INDIRIZZ MILL-EĊĊELLENZA TIEGĦU DOTT. GEORGE ABELA, PRESIDENT TA’ MALTA WAQT ĊENA STATALI AD UNUR TAL-EĊĊELLENZA TIEGĦU S-SUR GEORGI PARVANOV, PRESIDENT TAR-REPUBBLIKA TAL-BULGARIJA U S-SINJURA PARVANOVA - IL-PALAZZ IL-BELT VALLETTA - 20 T’OTTUBRU
pr1813
20/10/2009
Sur President u Sinjura Parvanova,
Eċċellenzi,
Mistednin distinti,
| Huwa | ta’ pjaċir kbir għall-mara tiegħi Margaret u għalija li nilqgħu f’Malta lill-President tal-Bulgarija u s-Sinjura Parvanova flimkien mad-delegazzjoni Bulgara għal din iż-Żjara Statali li tirrappreżenta pass ieħor lejn it-tisħiħ tar-relazzjonijiet eċċellenti li jeżistu bejn iż-żewġ pajjiżi Ewropej tagħna. Nittama li tqattgħu żjara pjaċevoli f’Malta fejn idduqu l-ħbiberija u l-ospitalità tagħna u tapprezzaw il-wirt storiku u kulturali ta’ pajjiżna. |
| Malta | appoġġjat bil-qawwa l-adeżjoni tal-Bulgarija fl-Unjoni Ewropea u ser tkompli tappoġġja d-dħul tal-Bulgarija fiż-żona euro u l-kandidatura tagħha għas-sħubija fil-ftehim ta’ Schengen. |
| Bħala | Stati Membri tal-Unjoni Ewropea, ir-relazzjonijiet tagħna llum ma jiżvolġux biss fuq livell ta’ skambji bilaterali u multilaterali, imma anki fl-ambitu tal-Unjoni Ewropea fi spirtu ta’ solidarjetà. Bħala membri ta’ din il-familja Ewropea ta’ nazzjonijiet, għandna l-istess valuri ta’ drittijiet tal-bniedem, demokrazija u s-saltna tad-dritt, kif ukoll paċi u prosperità fost il-ġnus li ispiraw lill-missirijiet fundaturi ta’ din l-Unjoni. |
| Malta u | l-Bulgarija huma impenjati u kommessi biex ikomplu jġibu ‘l quddiem il-proġett Ewropew permezz ta’ djalogu kostruttiv u kooperazzjoni effettiva mhux biss fir-reġjuni rispettivi tagħna, iżda anki lil hinn minnhom. Filwaqt li l-Bulgarija tinsisti fuq l-impenn tagħha għall-paċi u s-sigurtà fil-Balkani u l-integrazzjoni tar-reġjun fl-Ewropa, Malta tkompli taderixxi mal-vokazzjoni Mediterranja tagħha billi taħdem fuq livell Ewropew u Internazzjonali, għall-paċi u s-sigurtà fil-Mediterran. Tul is-snin, Malta ħadet sensiela ta’ inizjattivi li jistgħu jiġu deskritti bħala miżuri biex tisseddaq il-fiduċja biex ikun hemm paċi, stabilità u prosperità fir-reġjun tagħna bħalma ġara fil-każ tal-uffiċċju konġunt li nfetaħ dan l-aħħar bejn il-Kummissjoni Ewropea u l-Lega tal-Istati Għarab. Waqqafna wkoll f’Malta l-Assemblea Parlamentari tal-Mediterran li tospita flimkien għall-ewwel darba il-parlamenti nazzjonali kollha ta’ dawk il-pajjiżi li għandhom ix-xtut tagħhom fil-Mediterran. |
| Għal | Malta, hija importanti l-parteċipazzjoni attiva tagħha fil-politika ta’ viċinat tal-Unjoni Ewropea. Il-paċi u l-prosperità fir-reġjuni ġirien tagħna, fil-Mediterran u fiż-żona tal-Punent tal-Balkani, flimkien mar-relazzjonijiet sodi u stabbli tagħna magħhom, jirrappreżentaw l-interess strateġiku komuni tagħna, kif ukoll sfida kbira għall-Unjoni Ewropea. |
