L-ISPEAKER MICHAEL FRENDO JIEĦU SEHEM FIL-KONFERENZA EWROPEA GĦALL-PRESIDENTI TAL-PARLAMENTI F’ĊIPRU
Aktar tard wara nofsinhar, l-iSpeaker tal-Kamra tad-Deputati, Dr. Michael Frendo se jħalli Malta fi triqtu lejn Ċipru sabiex jieħu sehem fil-Konferenza msejjħa mill-Kunsill tal-Ewropa għall-Presidenti tal-Parlamenti tal-pajjiżi msieħba. Din il-Konferenza titlaqqa’ kull sentejn, u l-aħħar darba li nżammet kien fl-2008 fi Strasburgu fi Franza.
Il-Konferenza ta’ Ċipru, li hija mifruxa fuq jumejn u li se tinżamm fil-belt ta’ Limassol fin-nofsinhar tal-pajjiż, se tiddiskuti żewġ temi ewlenin: ‘Id-drittijiet u r-responsabilitajiet tal-Oppożizzjoni fil-Parlament’ u ‘Il-prinċipju tan-nuqqas ta’ diskriminazzjoni fil-liġijiet internazzjonali dwar id-drittijiet umani’.
F’messaġġ ippubblikat fis-sit elettroniku tal-konferenza (http://www.cyprusjune2010.info/) li qed tiġi organizzata mill-Kamra tar-Rappreżentanti tar-Repubblika ta’ Ċipru, l-Onor Mr. Marios Garoyian, Speaker tal-Parlament Ċiprijott awgura li l-laqgħat ikunu pass sinifikattiv ieħor fil-ħidma tal-Kunsill tal-Ewropa li dejjem tipprova ġġib ‘il quddiem tliet prinċipji fundamentali: id-drittijiet tal-bniedem, id-demokrazija u l-istat tad-dritt.
Is-Sur Ray Scicluna, Assistent Skrivan tal-Kamra tad-Deputati ta’ Malta, se jkun qiegħed jakkumpanja lill-iSpeaker Malti.
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990