Left arrow Go Back

Ministru Libjan għal laqgħa mal-Komunita’ Kummerċjali  Maltija - Appoġġ mill-Kamra tal-Kummerċ għall-Miri Strateġiċi tal-Politika Barranija

PR0608
Date Icon 27/04/2007

Abdel Aziz El Eissawi, il-Ministru Libjan ta’ l-Ekonomija, Kummerċ u Investimenti, laqa’ stedina tal-Ministru għall-Affarijiet Barranin Michael Frendo u mistenni jiġi Malta biex jipparteċipa f’seminar għal negozjanti Maltin li huma mħajjra  jinvestu fil-Libja. 

Dan ħabbru l-Ministru Frendo stess waqt “Business Breakfast” li kellu dal-għodu ma’ membri tal-Kamra tal-Kummerċ. 

Matul din il-laqgħa, l-Ministru spjega l-Miri Strateġiċi tal-Politika Barranija ta’ Malta b’enfasi partikolari fuq il-ħidma tal-Ministeru fir-rigward tal-kummerċ internazzjonali. 

Il-Ministru spjega l-ħtieġa li pajjiżna jieħu l-massimu tal-benefiċċji politiċi u ekonomiċi mir-rilevanza ġeopolitika tiegħu kif ukoll il-bżonn li nagħmlu suċċess mis-sħubija fl-Unjoni Ewropea. Barra minn dan, il-Ministeru jaħdem ukoll biex isaħħaħ ir-relazzjonijiet bilaterali ta’ Malta partikolarment mal-pajjiżi ġirien b’indirizz speċjali fuq it-tisħiħ tad-djalogu, il-paċi u l-istabilita’ u l-prosperita’ fil-Mediterran u l-Lvant Nofsani. 

Malta trid ukoll issaħħaħ ir-relazzjonijiet tagħha ma’ ekonomiji kbar li diġa’ jeżistu kif ukoll  ma’ ekonomiji emerġenti u dan tfittex li tagħmlu wkoll billi timmassimizza l-benefiċċji multi-settorjali permezz tal-qafas internazzjonali ta’ ambaxxati u konsulati mferrxa mad-dinja. 

Il-Ministeru għall-Affarijiet Barranin jaħdem ukoll biex isaħħaħ ir-relazzjonijiet, politiċi u ekonomiċi mal-pajjiżi fejn hemm jgħixu emigranti Maltin. Permezz ta’ ħidma assidwa fil-kamp internazzjonali, Malta tappoġġja inizjattiva maħsuba biex ikun hawn regolamentazzjoni ġusta tal-kummerċ internazzjonali u tħares l-interessi tal-pajjiż fir-rigward ta’ l-isfidi li ġġib magħha l-globalizzazzjoni. 

Il-Ministru Frendo tkellem ukoll dwar il-ħidma li qed jagħmel hu u uffiċċjali tal-Ministeru ta’ l-Affarijiet Barranin biex ikun attirat investiment barrani lejn Malta jew biex Maltin ikunu mħajjra jinvestu  barra.  Dan isir b’diversi modi, fosthom permezz ta’ delegazzjonijiet kummerċjali li l-Ministru stess iniedi barra l-pajjiż, kif ukoll b’negozjati għal Ftehim għal Ħelsien mit-Taxxa Doppja ma’ diversi pajjiżi u b’diversi modi oħra li jiffaċilitaw l-iskambji kummerċjali. 

Min-naħa tiegħu s-Sur Victor Galea, President tal-Kamra tal-Kummerċ, filwaqt li rringrazzja lill-Ministru Frendo ta’ din il-laqgħa, wera l-apprezzament tal-Kamra tal-Kummerċ għall-fatt li l-Ministru ta’ l-Affarijiet Barranin, poġġa fost il-miri strateġiċi tal-ħidma tal-Ministeru tiegħu, enfasi fuq  l-aspett kummerċjali u dak ta’ investiment u esprima l-appoġġ tal-Kamra tal-Kummerċ għal dawn il-miri. 

Hu rrikonoxxa wkoll il-fatt li l-Ministru riċentement ħatar numru ta’ ambaxxaturi li għandhom esperjenza tajba tan-negozju u l-kummerċ. 

Il-President qal li l-istedina tal-Ministru Frendo għal din il-laqgha hi riflessjoni għall-istima li l-Ministru għandu lejn is-settur kummerċjali u l-kontribut li dan is-settur jagħti għat-tisħiħ ta’ l-ekonomija tal-pajjiż. 

Il-President tal-Kamra tal-Kummerċ kellu wkoll kliem pożittiv għall-kollaborazzjoni sħiħa li l-Ministeru ta’ l-Affarijiet Barranin qed jestendi lis-settur kummerċjali, u semma b’mod partikolari d-delegazzjoni kummerċjali li l-Ministru Frendo se jmexxi fiċ-Ċina x-xahar id-dieħel u qal li fost il-komunita’ kummerċjali hemm ħafna nteress f’din iż-żjara. 

F’isem il-Kamra tal-Kummerċ, is-Sur Galea, awgura lill-Ministru Frendo kull suċċess għall-kandidatura tiegħu għall-kariga ta’ Segretarju Ġenerali tal-Commonwealth.

Share this Press Release Icon socials Icon socials Icon socials Icon socials

Other Press Releases:

STQARRIJA MILL-UFFIĊĊJU TAL-PRIM MINISTRU  Il-Prim Ministru Robert Abela jinawgura investiment ta’ €50 miljun f’San Ġiljan

PR261960

STQARRIJA MILL-UFFIĊĊJU TAL-PRIM MINISTRU Il-Prim Ministru Robert Abela ji...

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

More Press Releases Right arrow