| Malta | temmen li huwa fl-interess tal-Unjoni, hekk kif inhuwa fl-interess tar-reġjun tal-Punent tal-Balkani li titħaffef kemm jista’ jkun l-integrazzjoni ta’ dan ir-reġjun f’Unjoni dinamika, fattur li jkun ta’ għajnuna kbira ħafna biex ikunu konsolidati s-sigurtà u l-istabilità tar-reġjun. F’dan il-kuntest, Malta tilqa’ wkoll il-ftuħ mill-ġdid tan-negozjati għall-adeżjoni tal-Kroazja, għaliex dan huwa fattur sinjifikanti fil-proċess ta’ adeżjoni tal-Kroazja u sinjal ċar lir-reġjun kollu tal-Balkani li jenfasizza l-impenn tal-Unjoni Ewropea biex l-adeżjoni tagħhom fl-Unjoni tkun objettiv li jista’ jintlaħaq. |
| Ninsab | ċert Sur President li int, bħala Ewropew konvint, tittama li tasal il-ġurnata meta t-Trattat ta’ Liżbona jegħleb l-aħħar ostaklu u jiġi ratifikat mill-Istati Membri kollha tal-Unjoni Ewropea minħabba li, aktar dewmien biex ikun ratifikat it-Trattat, jista’ jqanqal sentimenti ta’ inċertezza fost iċ-ċittadini ta’ Stati Membri oħra. |
| Sur | President, |
| Ir-relazzjonijiet bejn Malta u l-Bulgarija huma | eċċellenti u mibnija fuq spirtu ta’ ħbiberija, fiduċja u djalogu politiku. Ninsab sodisfatt ninnota li l-Protokoll ta’ Kooperazzjoni bejn iż-żewġ Ministri tal-Affarijiet Barranin tagħna ser jiżdied mal-lista ta’ ftehimiet bilaterali li huma diġà fis-seħħ. |
| Jiena | fiduċjuż li hemm aktar skop għat-tkabbir tal-kooperazzjoni bilaterali tagħna u ninsab kuntent li oqsma oħrajn qegħdin jiġu esplorati fir-rigward tal-kooperazzjoni fl-oqsma taż-żgħażagħ u l-isports; it-trasport marittimu u l-protezzjoni rispettiva ta’ informazzjoni klassifikata. Ninsab fiduċjuż li n-negozjati li għaddejjin fir-rigward ta’ dawn is-setturi, ikunu konklużi u li l-ftehimiet ikunu ffirmati fil-ġejjieni qrib. |
| Nemmen | ħafna li r-relazzjonijiet bejn il-pajjiżi jkunu ta’ benefiċċju mhux biss għar-relazzjonijiet diplomatiċi imma anki jservu bħala mezz ta’ kuntatti bejn iċ-ċittadini tal-pajjiżi rispettivi. Ikun ta’ benefiċċju li l-kuntatti kulturali u turistiċi bejn Malta u l-Bulgarija jinġiebu aktar ‘il quddiem sabiex iż-żewġ pajjiżi jsiru aktar magħrufa fost iċ-ċittadini tagħna. Il-kultura u l-edukazzjoni jistgħu jġibu l-popli tagħna aktar qrib xulxin. |
| Ninsab | ferħan ninnota li llum, komunità mdaqqsa ta’ aktar minn 300 ċittadin Bulgaru jgħixu u jaħdmu f’Malta. Ħafna minn dawn il-Bulgari integraw tajjeb fis-soċjetà Maltija u qegħdin jagħtu kontribut tajjeb fl-ekonomija Maltija. Iktar studenti Bulgari jistgħu jutilizzaw il-faċilitajiet li toffri Malta biex ikomplu jkattru l-għarfien tagħhom tal-lingwa Ingliża. |
