IS-SEGRETARJU PARLAMENTARI GĦAŻ-ŻGĦAŻAGĦ U SPORT CLYDE PULI, IŻUR XOGĦLIJIET TA’ MMODERNIZZAR U MANUTENZJONI ESTENSIVA FIL-KUMPLESS SPORTIV TAL-QROQQ
“Matul l-aħħar sena, l-investiment fil-Kumpless Sportiv ta’ Tal-Qroqq laħħaq il-€550,000, bl-ispiża prinċipali tintefaq fuq il-Pixxina Nazzjonali li mistennija terġa tiftaħ għall-użu tal-pubbliku minn nhar it-Tnejn li ġej, kif kien skedat.”
Dan qalu s-Segretarju Parlamentari għaż-Żgħażagħ u Sport, l-Onor. Clyde Puli, waqt żjara li għamel fil-Pixxina Nazzjonali waqt li għaddejjin xogħlijiet ta’ mmodernizzar.
Is-Segretarju Parlamentari qal li x-xogħlijiet f’dan il-kumpless matul is-sena li għaddiet kien jikkonsisti fl-estensjoni tal-Fitness Centre, xogħol strutturali, installazzjoni ta’ CCTV Cameras u rranġar tal-Isquash Courts. F’Novembru li għadda, ingħata bidu għall-programm sħiħ ta’ xogħlijiet fil-pixxina li varja minn xogħlijiet strutturali, xogħol fuq sistema ġdida ta’ drenaġġ, ilma trattat, showers ġodda kif ukoll bdil ta’ filters u heat exchangers.
L-Onor. Clyde Puli sostna li dawn ix-xogħlijiet qed isiru biex il-kwalità ta’ servizz li toffri din il-pixxina tkompli tiżdied. Hu qal li x-xogħol qed isir bi skeda intensiva biex l-operat tal-pixxina jirritorna għan-normal malajr kemm jista’ jkun.
Dan qed isir ukoll fil-waqt li l-isportivi u l-ġenituri li jibgħatu t-tfal tagħhom f’din il-faċilità jserħu rashom li l-livell tal-ilma ikun wieħed ta’ kwalità, ħieles minn kull periklu ta’ infezzjoni u mard. L-iskeda ta’ xogħlijiet kif ippjanata, mistennija tintemm f’Marzu iżda mhux mistenni li dawn ix-xogħlijiet itellfu lil dawk li jagħmlu użu mill-pixxina.
Is-Segretarju Parlamentari fakkar ukoll li l-Kumpless Sportiv ta’ Tal-Qroqq jiswa’ lill-Gvern mal-€1,700,000 fis-sena fi spiża rikorrenti. Fost l-akbar sfidi li għandha l-pixxina huwa t-tisħin matul ix-xhur kesħin tax-xitwa. Matul dan l-istaġun, it-temperatura trid tinżamm fil-livell ta’ 26.5 grad Celsius. Dan il-proċess ifisser spiża ta’ madwar €600,000 fis-sena. Minkejja dan, il-prezzijiet għall-użu tal-pixxina huma eċċezzjonalment issussidjati.
Is-Segretarju Parlamentari Clyde Puli qal li minħabba li l-Pixxina kienet magħluqa għal dawn l-aħħar ġimgħat, il-Kunsill Malti għall-Isport bi ftehim mal-ASA, kera l-pixxina li tinsab fil-Kumpless Sportiv tal-MFA biex it-tim nazzjonali tal-Waterpolo ikun jista’ jkompli bit-taħriġ tiegħu minħabba impenji internazzjonali li għandu barra minn xtutna fil-jiem li ġejjin.
Other Press Releases:
PR261991
STQARRIJA MILL-MINISTERU GĦALL-AGRIKOLTURA, IS-SAJD U L-PROVVISTA TAL-IKEL ...
PR261990