IT-TIENI RAPPORT DWAR L-EFFIĊJENZA TAL-KUNSILLI LOKALI GĦAS-SENA 2009
Is-Segretarju Parlamentari għall-Konsultazzjoni Pubblika u Informazzjoni, l-Onor. Chris Said ħabbar lid-Dipartiment għall-Gvern Lokali għadu kemm ippubblika u qed jippreżenta t-tieni rapport tiegħu għas-sena 2009 li jkopri l-perjodu April – Lulju 2009, u li jagħti analiżi tal-ħidma tal-24 Kunsill Lokali assessjati f’dan il-perjodu, li huma maqsuma f’sittax-il Kunsill Lokali f’Malta u tmien Kunsilli Lokali f’Għawdex. Dan qalu waqt attività f’San Lawrenz, Għawdex – il-lokalità li kisbet l-ewwel post mir-riżultat li nħareġ minn dan ir-rapport.
Dan huwa s-sitta u erbgħin rapport dwar l-Effiċjenza tal-Kunsilli Lokali li sar sa mit-twaqqif tal-Kunsilli Lokali fl-1993, u jinkludi l-lokalitajiet li għandhom il-funzjoni tat-tindif tax-xtut. Ir-rapport jagħti analiżi fid-dettal tar-riżultati tal-ispezzjonijiet li saru fil-perjodu April – Lulju 2009, kif ukoll tqabbil mar-riżultati tar-rapport ta’ l-istess perjodu tas-sena ta’ qabel. Jagħti ukoll paragun mal-marka medja attwali tal-Kunsilli Lokali assessjati f’dan il-perjodu. Is-Segretarju Parlamentari stqarr li minbarra dan ir-rapport, id-Dipartiment għall-Gvern Lokali regolarment jibgħat rapporti dettaljati lill-Kunsilli Lokali biex jgħinuhom itejbu l-ħidma tagħhom.
Meta tinħadem il-marka medja għal kull Kunsill Lokali fuq il-funzjonijiet kollha li kien assessjat fuqhom f’dan il-perjodu, sitt Kunsilli laħqu jew qabżu l-marka medja ta’ 7. Dawn huma tnejn f’Malta, Kalkara u Ta’ Xbiex, u erbgħa f’Għawdex, Munxar, San Lawrenz, Xagħra u Żebbuġ. Tmintax-il Kunsill ma qabżux il-marka ta’ 7. Dawn huma Valletta, Siġġiewi, Birżebbuġa, Għajnsielem, Marsaskala, Marsaxlokk, Mellieħa, Mġarr, Nadur, Naxxar, Pembroke, Qala, Qrendi, San Ġiljan, San Pawl il-Baħar, Sannat, Sliema u Xgħajra.
Il-Kunsill Lokali San Lawrenz, kiseb l-ogħla marka medja assoluta ta’ 7×41 u l-anqas marka medja, dik ta’ 5.07 kisibha l-Kunsill Lokali Pembroke.
Noel Formosa, Sindku ta’ San Lawrenz stqarr li hu sodisfatt bir-riżultat li qed juri li l-ħidma tal-Kunsill qed tħalli l-frott. Hu qal li dan ir-riżultat qed ikompli jinkoraġġixxi lill-kunsill sabiex iħares ‘il quddiem u jkompli jsaħħaħ it-twettiq ta’ xogħlijiet fil-lokalità, għall-benefiċċju tar-residenti u ta’ dawk kollha li jżuru dan ir-raħal.
Il-klassifika kollha bil-marki medji tal-24 Kunsill Lokali assessjati bejn April u Lulju 2009 tinsab hawn taħt.
| Valletta | 6.50 |
| Siġġiewi | 6.94 |
| Birżebbuġa | 6.28 |
| Għajnsielem | 6.83 |
| Kalkara | 7.00 |
| Marsaskala | 6.42 |
| Marsaxlokk | 6.21 |
| Mellieħa | 6.72 |
| Mġarr | 6.67 |
| Munxar | 7.21 |
| Nadur | 6.79 |
| Naxxar | 6.63 |
| Pembroke | 5.07 |
| Qala | 6.95 |
| Qrendi | 6.73 |
| San Ġiljan | 6.87 |
| San Lawrenz | 7.41 |
| San Pawl il-Baħar | 5.89 |
| Sannat | 6.71 |
| Sliema | 6.69 |
| Ta’ Xbiex | 7.17 |
| Xagħra | 7.12 |
| Xgħajra | 6.27 |
| Żebbuġ (Għ) | 7.11 |
Stqarrijiet Oħra:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990