Left arrow Mur Lura

DISKORS MILL-ONOR LAWRENCE GONZI, PRIM MINISTRU, FL-OKKAŻJONI TAL-GĦOTI TAL-MALTA GOVERNMENT SCHOLARSHIPS’ SCHEME – POSTGRADUATE SCHEME U L-ISCHOLARSHIPS TAĦT L-ISKEMA STEPS, FIĊ-ĊENTRU TAL-MEDITERRAN GĦALL-KONFERENZI, VALLETTA

pr1735
Date Icon 09/10/2009

Mistednin Distinti,

Studenti,

Ġenituri,

Sinjuri,

Dan tal-lejla hu avveniment importanti.  Avveniment importanti għal kull wieħed u waħda minkom.  Għall-ġenituri tagħkom li stinkaw biex jarawkom timxu ‘l quddiem fl-istudji tagħkom.  Għal familji tagħkom ghaliex l-entużjażmu u s-sagrifiċċji tagħkom u tagħhom qed jissarrfu. 

Imma hu mument importanti wkoll għal pajjiżnagħaliex dan li qegħdin nagħmlu l-lejla hu wkoll it-tweġiba tagħna għall-isfidi kbar li qegħdin niffaċċjaw bħalissa u għall-opportunitajiet li ser ikunu miftuħin għal pajjiżna – u allura għalikom – fix-xhur u s-snin li ġejjin.
Huwa proprju għalhekk li għalija bħala PrimMinistru hu tassew mument ta’ sodisfazzjon li nara tant żgħażagħ b’enerġija lesti li jkomplu javvanzaw ‘il quddiem billi jinvestu fil-ħiliet tagħhom.
Illum qiegħed nara pass ieħor iseħħ fit-triqbiex titwettaq il-viżjoni li jiena għandi għal pajjiżna.
Kien ta’ pjaċir għalija li nisma’ lit-tlietstudenti jaqsmu l-esperjenza tagħhom.  Nixtieq f’isem il-poplu Malti u Għawdxi nifirħilkom tas-suċċess li qed tiksbu u tal-kontribut li qed tagħtu lill-pajjiż.  Bid-diskorsi tagħkom urejtu li l-għoti tal-boroż ta’ studju huma ta’ benefiċċju kbir kemm għalikom kif ukoll għall-pajjiżna.
Meta bħala pajjiż naraw kemm irnexxielnanavvanzaw u niksbu suċċess f’oqsma anke fuq livell reġjonali u Ewropew naraw li l-qofol tal-kisbiet tagħna kien dejjem il-bniedem.

Ksibna għax investejna.

Investejna u għadna ninvestu għax nemmnu fikom.  Nemmnu fit-tfal tagħna sa minn etajiet żgħar.  Nemmnu fiż-żgħażagħ.  Nemmnu f’pajjiżna.

