STQARRIJA MID-DIPARTIMENT GĦAL SAĦĦA AMBJENTALI RIGWARD ĦALIB MANIFATTURAT MILL-MALTA DAIRY PRODUCTS LI QRAS QABEL IŻ-ŻMIEN
B’referenza għal rapporti ppublikati fil-media lokali dwar ħalib manifatturat mill-Malta Dairy Products li qras qabel iż-żmien.
Id-Dipartiment għal Saħħa Ambjentali fi ħdan id-Diviżjoni Regolazzjoni Saħħa Pubblika jixtieq jinforma lill-pubbliku li huwa responsabbli għas-sorveljar tal-ikel fis-suq filwaqt li t-Taqsima ta’ Regolament Veterinarju, Konservazzjoni u Kontroll tas-Sajd huwa responsabbli għall-monitoraġġ għall-impjanti fejn issir produzzjoni ta’ ikel li joriġina mill-annimali.
Bħal ma hija l-prattika normali partikolarment waqt ix-xhur tas-sajf, is-Servizzi tal-Ispettorat tas-Saħħa fi ħdan id-Dipartiment għal Saħħa Ambjentali jwettaq spezzjonijiet fis-suq għall-prodotti tal-ħalib peress li jmorru malajr jekk jinżammu f’temperatura sħuna. Matul din is-sena, l-Ispettorat wettaq 593 spezzjoni għal dan l-iskop ġo ħwienet li jbiegħu bl-imnut u d-distributuri, dwar bejgħ ta’ ħalib li nżamm mhux f’kundizzjoni tajba. B’riżultat għal dan nbdiet azzjoni legali kontra għaxar operaturi. Barra minn dan, ħalib li jinstab li mhux qiegħed f’dawk it-temperaturi rakkomandati jinqered taħt is-superviżjoni tal-Ispettorat tas-Saħħa. Id-Dipartiment għal Saħħa Ambjentali nieda wkoll programm fejn ittieħdu kampjuni ta’ prodotti tal-ħalib u sussegwentement ġew analizzati 33 kampjun ta’ ħalib lokali. L-ebda riżultat ma ta’ indikazzjoni ta’ possibilita’ ta’ kontaminazzjoni ħlief għal kampjun ta’ ħalib xkumat li ttieħed minn ġo ħanut nhar it-Tnejn li għadda u li jġib id-data ta’ Uża Sa il-Ġimgħa 21/08. Dan il-prodott indika li huwa ftit kontaminat bl-Enterobacteriacea. Enterobacteriacea huwa ndikatur tajjeb li juri kontaminazzjoni fl-ikel, liema ikel jkun għadda minn trattament tas-sħana saħansitra wara l-ipproċessar.
Nhar it-tnejn, 17 t’Awwissu, 2009 l-Ispettorat tas-Saħħa rċieva total ta’ sitt ilmenti jallegaw li l-ħalib mixtri fi tmiem il-ġimgħa u li jġib id-dati ta’ 18/08 u 19/08 qras qabel iz-żmien. Dawn l-ilmenti semmew tmint iħwienet f’lokalitajiet differenti madwar Malta, kif ġejjin:
- Tnejn Birkirkara u tnejn miż-Żejtun
- Wieħed mill-Fgura, Isla, San Gwann u Swieqi
Il-lokalitajiet fejn l-ilmenti originaw indikaw distribuzzjoni irregolari u għalhekk dan id-Dipartimenti ma kienx f’pożizzjoni li jidentifika is-sors eżatt. Dan id-Dipartiment informa wkoll b’dak li sab lit-Taqsima ta’ Regolament Veterinarju, Konservazzjoni u Kontroll tas-Sajd bħala l-Awtorita’ Kompetenti tal-faċilita’ tal-produzzjoni. Fit-18 t’Awwissu, 2009 l-Ispettorat eleva wkoll żewġ kampjuni oħra ta’ ħalib mill-faċilita’ tal-Malta Dairy Products li kellhom id-data Uża Sa ta’ 19/08. Iż-żewġ kampjuni indikaw ftit kontaminazzjoni bl-Enterobacteriaceae.
Ir-riżultati tal-kampjuni kollha msemmija hawn fuq u li ġew analizzati fil-laboratorju tad-Dipartiment li huwa laboratorju akkreditat bl-ISO17025 kienu ffinalizzati il-Ġimgħa 21/08.
Id-Dipartiment jenfasizza li l-livelli ta’ Enterobacteriaceae misjuba ma jirrendux l-ikel bħala mhux tajjeb ghall-konsum mill-bniedem. Ir-regolament KE 2073 tal-2005 dwar Kriterji Mikro-bijoloġiċi għall-oġġetti tal-Ikel jirrakomanda li meta l-limiti kif imniżżla bl-istess regolament jiġu maqbuża, il-faċilita’ tal-produzzjoni għandha tiċċekja dwar l-effiċenzja tat-trattament tas-sħana u l-prevenzjoni li ma jerġax jkun hemm kontaminazzjoni kif ukoll il-kwalita’ tal-materja greżża. Hu għal din ir-raġuni li d-Dipartiment jagħmel spezzjonijiet mingħajr avviż sabiex jiżgura li l-cold chain ma tkunx interrotta.
Id-Dipartiment għal Saħħa Ambjentali jieħu din l-opportunita’ sabiex ifakkar lill-bejjiegħa bl-imnut, kif ukoll lill-konsumaturi sabiex jiżguraw li prodotti tal-ħalib jinżammu f’temperatura kiesħa l-ħin kollu.
Stqarrijiet Oħra:
PR261987
STQARRIJA MILL-MINISTERU GĦALL-INKLUŻJONI U L-VOLONTARJAT Imfakkar il-65 a...
PR261986en