Left arrow Mur Lura

STQARRIJA KONĠUNTA TAL-MINISTERU GĦALL-AFFARIJIET BARRANIN U S-SEGRETARJAT PARLAMENTARI GĦAT-TURIŻMU, L-AMBJENT U L-KULTURA DWAR IL-QAGĦDA TAT-TRAFFIKU TAL-AJRU

PR0692
Date Icon 21/04/2010

Minkejja li l-qagħda tat-traffiku tal-ajru jidher li ġejja għan-normal, il-Ministeru għall-Affarijiet Barranin flimkien mas-Segretarjat Parlamentari għat-Turiżmu, l-Ambjent u l-Kultura u l-AirMalta qed ikomplu jaħdmu flimkien biex dawk il-Maltin li nqabdu barra minn xtutna jinġiebu lura Malta.

Il-Ministeru għall-Affarijiet Barranin qed ikompli jgħin lill-Maltin li talbu għajnuna. Il-Viċi Prim Ministru u Ministru għall-Affarijiet Barranin Dr Tonio Borg qiegħed ikompli jappella lil dawk il-Maltin li jixtiequ informazzjoni dwar kif jikkuntattjaw l-ambaxxati Maltin sabiex iżuru s-sit www.foreign.gov.mt. Huwa rringrazzja lill-uffiċjali kollha fi ħdan il-Ministeru għall-ħidma siewja li wettqu fl-aħħar jiem.

Sadanittant l-AirMalta l-lum kompliet iżżid fin-numru ta’ titjiriet tagħha lejn u minn Malta. L-AirMalta operat, jew ser topera matul il-jum, titjiriet għal Vjenna, Reggio Calabria/Ruma, Londra Heathrow, Pariġi Orly, Katanja/Munich, Pariġi (Charles de Gaulle), Tripli, Zurich, Frankfurt, Berlin Tegel, Manchester, Brussell, Ruma/Reggio, Katanja/Ġinevra, Milan u Londra Gatwick. L-AirMalta qed topera l-lum ukoll erba’ titjiriet extra għal Londra Gatwick/Marseille, Londra Gatwick, Zurich u Brussell. Għada l-AirMalta ser topera iktar titjiriet extra lil hinn mill-iskeda normali tagħha jekk ir-restrizzjonijiet tal-ispazju tal-ajru jitneħħew u jekk jiġu kkonfermati slots għat-titjiriet. It-titjiriet extra jiġu kkomunikati malli s-slots jiġu kkonfermati.

Illum kien hemm b’kollox 62 titjira minn u lejn l-Ajruport Internazzjonali ta’ Malta filwaqt li 22 titjira minn u lejn l-ajruport tħassru.

Is-Segretarju Parlamentari għat-Turiżmu Mario de Marco irringrazzja lil AirMalta li tul dawn l-aħħar jiem ħadet il-passi kollha meħtieġa biex iġġib lura lejn pajjiżna dawk il-Maltin li nqabdu barra minn xtutna u biex ħadet lura lejn id-destinazzjonijiet tagħhom, u safejn setgħet tasal, turisti li kienu fostna. L-AirMalta qed toffri wkoll lill-passiġġieri tagħha bbukkjar mill-ġdid b’xejn fuq kwalunkwe titjira bl-iskeda operata minnha, jew li tirrifondi l-flus tal-biljett.  

Is-Segretarju Parlamentari faħħar l-istakeholders fil-qasam turistiku li ħadmu flimkien sabiex ikun hemm l-inqas inkonvenjent għat-turisti li nqabdu Malta.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL  Tittella’ r-raba’ edizzjoni ta’ Porkilicious: inizjattiva li tgħaqqad il-gastronomija u s-sostenibbiltà tal-ikel mal-appoġġ għall-Malta Community Chest Fund

PR261991

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...

STQARRIJA MILL-MINISTERU GĦALL-EDUKAZZJONI U L-ISPORT  “L-intelliġenza artifiċjali għandha tkun għodda mħaddma tajjeb, filwaqt li qatt ma tista’ tieħu r-rwol fundamentali tal-edukaturi” – Il-Ministru Byron Camilleri fi Brussell

PR261990

STQARRIJA MILL-MINISTERU GĦALL-EDUKAZZJONI U L-ISPORT “L-intelliġenza arti...

Aktar Stqarrijiet Right arrow