IL-KUMMISSJONI GĦOLJA MALTIJA F’LONDRA TASSISTI 180 PERSUNA FL-EWWEL TLIET XHUR TAS-SENA 2010
Il-Ministeru tal-Affarijiet Barranin kompla jkun ta’ servizz għall-Maltin li jinsabu barra minn Malta. Il-Kummissjoni Għolja Maltija f’Londra assistit f’għajnuniet konsolari madwar 60 pazjent Malti, kull xahar bejn Jannar u Marzu, li jitilgħu Londra għall-kura medika. F’Jannar il-Kummissjoni Għolja għenet 54 persuna, fi Frar 58 persuna u matul dan ix-xahar għenet 67 persuna.
Din hija parti minn ħidma kontinwa li jwettaq il-Ministeru tal-Affarijiet Barranin permezz tar-rappreżentanzi diplomatiċi tiegħu barra minn Malta. L-iskop aħħari ta’ din il-ħidma mill-Ambaxxati u Konsolati hija li l-Maltin jingħataw kull assistenza neċessarja fuq diversi materji fosthom, visa’s, ċittadinanza, u assistenza konsolari oħra.
Il-Viċi Prim Ministru u Ministru tal-Affarijiet Barranin Tonio Borg qal li huwa ta’ sodisfazzjon kbir li l-ħidma tal-Ministeru tgħin ukoll lil dawn il-persuni li jkunu għaddejjin minn mumenti sensittivi fil-ħajja tagħhom. Fi kliemu, il-partikolarità ta’ sitwazzjonijiet simili jitolbu l-akbar rispett u professjonalità mill-ħaddiema Maltin impjegati f’dawn l-Ambaxxati. Huwa għal dan il-għan li l-Ministeru jagħti taħriġ kontinwu lill-impjegati tiegħu.
Intant, fl-ewwel tliet xhur tas-sena ġiet reġistrata żieda importanti fil-kuntatti bejn negozjanti u investituri li jesprimu interess f’Malta. Din issa laħqet kważi l-400 kuntatt bejn Jannar u Marzu 2010.
Fiż-żjara riċenti li għamel fiċ-Ċina, il-Viċi Prim Ministru Tonio Borg kellu laqgħat mal-Viċi President tal-Għaqda tan-negozji ta’ Shangai, li matulha ddiskutew il-potenzjal li ż-żewġ pajjiżi għandhom sabiex ikabbru l-interessi kummerċjali tagħhom; fosthom fl-oqsma tat-turiżmu, l-edukazzjoni, is-servizzi finanzjarji u l-qasam marittimu.
Fl-istess żjara, tħabbar li wara li fl-2009 kienu ffirmati 12-il ftehim bejn Malta u c-Cina, l-Ghaqda li tirrapreżenta s-sidien tan-negozju f'Beijing, iddikjarat li se tkun qeda tmexxi delegazzjoni kummerċjali lejn Malta f'Ġunju li ġej. Dan fid-dawl tal-fatt li ż-żewġ pajjiżi qablu li f'Mejju li ġej jirrevedu l-ftehim ta' ħelsien mit-tassazzjoni doppja.
DOI – 31.03.2010
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990