FTUĦ TA’ ESIBIZZJONI MINN STUDENTI TAL-ISTITUT TAL-ARTI U D-DISINN TAL-MCAST
42 applikazzjoni għall-Boroż ta’ Studju fl-Arti
Il-Ministru tal-Edukazzjoni, Xogħol u l-Familja Dolores Cristina, fetħet wirja ta’ proġetti artistiċi magħmul minn studenti tal-Istitut tal-Arti u d-Disinn tal-MCAST li temmew kors li permezz tiegħu kisbu Higher National Diploma fil-Fine Arts. L-esibizzjoni li qed issir fil-bini fejn qabel kien hemm il-Power Station il-qadima fil-Valletta Waterfront, liema bini kien ġie riabilitat apposta mill-istudenti stess sabiex tkun tista’ tilqa’ fiha din l-esibizzjoni.
F’diskors li għamlet fil-ftuħ tal-wirja, il-Ministru Cristina qalet li meta wieħed idur dawra mal-wirja ma jistgħax ma jammirax id-don kreattiv tal-istudenti-artisti li qegħdin jesibixxu x-xogħlijiet li ħolqu fil-kors tal-istudji tagħhom fl-MCAST.
Din hi ċelebrazzjoni ta’ kreattivita’ li hi l-ħila li wieħed jiġġenera ideat innovattivi u jittraduċihom minn ħsibijiet għal realtajiet. Dan hu proċess li jinvolvi ħsibijiet oriġinali li mbagħad jinbidlu fi produzzjonijiet artistiċi.
Dolores Cristina qalet li l-lum nitkellmu fuq il-kreattivita’ bħala industrja li tgħin l-ekonomija tal-pajjiż. Industrija li tiġġenera l-ġid permezz tal-ħolqien u l-esplojtazzjoni tal-proprjeta’ intellettwali billi tipprovdi servizzi kreattivi. Il-ħidma kreattiva qed issir dejjem aktar parti mill-ekonomiji tal-pajjiżi industrjalizzati.
Il-lum, il-Gvern waqqaf taqsima apposta fil-Ministeru tal-Finanzi u l-Investiment biex tgħin fl-iżvilupp tal-Industrja Kreattiva f’pajjiżna.
F’dan il-kuntest, il-ħidma tal-Istitut tal-Arti u d-Disinn issir aktar rilevanti għaliex għandu responsabbilta biex jipprepara nies biex jaħdmu f’din l-industrja tal-kreattivita’ billi jgħinhom jiżviluppaw it-talenti u l-ħiliet kreattivi tagħhom kollha.
Il-Ministru qalet li dawn l-għaxar studenti li qed jesibixxu se jiggradwaw u jieħdu l-Higher National Diploma fil-Fine Arts u allura s-sena d-dieħla jkunu jistgħu jkomplu jistudjaw biex jiksbu BA (Hons) Fine Arts li se jkun offrut għall-ewwel darba s-sena li ġejja. Hi ħeġġithom biex jaħtfu din l-opportunita’.
Biex ikompli jsaħħaħ dan il-qasam, il-Gvern, fil-bidu ta’ Marzu li għadda nieda skema ta’ Boroż ta’ Studju fl-Arti. Hu ta’ sodisfazzjon li kien hemm 42 persuna li applikaw għal dawn il-Boroż ta’ Studju, maħsuba biex jgħinu studenti jkomplu jispeċjaliżżaw fil-qasam artistiku tagħhom. Bħalissa qed isiru l-intervisti biex jingħażlu l-istudenti li se jieħdu dawn li scholarships.
Il-Ministru ferħet lill-istudenti għax-xogħol sabiħ li ppreżentaw f’din il-wirja, lill-għalliema u l-amministraturi tal-Istitut tal-Arti u d-Disinn u tal-Kulleġġ u esprimiet it-tama li aktar studenti jagħżlu dan il-qasam ta’ studju u li jsibu l-għajnuna kollha li għandhom bżonn biex jiżviluppaw it-talenti kreattivi tagħhom, jagħmlu karriera li tagħtihom sodisfazzjon u fl-istess waqt ikunu qed jikkontribwixxu għall-ġid ekonomiku tal-pajjiż.
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990