TĦEJJIJIET GĦAŻ-ŻJARA TAL-Q.T. IL-PAPA BENEDETTU XVI F’MALTA
Waqt Konferenza tal-Aħbarijiet li saret dalgħodu, il-Kumitati Organizzattivi taw dettalji tal-Quddiesa li ser tkun ċċelebrata mill-Q.T. il-Papa Benedittu XVI, fuq il-Fosos tal-Floriana, nhar il-Ħadd 18 ta’ April, 2010.
Mons. Charles Cordina, Ko-Ordinatur tal-Kumitat Organizzattiv Interdjoċesan qal li bħal żjarat oħra li għamel il-Q.T. il-Papa Benedittu XVI, l-attivita’ prinċipali tkun dik taċ-ċelebrazzjoni tal-Quddiesa. Mons. Cordina kompla jgħid li qed jistenna parteċipazzjoni qawwija minn naħa tal-pubbliku u semma kif se jkun hemm madwar 5,000 siġġu b’sezzjonijiet apposta riżervati għal dawk ta’ ‘l fuq minn 75 sena u persuni li jużaw l-wheelchair. Se jkun hemm ukoll servizz ta’ sign language f’żona apposta.
F’din il-konferenza ġie ppreżentat ukoll id-diżinn tat-tribuna b’diżinn ta’ Carlo Schembri li bil-kollaborazzjoni tal-Perit Joe Bondin, qed jieħdu ħsieb il-bini tat-tribuna u t-tqassim għal fuq il-Fosos. Carlo Schembri qal li t-tribuna ġiet iddiżinjata b’tali mod li s-Salib, li se jkun fiċ-ċentru, se jgħaqqad il-pubbliku mal-Papa. Fil-bini tat-tribuna ser jiġi użat materjal riċiklat, inkluż is-sedja li ser juża l-Q.T. il-Papa Benedittu XVI. Il-Perit Joe Bondin spjega wkoll li ttieħdu l-prekawzjonijiet kollha possibli biex waqt il-bini tat-tribuna, ma ssirx ħsara lill-Fosos.
Tkellem ukoll Fr. Jesmond Manicaro responsabbli mil-liturgija li qal li l-Papa se jagħti lis-Santwarju t’Għawdex skultura fil-forma ta’ warda tad-deheb, magħrufa bħala Rosa d’oro. Din hija rikonoxxenza importanti li tingħata mis-Santa Sede lis-santwarji Marjani li għandhom tradizzjoni ta’ pellegrinaġġi. Fl-antik, din kienet tingħata mill-Papa lir-Rejiet sovrani ta’ pajjiżi kattoliċi. Il-Papa se jagħti r-Rosa d’oro lill-Isqof t’Għawdex, Mons. Mario Grech, fi tmiem il-Quddiesa.
Silvio Farrugia, Deputat Ko-ordinatur tal-Kumitat Organizzattiv Nazzjonali responsabbli mill-logistika, qal li minħabba l-ammont ta’ nies mistennija għal din l-attivita’, huwa importanti li l-pubbliku juża t-trasport pubbliku.
Il-Quddiesa ser tibda fl-10.00 ta’ filgħodu bil-Q.T. il-Papa Benedittu XVI jasal ftit qabel u jgħaddi minn fost il-folla permezz tal-Popemobil. Il-Papa Benedittu XVI ser joħroġ għall-quddiesa mill-Knisja ta’ San Publiju bil-purċissjoni tgħaddi minn fost in-nies preżenti. Wara l-quddiesa, il-Papa ser jgħid it-talba tar-Reġina Coeli, talba li soltu tingħad mill-Papa minn Pjazza San Pietru. Din il-Quddiesa ser tixxandar live minn ‘l fuq minn 60 stazzjon madwar id-dinja.
Il-pubbliku li jkollhu bżonn kull tip ta’ informazzjoni dwar din l-attivita’ jew dwar il-programm taż-Żjara tal-Papa f’Malta, jista’ jċempel Infoline 188 jew jibgħat e-mail fuq: info.zjarapapa@gov.mt
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990