Proġetti ta’ tisbiħ fiċ-ċentri ta’ l-irħula mmirati li jsebbħu u jagħtu dehra tal-karaterristiċi ta’ l-irħula antiki mifruxin ma’ pajjiżna
L-arkitettura li nsibu f’kull ċentru tar-raħal antik baqgħet turi u tifforma parti integrali mill-istorja ta’ pajjiżna. Il-proġetti li mbarka fuqhom il-Ministeru għandhom għan ewlieni li ċ-ċentri ta’ l-irħula jingħataw dehra isbaħ b’materjal li jikkumplimenta mar-rikkezza tal-knejjes li huma monumenti storiċi. Dan qalu l-Ministru Ninu Zammit meta kien qed iżur xogħlijiet ta’ tisbiħ li qed isiru fiz-zuntier tal-Knisja ddedikata lil Madonna ta’ Lourdes f’San Ġwann.
Il-proġett taz-zuntier tal-knisja parrokjali ta’ San Gwann għandu l-għan li jinbidel il-madum antik tas-siment. Ħafna minn dan il-madum huwa deterjorat u fil-biċċa l-kbira minnhu mkisser. Għaldaqstant filwaqt li l-madum il-ġdid se jagħti dehra isbaħ li tixraq lill-post se jkun ukoll wiċċ aktar zgur għan-nies li jiffrekwentaw il-post. L-area tal-pavimentar ma tinkludiex biss iz-zuntier iżda tinkludi wkoll il-parti quddiem il-kunvent tal-patrijiet li jinsab mal-ġemb tal-knisja u d-dawra tal-bankina li ddur maz-zuntier. Fil-fatt l-area kollha tal-pavimentar tammonta għal madwar 400 metri kwadri.
Meta kien qed jispjega l-andament tax-xogħlijiet, il-Ministru Zammit qal li wara li nqala l-wiċċ l-antik li kien magħmul minn madum tas-siment, ingħatat sodda tal-konkos fuq bażi soda sabiex ikun assigurat li l-madum li qed jitpoġġa, jitqiegħed fuq sodda sewwa u b’hekk jiġu evitati xi ċaqliq tal-madum fil-futur. Qabel ingħata l-konkos saru l-pajpijiet neċessarji sabiex minn ġo fihom ikunu jistgħu jgħaddu l-wires li se jifforma parti minn sisitema ġdida ta’ dawl arkitettoniku li se jdawwal il-knisja. Fil-fatt din l-installazjoni se tkun tista’ tbiddel id-dehra tal-knisja u se tagħmel iz-zuntier aktar miftuħ peress li se jitneħħew rifletturi li kienu mqiegħda ġo kaxxi tal-ġebel mibnija fuq iz-zuntier.
Id-disinn tal-pavimentar li qed jiġi applikat jirrispetta l-istil arkitettoniku tal-binja tal-knisja u hu magħmul minn margins b’madum tal-granit b’kulur griż u bejniethom qed jitpoġġa madum tal-granit b’kulur aktar ċar. Mal-pavimentar taz-zuntier hemm inkluż ukoll it-tqegħid ta’ turġien ġodda b’materjal tal-granit kif ukoll il-kostruzzjoni ta’ rampa sabiex b’hekk ikun żgurat li l-post ikun aċċessibbli għal kulħadd.
Ix-xogħol kollu qed isir mill-ħaddiema tal-Gvern u beda ħmistax ilu. L-investiment totali fuq dan il-proġett jammonta għal madwar Lm35,000 (€81,528.07) inkluż il-pagi tal-ħaddiema nvoluti. Hu pprogrammat li x-xogħlijiet kollha jintemmu qabel is-Sajf ta’ din is-sena.
Matul iż-żjara tiegħu l-Ministru Ninu Zammit tenna li dan il-proġett hu ngredjent ieħor fit-taħlita ta’ xogħlijiet li l-Ministeru qed iwettaq favur it-tisbiħ ta’ pajjiżna. Hawnhekk il-Ministru rrefera għal bosta xogħlijiet ta’ tisbiħ li qed jitwettqu bħalissa jew li se jibdew aktar tard matul din is-sena. Fost dawn insibu proġetti simili ta’ tisbiħ fiċ-ċentri ta’ l-irħula bħaċ-ċentru tar-raħal tal-Qrendi u d-dawra tal-knisja ta’ San Bastjan f’Ħal-Qormi.
Matul din is-sena ser ikunu mplimentati proġetti oħra fosthom pavimentar mill-ġdid taz-zuntier tal-knisja ddedikata lil San Gorg f’Hal-Qormi, tal-knisja ddedikata lil Santa Marija f’Ħal-Għaxaq, tal-knisja ddedikata lil Santa Marija fl-Imqabba, tal-knisja ddedikata lill-Madonna tal-Grazzja f’Ħaż-Żabbar u dak tal-knisja parrokkjali ta’ Ħal-Balzan.
Lista twila u ambizzjuża ta’ xogħlijiet li b’rieda u impenn mill-Ministeru kollu, mill-kbir sa ż-żgħir tiġi mwettqa b’suċċess kif ġara fl-aħħar erbgħa snin, saħaq il-Ministru. Fl-aħħarnett il-Ministru Zammit irringrazzja lill-kappillan li bil-koperazzjoni tiegħu, dan il-proġett qed jiġi mplimentat.Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959