Nemmnu fil-kapaċitajiet u l-ħiliet tal-Malti utal-Għawdxi u intom xhieda ta’ dan il-potenzjal.  Potenzjal li se jkompli jixpruna l-iżvilupp ekonomiku u soċjali ta’ pajjiżna fil-futur, permezz tal-ispeċjalizzazzjoni li se tagħmlu.
F’dinja dejjem aktar globalizzata, kif rajnamatul din l-aħħar sena, se nkunu konfrontati b’numru ta’ sfidi.  Però, kull sfida ġġib opportunità magħha.  Dan iseħħ biss jekk bħala pajjiż nagħrfu dawn l-opportunitajiet u rridu nkunu ppreparati billi kontinwament niżviluppaw il-ħiliet tal-poplu tagħna.
Il-bniedem, permezz tar-riċerka li jagħmel,jista’ jitqies bħala l-ħolqa li tgħaqqad id-dinja tal-edukazzjoni ma’ dik tal-iżvilupp ekonomiku, soċjali, teknoloġiku u ambjentali.  Għalhekk l-investiment fl-edukazzjoni, fir-riċerka u l-innovazzjoni mhux biss investiment fir-riżorsa umana imma hu wkoll investiment fil-potenzjal tal-pajjiż kif qalu tajjeb iż-żgħażagħ qabli.
It-tkomplija u l-estensjoni tal-MaltaGovernment Scholarship Scheme qed tagħti kontribut importanti lill-pajjiżna hekk kif qiegħed jiżdied l-għadd ta’ żgħażagħ Maltin bi kwalifiki għoljin u speċjalizzati.  Din is-sena nedejna l-program STEPS, skema ta għaxar miljun ewro b’ko-finanzjament mill-Unjoni Ewropea.  F’dawn l-erba’ snin il-Gvern se jkun ta 540 borża ta’ studju.  Sa 4 snin ilu ż-żgħażagħ kienu jiddependu biss minn xi scholarship li kien joffri Gvern jew istituzzjoni barranja.  Jew inkella, biex jistudjaw barra, il-ġenituri tagħhom kien ikollhom iħallsu flejjes kbar, li kienu jaqtgħu qalb ħafna.  Għamilna deċiżjoni konxja.  Għamilna deċiżjoni strateġika.  Trid tkun il-politika tagħna, irridu nkunu aħna li nsostnu u ninvestu fiż-żgħażagħ u anki adulti li jkunu jridu jispeċjalizzaw u jirriċerkaw aktar.
Investiment ieħor fl-istudenti ta’ pajjiżna hupermezz tal-istipendji.  Din is-sena 15,000 student u studenta qed igawdu mill-istipendji b’investiment ta’ 21 miljun ewro.  Il-Gvern immexxi minni huwa kommess li jkompli jinvesti fl-istudenti permezz tal-istipendji.
Qed ninvestu fil-livelli kollha tal-edukazzjonif’pajjiżna.  Irridu nkomplu noffru aktar korsijiet lill-istudenti tagħna u niftħulhom aktar opportunitajiet biex jirnexxu.  Minn din is-sena l-MCAST, minbarra li joffri 127 kors differenti full-time u b’għażla vasta ta’ 282 kors part-time, qiegħed joffri numru ta’ degree courses flimkien mal-Istitut prestiġjuż Ġermaniż Fraunhofer-Gesellschaft.  Fl-istess ħin, l-Università ta’ Malta qiegħda toffri aktar minn 900 kors differenti, 16 minnhom korsijiet ġodda li bdew din is-sena.
Biex verament l-istudenti jkollhom l-aħjaredukazzjoni, il-Gvern qiegħed jinvesti fl-ambjent edukattiv f’kull livell.  Matul is-sajf saru xogħlijiet f’63 skola u infetħet l-iskola l-ġdida għat-tfal tal-primarja ġewwa Pembroke.  Fil-livell tal-primarja u s-sekondarja komplejna nintegraw l-ICT u llum hemm aktar minn 9,000 computer fl-iskejjel tagħna.  Qed isir xogħol ta’ estensjoni fil-Junior College biex ikun jista’ jilqa’ aktar studenti.  Fl-Università l-investiment huwa vast u jkopri numru ta’ setturi.  L-iżvilupp tal-fakultà tal-ICT kif ukoll investiment qawwi fil-laboratorji u faċilitajiet għar-riċerka u l-innovazzjoni jlaħħqu mal-50 miljun ewro.
Il-pass li jmiss hu li nħarsu lil hinnmill-istrutturi formali tal-edukazzjoni.  Irridu nsaħħu aktar is-sinerġija bejn l-edukazzjoni formali, l-industrija u l-iżvilupp ta’ pajjiżna.  Ir-riċerka u l-innovazzjoni, kif qalu l-istudenti qabli, huma l-ħolqa ta’ din il-katina.  Huwa ta’ sodisfazzjon kbir għalija bħala Prim Ministru li nisma’ dawn l-istudenti li bir-riċerka tagħhom qed jagħtu kontribut lill-industrija.  Intom miġbura hawn illejla smajtu li bir-riċerka li tkunu qed tagħmlu se tkunu qed tikkontribwixxu lejn aktar investiment f’pajjiżna u aktar ħolqien tax-xogħol.  Il-Kunsill Malti għax-Xjenza u t-Teknoloġija qed jagħti sehem importanti f’dan il-proċess.  Fil-fatt qed jgħin numru ta’ kumpaniji u riċerkaturi biex jikkummerċjalizzaw ir-riċerka u l-proġetti tagħhom. Bħalissa hemm 28 proġett li qed igawdu minn skemi tal-Kunsill u hemm interess minn barra minn Malta għal numru minn dawn il-proġetti.  Proġetti li jwasslu għal ħolqien tax-xogħol, investiment u titjib fil-kwalità tal-ħajja tagħna.
Il-Kordin Business Incubation Centrewkoll hi storja ta’ suċċess b’aktar minn 40 kumpaniji li gawdew mill-għajnuna.  Dan iċ-ċentru jservi ta’ inkubatur għall-ideat biex jitwettqu fin-negozju.  Irridukom tinvestu fl-ideat tagħkom għax intom il-futur ta’ pajjiżna u bl-ideat tagħkom aħna nistgħu nkomplu noħolqu aktar ġid u xogħol.
Qed ninvestu fikom għax nemmnu fil-potenzjal ta’kull wieħed u waħda minkom.  Intom eżempju ħaj ta’ dan il-potenzjal.  Nemmen li intom kollha se tingħataw ħafna opportunitajiet biex turu xi ssarrfu.
Bħala benefiċjarji ta’ dawn il-boroż ta’ studjise tkunu, kif rajtu llejla stess minn sħabkom, role models – protagonisti permezz tal-istudji u r-riċerka tagħkom.  Intom ukoll ir-riżultat tal-edukazzjoni li ngħatajtu tul iż-żmien mill-familjari u l-għalliema tagħkom.
Għalhekk nixtieq nifraħ u nirringrazzja lilkom –il-ġenituri - għax il-kisbiet ta’ dawn l-istudenti ma kinux ikunu possibbli mingħajrkom.
Lil dawk li xtaqu li qegħdin hawn bħalabenefiċjarji imma għal xi raġuni m’humiex inwasslilkom messaġġ ta’ kuraġġ.  Li ppruvajtu diġà turi d-determinazzjoni li tkomplu tistudjaw u tavvanzaw.  Inħeġġiġkom biex ma taqtgħux qalbkom għax il-Gvern kommess li jkompli jżid dawn l-opportunitajiet, b’aktar sejħiet biex jingħataw scholarships oħra.
Lilkom hawn miġbura, filwaqt li nifirħilkomkollha nawguralkom suċċess għal futur tagħkom.

Grazzi.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR INFRASTRUCTURE, PLANNING AND EMPLOYMENT  Over 200 students express their vision of the construction sector through art

PR261989en

PRESS RELEASE BY THE MINISTRY FOR INFRASTRUCTURE, PLANNING AND EMPLOYMENT ...

STQARRIJA MILL-MINISTERU GĦALL-INFRASTRUTTURA, L-IPPJANAR U X-XOGĦOL  Aktar minn 200 student jesprimu l-viżjoni tagħhom dwar is-settur tal-kostruzzjoni permezz tal-arti

PR261989

STQARRIJA MILL-MINISTERU GĦALL-INFRASTRUTTURA, L-IPPJANAR U X-XOGĦOL Aktar...

Aktar Stqarrijiet Right arrow