Left arrow Go Back

KAMPANJA TA’ TINDIF F’INĦAWI RURALI F’GĦAWDEX

PR0119
Date Icon 22/01/2010

Il-Ministeru għal Għawdex nieda kampanja ta’ tindif f’inħawi rurali tal-gżira ta’ Għawdex. Ix-xogħol qiegħed isir matul ir-rotot ta’ mixjiet fil-kampanja li kienu ġew stabiliti xi snin ilu mill-istess Ministeru b’kollaborazzjoni mal-Assoċjazzjoni tat-Turiżmu għal Għawdex u l-Awtorità Maltija għat-Turiżmu.  

Waqt żjara li għamlet f’wieħed mis-siti li qed jiġu mnaddfa, il-Ministru għal Għawdex, l-Onor Giovanna Debono spjegat kif inħasset il-ħtieġa li jerġgħu jiġu ristabiliti dawn il-mixjiet minħabba ħsara li saret matul dawn ir-rotot, kemm b’effett tal-elementi naturali kif ukoll permezz ta’ atti vandali. 

Il-programm ta’ tindif ta’ dawn il-mixjiet jinkludi ġbir ta’ skart u materjal ieħor li jinkludi wkoll skart ta’ kostruzzjoni mormi irregolarment f’dawn l-inħawi. Barra minhekk ser issir ħidma koordinata mit-taqsima tal-indafa pubblika fi ħdan il-Ministeru għal Għawdex, li permezz tagħha ser jiġi assigurat li dawn ir-rotot jinżammu f’kundizzjoni tajba ladarba dawn jiġu mnaddfa. 

L-inħawi li ser jiġu koperti mill-programm ta’ tindif jinkludu dawk ta’ Daħlet Qorrot f’mixja li tieħu minn Triq San Blas fin-Nadur sal-Qala. Mixja oħra hija dik fl-inħawi ta’ Wied Binġemma sar-Ramla, fuq ix-xaqliba l-oħra tan-Nadur u fil-limiti tax-Xagħra. Il-mixjiet fl-inħawi tal-fanal ta’ Ġordan u l-oħra fl-inħawi tas-salini fin-naħa tal-punent tal-gżira, huma mistennija li jġibu fi tmiemu l-programm ta’ tindif f’dawn il-mixjiet. Qed isir dak kollu possibli biex dawn l-inħawi jitnaddfu u jiġu ristabiliti fi żmien qasir, anke fir-rigward tal-fatt li mixjiet fil-kampanja huma waħda mill-attrazzjonijiet l-aktar popolari ma’ dawk li jżuru l-gżira ta’ Għawdex f’dan iż-żmien tas-sena.   

L-Onor Giovanna Debono, Ministru għal Għawdex, spjegat kif dan il-programm ta’ tindif qiegħed jiġi koordinat permezz ta’ ħaddiema u makkinarju tal-Ministeru għal Għawdex. Hija esprimiet is-sodisfazzjon għal mod ta’ kif sar ix-xogħol sa issa u fissret l-importanza ta’ din l-inizjattiva anke fir-rigward tal-ħidma tal-Ministeru għal Għawdex marbuta mal-viżjoni eko-Għawdex. L-Onor Debono ikkundannat atti vandali li ġew rappurtati mill-ħaddiema f’dawn is-siti u fissret il-ħtieġa ta’ aktar impenn u żieda fl-għarfien b’risq l-ambjent rurali tal-gżira mill-pubbliku ġenerali. 

Share this Press Release Icon socials Icon socials Icon socials Icon socials

Other Press Releases:

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL  Tittella’ r-raba’ edizzjoni ta’ Porkilicious: inizjattiva li tgħaqqad il-gastronomija u s-sostenibbiltà tal-ikel mal-appoġġ għall-Malta Community Chest Fund

PR261991

STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...

STQARRIJA MILL-MINISTERU GĦALL-EDUKAZZJONI U L-ISPORT  “L-intelliġenza artifiċjali għandha tkun għodda mħaddma tajjeb, filwaqt li qatt ma tista’ tieħu r-rwol fundamentali tal-edukaturi” – Il-Ministru Byron Camilleri fi Brussell

PR261990

STQARRIJA MILL-MINISTERU GĦALL-EDUKAZZJONI U L-ISPORT “L-intelliġenza arti...

More Press Releases Right arrow