet essenzjali iżda li jħares fit-tul u b’perspettiva mill-iżjed wiesgħa. |
| Għandna | Kunsilli Lokali li qed jaħdmu biex jixprunaw attività ekonomika fil-lokalitajiet. Kunsilli Lokali li qed joħolqu ambjent fiċ-ċentru tal-lokalitajiet li jħajjar investiment. L-iskemi li qed inniedu għall-Kunsilli Lokali għandhom l-għan li jagħmlu lill-Kunsilli Lokali mhux biss promoturi tal-kultura ta’ pajjiżna iżda anke katalisti ta’ attività kummerċjali. |
| Bi | pjaċir qed ninnota l-impenn tal-Kunsilli Lokali tagħna b’risq l-ambjent, li huwa prijorità fil-programm ta’ ħidma tal-pajjiż. Għandna Kunsilli li qed jinvestu f’enerġija alternattiva, li qed iħeġġu lil nieshom jagħmlu l-aħjar użu mill-enerġija u mill-iskart, u li qed jgħallmu lill-istudenti u lir-residenti tagħhom il-benefiċċji ta’ ambjent iżjed b’saħħtu. |
| Biex | titwettaq din il-ħidma qed naraw Kunsilli Lokali jagħmlu l-aħjar użu minn fondi Ewropej. Grazzi għall-MEUSAC, li qed toffri servizz ta’ assistenza u mili ta’ applikazzjonijiet lill-Kunsilli Lokali, qed naraw diversi proġetti b’fondi tal-Unjoni Ewropea jsiru direttament fil-Kunsilli Lokali tagħna u jintefqu bl-iżjed mod effettiv. Permezz ta’ ġemellaġġi u skambji qed naraw Kunsilli Lokali jħarsu lil hinn minn xtutna u jġibu lejn pajjiżna ideat ġodda, filwaqt li joffru lir-residenti tagħhom esperjenzi uniċi ta’ qsim ta’ esperjenzi ma’ popli oħra Ewropej. |
| Bi | pjaċir illejla qed nagħmlu pass ieħor fl-istorja ta’ suċċess tal-Kunsilli Lokali tagħna. Ħassejna, anke waqt il-kampanja qawwija ta’ konsultazzjoni li saret qabel ma sar it-tiġdid fil-Kunsilli Lokali fix-xhur li għaddew, li kien hemm lokalitajiet fi ħdan lokalitajiet li kien jistħoqqilhom iżjed attenzjoni ..... Lokalitajiet bi bżonnijiet speċifiċi, differenti minn dawk tal-lokalità li tagħha jagħmlu parti. U għalhekk eleġġejna fl-aħħar ġimgħat 16-il Kumitat Amministrattiv, tlettax f’Malta u tlieta f’Għawdex, sabiex anke dawk il-lokalitajiet periferiċi tingħatalhom l-importanza li tisħoqqilhom u – f’ħidma id f’id mal-Kunsill Lokali – jagħmlu d-differenza fil-post fejn jgħixu. |
| Indur | fuqkom – membri eletti f’dawn l-elezzjonijiet – u nirringrazzjakom li lqajtu s-sejħa u kkontestajtu l-ewwel elezzjonijiet għall-Kumitati Amministrattivi. Persważ li kienet l-imħabba tagħkom lejn il-lokalità u l-ħeġġa li tarawha miexja ’l quddiem li wasslukom tieħdu din id-deċiżjoni. Pajjiżna jiddependi fuq nies bħalkom li jilqgħu dawn l-isfidi u joffru ruħhom għax-xogħol, b’konvinzjoni li jistgħu jagħmlu differenza pożittiva. |
| Lilkom, | li ġejtu eletti, inħeġġiġkom taħdmu kemm tifilħu sabiex il-lokalitajiet tagħkom jimxu ’l quddiem. Is-suċċess tal-Kumitati Amministrattivi jiddependi mil-livell ta’ kollaborazzjoni li se jkun hemm bejn il-Kumitati u l-Kunsilli Lokali tagħkom. Inħeġġiġkom tikkollaboraw ukoll ma’ dawk sħabkom li kkontestaw dawn l-elezzjonijiet iżda ma ġewx eletti. Anke huma għandhom x’joffru u s-sigriet tas-suċċess tagħkom huwa li tinvolvu lil kull min jixtieq jagħti l-għajnuna tiegħu b’risq il-lokalità. |
| Ninsab | infurmat li anke jekk uffiċjalment il-ħidma tagħkom għadha kemm bdiet fl-1 ta’ Lulju, uħud minnkom ġa middejtu għonqkom għax-xogħol u qed taħsbu f’inizjattivi u proġetti sabiex tmexxu ’l quddiem il-lokalitajiet li t-tmexxija tagħhom issa ġiet fdata lilkom. |
| Nagħlaq | billi nirringrazzjakom talli qed toffru l-ħin tagħkom għall-ġid tar-residenti tagħna. Intom eżempju ħaj ta’ kif ċittadin jista’ jagħti lil pajjiżu kontribut u jkun strumentali għall-progress tiegħu. Min-naħa tiegħi naċċertakom li fl-Uffiċċju tiegħi se ssibu alleat għal kull bżonn li jkollkom. L-isfida tagħkom – dik li tibdlu l-lokalità tagħkom għall-aħjar – hija wkoll l-isfida tagħna, li rridu lil pajjiżna jkompli jinbidel filwaqt li jkompli joffri lil niesu kwalità ta’ ħajja aħjar. |
| Grazzi | lil kulħadd. |
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990