Left arrow Go Back

ŻIEDA QAWWIJA FIN-NUMRU TA’ KONSUMATURI MEGĦJUNA MIĊ-ĊENTRU EWROPEW GĦALL-KONSUMATUR

PR1160
Date Icon 22/06/2010

Tul l-ewwel ħames xhur tal-2010, iċ-Ċentru Ewropew għall-Konsumatur (ECC) irċieva 37 fil-mija aktar ilmenti mill-istess perjodu tas-sena li għaddiet. Is-sejħiet u t-talbiet għall-informazzjoni ukoll żdiedu b’55 fil-mija.

Is-Segretarju Parlamentari responsabbli mill-Konsumatur u l-Kompetizzjoni Ġusta, l-Onor. Chris Said qal li dan juri li bil-mod il-mod il-konsumatur qed isir aktar konxju tad-drittijiet tiegħu anki meta jixtri servizzi u prodotti on-line jew minn pajjiżi barranin. Il-konsumatur qed ifittex dejjem aktar l-għajnuna tal-awtoritajiet kompetenti meta jħoss li ma jkunx ingħata l-aħjar servizz jew prodott kif ikun stenna.

Chris Said żar l-uffiċju tal-ECC fil-Belt Valletta fejn intlaqa’ minn Mireille Vella, id-Direttur tad-Dipartiment għall-Konsumatur u l-Kompetizzjoni (CCD), u minn Claude Sammut, li jmexxi l-ECC f’Malta. Preżenti kien hemm ukoll il-President tal-Assoċjazzjoni tal-Konsumatur,  Benny Borg Bonello.

Il-ECC joffri informazzjoni u assistenza lill-konsumatur meta jixtri minn pajjiż ieħor tal-Unjoni Ewropea. L-għan ewlieni taċ-Ċentru Ewropew għall-Konsumatur hi li konsumatur li jixtri minn wieħed mill-pajjiżi li jipparteċipaw fis-Suq Intern Ewropew, ikollu livell ta’ protezzjoni adegwat. Dan hu proġett konġunt bejn il-Kummissjoni Ewropea u Malta u bħalu jeżistu 28 oħra fil-pajjiżi kollha tal-Unjoni Ewropea, fin-Norveġja u fl-Iżlanda.

Din is-sena il-ECC diġa rċieva 227 ilment fosthom 103 ilmenti minn konsumaturi Maltin kontra negozjanti Ewropej, u 124 ilment minn konsumaturi Ewropej kontra negozjanti Maltin.

Il-ECC ipproċessa wkoll 2,189 sejħa li minnhom 581 kienu relatati direttament max-xogħol taċ-Ċentru.

Chris Said qal li Malta għandha t-tieni l-akbar persentaġġ ta’ konsumaturi li jixtru minn fuq l-internet fl-Ewropa. Dan jirriżultat minn stħarriġ li sar is-sena li għaddiet mill-Kummissjoni Ewropea. Kien għalhekk li l-ECC ħadem qatigħ biex is-sena li għaddiet nieda lil Howard – The Shopping Assistant – sit elettroniku meqjus biċċa għodda mill-aktar importanti biex il-konsumatur jitgħallem iħares l-interessi tiegħu meta jixtri on-line.

Il-ECC igawdi minn ftehim li kien iffirmat fis-snin li għaddew u li permezz tiegħu l-Unjoni Ewropea tirrifondi 50 fil-mija tal-ispejjeż li jagħmel.

Iċ-Ċentru jagħti informazzjoni dwar diversi oqsma ta’ interess għall-konsumatur fosthom id-drittijiet tal-passiġġieri li jsiefru bl-ajru, it-timeshare, il-metodi ta’ ħlas, u l-klassifikazzjoni ta’ stabbilimenti ta’ akkomodazzjoni.

Iċ-Ċentru jippubblika wkoll materjal edukattiv, fosthom materjal dwar xiri ta’ vetturi mill-Unjoni Ewropea, xiri minn fuq l-internet, prattiċi kummerċjali mhux ġusti u aspetti varji ta’ turiżmu f’Malta.

Fl-2009 iċ-Ċentru ipparteċipa f’erba’ proġetti ta’ riċerka konġunta tax-Xibka ta’ Ċentri Ewropej tal-Konsumatur u din is-sena qed jipparteċipa f’erba’ proġetti oħra. Iċ-Ċentru għandu wkoll il-mira li jinkoraġixxi l-iżvilupp ta’ sistemi ta’ riżoluzzjoni ta’ diżgwid barra l-Qrati.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL  Tittella’ r-raba’ edizzjoni ta’ Porkilicious: inizjattiva li tgħaqqad il-gastronomija u s-sostenibbiltà tal-ikel mal-appoġġ għall-Malta Community Chest Fund

PR261991

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...

STQARRIJA MILL-MINISTERU GĦALL-EDUKAZZJONI U L-ISPORT  “L-intelliġenza artifiċjali għandha tkun għodda mħaddma tajjeb, filwaqt li qatt ma tista’ tieħu r-rwol fundamentali tal-edukaturi” – Il-Ministru Byron Camilleri fi Brussell

PR261990

STQARRIJA MILL-MINISTERU GĦALL-EDUKAZZJONI U L-ISPORT “L-intelliġenza arti...

More Press Releases Right arrow