Left arrow Go Back

PROĠETT TA’ AFFORESTAZZJONI MILL-KULLEĠĠ TA’ SAN ALWIĠI

PR0679
Date Icon 20/04/2010

Dalgħodu l-Ministru għar-Riżorsi u l-Affarijiet Rurali, George Pullicino żar l-istudenti kemm tas-sekondarja kif ukoll tal-Upper Secondary, li qed jipparteċipaw fi proġett ta’ afforestazzjoni fil-kulleġġ ta’ San Alwiġi.

F’dan il-Kulleġġ, dawn l-istudenti fuq inizjattiva tagħhom stess, iħawwlu iż-żerriegħa ta’ siġar indiġeni Maltin li tingħatalhom mid-Dipartiment tal-Parks, u wara li dawn jibdew jikbru, jingħataw lura lill-kampanja 34U sabiex jitħawwlu fil-parks nazzjonali ta’ pajjiżna.

Matul dawn l-aħħar 4 snin, kemm ilha ssir din l-inizjattiva, l-istudenti tal-Kulleġġ bl-għajnuna tal-għalliema tagħhom, ħawwlu mat-3,000 żerriegħa ta’ siġar indiġeni Maltin. Matul is-sena skolastika li għaddiet, dawn l-istudenti għaddew lid-dipartiment tal-parks mat-800 siġra filwaqt li fi tmiem din is-sena skolastika, se jkunu qegħdin jgħaddu mal-elf siġra. Din l-attivita’ f’dan il-Kulleġġ għandha wkoll is-sostenn tal-Bank of Valletta plc.

Il-Ministru Pullicino irringrazzja kemm lill-istudenti kif ukoll lill-għalliema li b’tant dedikazzjoni jagħżlu li jqattgħu l-ħin liberu tagħhom iħawwlu, jsaqqu u jieħdu ħsieb dawn is-siġar sakemm jibdew jikbru. Huwa saħaq li din hija inizjattiva tassew tajba u sabiħa fejn l-istudenti tal-Kulleġġ San Alwiġi qegħdin jinvestu fis-soċjeta’ u fl-ambjent tal-lum u ta’ għada, billi qed ikabbru kemm jistgħu siġar biex ikomplu jsebbħu pajjiżna.

Il-Ministru Pullicino fakkar li permezz tal-iskema 34U f’dawn l-aħħar ħames snin tħawwlu ‘l fuq minn 90,000 siġra indiġena mxerrda mal-pajjiż kollu partikolarment fil-parks Nazzjonali ta’ Malta. F’dan il-kuntest il-Ministru Pullicino fakkar li l-Gvern jinsab impenjat sabiex isir park tal-familja f’Wied il-Għajn, park fil-Magħtab kif ukoll park ieħor f’Delimara fost numru ta’ proġetti oħra.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL  Tittella’ r-raba’ edizzjoni ta’ Porkilicious: inizjattiva li tgħaqqad il-gastronomija u s-sostenibbiltà tal-ikel mal-appoġġ għall-Malta Community Chest Fund

PR261991

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...

STQARRIJA MILL-MINISTERU GĦALL-EDUKAZZJONI U L-ISPORT  “L-intelliġenza artifiċjali għandha tkun għodda mħaddma tajjeb, filwaqt li qatt ma tista’ tieħu r-rwol fundamentali tal-edukaturi” – Il-Ministru Byron Camilleri fi Brussell

PR261990

STQARRIJA MILL-MINISTERU GĦALL-EDUKAZZJONI U L-ISPORT “L-intelliġenza arti...

More Press Releases Right arrow