MEJDA TA’ L-APPOSTLI BI STIL ORIĠINALI FIL-BANCA GIURATALE, FIR-RABAT GĦAWDEX
B’differenza mill-wirjiet ta’ diversi ġeneri ta’ arti li mdorrijin naraw matul is-sena, fil-foyer tal-Banca Giuratale fi Pjazza Indipendenza fir-Rabat, Għawdex, din is-sena l-Uffiċċju tal-Kultura qed jippreżenta wirja oriġinali b’rappreżentazzjoni tal-Mejda li fuqha Kristu qasam l-aħħar Ikla ma’ l-Appostli Tiegħu awl il-lejl li fih ġie msallab. Din il-wirja ġiet inawgurata l-ġimgħa li għaddiet mill-Assistent Parlamentari mal-Ministeru għal Għawdex, l-Onor Frederick Azzopardi.
Għad-Dipartiment tal-Kultura fi ħdan il-Ministeru għal Għawdex, li għandu l-Uffiċċji Amministrattivi tiegħu f’dan l-istess bini, din il-wirja hija aktar speċjali, għaliex qed issir kollha kemm hi minn wieħed mill-impjegati tal-istess uffiċċju, Frank Cassar. Frank mhuwiex wiċċ ġdid fil-qasam artistiku f’Għawdex, u minbarra li diġà tella’ żewġ wirjiet oħra personali ta’ xogħlijiet artistiċi tiegħu, ħa sehem f’numru ta’ wirjiet kollettivi tal-arti. Ħafna mix-xogħlijiet tiegħu, li fil-parti l-kbira jirrapreżentaw is-sagru, insibuhom esposti mhux biss ġewwa u barra numru ta’ djar f’pajjiżna, iżda wkoll f’pajjiżi oħra bħal ma hi l-Awstralja fejn kien ikkumissjonat jesegwixxi sett ta’ għoxrin basso-riljiev li jirrapreżentaw l-erba’ misteri tat-talba tar-Rużarju.
Fil-Mejda ta’ l-Appostli fil-Banca Giuratale, minbarra li wieħed jista’ jara mejda tipikament Lhudija armata għall-Ikla tal-Għid, insibu wkoll statwa life-size ta’ Ġesù Kristu fil-mument tal-qsim tal-ħobż, xogħol l-istess artist Frank Cassar. Il-wirja hija miftuħa kuljum sa Ħadd il-Għid, bejn it-8.00 a.m. u d-9.00 p.m. u dawk li jżuruha jistgħu japprezzaw iktar dak li jkunu qegħdin jaraw permezz ta’ dokumentarju qasir imħejji apposta għal din l-okkażjoni.
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990