Left arrow Go Back

STQARRIJA MILL-MINISTERU GĦALL-FINANZI, L-EKONOMIJA U INVESTIMENT B’RISPOSTA GĦALL-ISTQARRIJA MAĦRUGA MILL-OPPOŻIZZJONI

PR1078
Date Icon 09/06/2010

Il-Qorti Ewropea twaqqa’ l-argument tal-Oppożizzjoni dwar il-VAT fuq it-taxxa ta’ reġistrazzjoni tal-vetturi.

Waqt li l-Kap tal-Oppożizzjoni Joseph Muscat għaddej b’kampanja fejn qed jipprova juri lilu nnifsu li lest jiġġieled kull tip ta’ korruzzjoni, f’dan il-każ huwa lest li juża flus il-poplu billi jwieghed rifużjoni ta’ taxxa miġbura mill-Gvern Malti b’mod leġittimu u minkejja li ma hemm l-ebda deciżjoni ta’ qorti li qalet li l-Gvern Malti kiser xi ligi.

Il-Gvern ġabar it-taxxa li kienet dovuta u xejn aktar. Is-sistema ta’ tassazzjoni fuq il-vetturi ta’ pajjiżna kienet għaddiet mill-Parlament Malti, liema liġi ma ġietx ikkontestata mill-Kummissjoni Ewropea fil-process ta’ screening għas-sħubija fl-Unjon Ewropea, u mhux biss ma teżisti ebda sentenza li tgħid li Malta kisret il-liġi, iżda l-Kummissjoni Ewropea qatt ma ressqet lil Malta quddiem il-Qorti Ewropea minħabba l-kwistjoni.

Anzi, fl-20 ta' Mejju 2010, il-Qorti Ewropea tal-Ġustizzja ma tatx ragun lill-Kummissjoni Ewropea li kienet qed targumenta, bħal ma qed jagħmel il-Partit ta’ l-Oppozizzjoni fil-każ ta’ Malta, li abbażi tad-deċiżjoni preċedenti fil-każ tad-Danimarka, allura anke s-sistema użata fil-Polonja ma kienitx konformi mal-liġi. Il-Qorti qalet b’mod car li l-Kummissjoni qed tiżbalja meta tasserixxi li t-taxxa ta’ reġistrazzjoni li qed tiġi kontestata f’din il-kawża, hija identika għat-taxxa ta’ reġistrazzjoni tad-Danimarka.

Dan kien l-istess argument li l-Gvern dejjem għamel fil-każ ta’ Malta.

Għall-kuntrarju, u minkejja din id-deċiżjoni tal-Qorti, Joseph Muscat jibqa’ jippersisti li l-Gvern għandu xi forma ta’ obbligu li jagħti rifużjoni. Dan minkejja li m’hemm ebda decizjoni kontra pajjiżna u issa għal darb’oħra hemm sentenza li tgħid li l-każ tad-Danimarka m’għandux rilevanza għal dak ta’ pajjiżi oħra.

Il-Gvern jistieden lill-Oppożizzjoni biex issib is-sentenza tal-Qorti Ewropea tal-Ġustizzja kontra l-Gvern Malti li tiddikjara li l-VAT fuq ir-reġistrazzjoni tal-vetturi hija llegali.

Il-fatt li Joseph Muscat jibqa’ jippersisti fil-wegħda tiegħu li jagħti lura rifużjoni fuq din it-taxxa, anke jekk il-Qrati jiddeċiedi mod ieħor, tikkonferma li din il-wegħda mhi xejn ħlief gimmick elettorali u li Joseph Muscat lest juża l-flus tal-poplu għal voti.

L-Oppozizzjoni fil-kampanja li ghamlet kienet uriet kemm lesta tinjora l-etika u l-korrettezza politika, tant li Joseph Muscat qatt ma ddikjara li hu għandu interess dirett, għaliex anki hu jrid jiehu flus ta’ taxxa li ħallas. Kienet il-media li kixfet lil Joseph Muscat u deputati ta’ l-Oppozizzjoni oħra li kellhom interess dirett, iżda qatt ma qalu li huma fost dawk li jridu flus lura.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL  Tittella’ r-raba’ edizzjoni ta’ Porkilicious: inizjattiva li tgħaqqad il-gastronomija u s-sostenibbiltà tal-ikel mal-appoġġ għall-Malta Community Chest Fund

PR261991

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...

STQARRIJA MILL-MINISTERU GĦALL-EDUKAZZJONI U L-ISPORT  “L-intelliġenza artifiċjali għandha tkun għodda mħaddma tajjeb, filwaqt li qatt ma tista’ tieħu r-rwol fundamentali tal-edukaturi” – Il-Ministru Byron Camilleri fi Brussell

PR261990

STQARRIJA MILL-MINISTERU GĦALL-EDUKAZZJONI U L-ISPORT “L-intelliġenza arti...

More Press Releases Right arrow