| Filwaqt | li nsemmi l-ekonomija, nagħmel referenza wkoll għall-kummerċ bilaterali fejn inħoss li hemm ħafna fejn intejbu. Nemmen li jistgħu jinstabu modi fejn jikbru l-iskambji kummerċjali għall-benefiċċju tal-ekonomiji tagħna. L-organizzazzjonijiet tagħna għall-promozzjoni tal-kummerċ jistgħu jikkooperaw biex tissaħħaħ il-kooperazzjoni ekonomika bejn iż-żewġ pajjiżi. Negozjanti Maltin u Bulgari jistgħu jieħdu vantaġġ mill-ħiliet reġjonali rispettivi biex jgħinu lil xulxin biex jidħlu għall-proġetti fir-reġjuni tal-Afrika ta’ Fuq u tal-Lvant tal-Ewropa rispettivament. Hemm potenzjal kbir għal inizjattivi bħal dawn li fl-aħħar mill-aħħar jissarrfu f’benefiċċji għaż-żewġ pajjiżi. |
| Illum, | ma jistgħux jissemmew kwistjonijiet ekonomiċi mingħajr ma tissemma l-kriżi ekonomika u finanzjarja. Malta qiegħda ssegwi l-iżviluppi fis-swieq finanzjarji biex tilqa’ għall-effetti negattivi fuq l-istituzzjonijiet finanzjarji tagħna. Għalkemm huwa impossibbli li ma nintlaqtux minn din il-kriżi, irnexxielna negħlbu l-maltemp mingħajr wisq ħsara, grazzi għall-fatt li adottajna l-munita euro u grazzi għal miżuri f’waqthom li ttieħdu mill-Gvern Malti. Filwaqt li swieq finanzjarji jidhru li stabilizzaw irwieħhom u indikaturi riċenti jagħtu lok għall-ottimiżmu li r-riċessjoni qiegħda tbatti, ir-ritorn għal tkabbir sostenibbli għadu ma seħħx. Aktarx li noħorġu minn din il-kriżi f’kuntest ekonomiku u finanzjarju ġdid bi sfidi ġodda quddiemna. B’mod partikolari, jeħtieġ intaffu l-impatt tar-riċessjoni fuq is-swieq tax-xogħol. Huwa hawn li l-Istati Membri tal-Unjoni Ewropea jistgħu jibbenefikaw minn sforzi koordinati bejniethom bil-għan li tinġieb lura l-fiduċja tal-investituri u tinstab strateġija għal tkabbir sostenibbli. L-għażliet li nagħmlu llum, ser jiddeterminaw kif ser naffrontaw l-isfidi ta’ għada. |
| Biex | nikkonkludi, ippermettili Sur President, nifraħlek għall-missjoni nobbli tiegħek lejn l-aktar nies żvantaġġati fis-soċjetà Bulgara. Meta ġejt elett, inti ddikjarajt li ser tkun President “soċjali”. Filwaqt li żammejt l-impenn tiegħek, inti bdejt il-kampanja “Milied Bulgaru” biex jinġabru fondi għall-kura ta’ tfal morda u biex jiġu modernizzati l-isptarijiet u l-istituzzjonijiet tas-saħħa. Il-ħidma tiegħek titkellem waħedha u qiegħda tasal aktar minn kliemek. Nifraħlek għal inizjattiva tant nobbli li bħalha qegħdin inwettqu hawn Malta. |
Mistednin distinti,
Nistedinkom terfgħu t-tazzi tagħkom u tixorbu bis-saħħa tal-Eċċellenza Tiegħu l-President tal-Bulgarija u s-Sinjura Parvanova, tal-ħbiberija u l-kooperazzjoni bejn iż-żewġ pajjiżi u l-popli tagħna.
Stqarrijiet Oħra:
PR261990
STQARRIJA MILL-MINISTERU GĦALL-EDUKAZZJONI U L-ISPORT “L-intelliġenza arti...
PR261989en