Left arrow Mur Lura

Investiment ta’ Lm200,000 (€465,874) f’sena għall-bini ta’ toroq residenzjalI f’Ħaż-Żabbar

PR0549
Date Icon 18/04/2007

Il-Gvern s’issa investa mal-Lm200,000 (€465,874) fil-bini ta’ 7 toroq residenzjali f’ Ħaż-Żabbar, li hija l-lokalità li għandha l-akbar numru ta’ toroq ġodda x’jinbnew fost l-47 lokalità li jidhru fil-Programm ta’ Bini ta’ Toroq Residenzjali 2006-2008. 

Waqt żjara li għamel fuq il-lant tax-xogħol illum wara nofsinhar akkumpanjat mis-Sindku ta’ Ħaż-Żabbar, il-Ministru għall-Iżvilupp Urban u Toroq, l-Onor. Jesmond Mugliett qal li Ħaż-Żabbar kien fost il-lokalitajiet li bbenefika l-aktar minn investiment fil-bini ta’ toroq ġodda fl-aħħar sena. 

“Tnejn mill-period contracts li ngħataw fi tmiem is-sena li għaddiet b’valur ta’ madwar Lm60,000 (madwar €140,000) kienu għal xogħolijiet f’Ħaż-Żabbar. Peress li Ħaż-Żabbar hija l-aktar lokalità f’Malta li għandha toroq residenzjali ġodda x’jinbnew, ħassejna l-bżonn li nagħtuha aktar attenzjoni sa’ mill-bidu tat-twettiq tal-Programm tagħna,” qal il-Ministru. 

It-toroq li qed jinbnew permezz taż-żewġ period contracts li ħarġu fis-26 ta’ Diċembru kienu Misraħ Wignacourt, Triq l-Għasel, Triq il-Baħrija, parti minn Triq Bieb is-Sultan u Triq G. Micallef. Malli jitlesta x-xogħol fuq dawn it-toroq ikun jista’ jibda dak fuq Triq Alessio Erardi li kienet inħarġet bħala tender separata is-sena li għaddiet. Ta’ min isemmi wkoll li s-sena l-oħra l-Awtorità dwar it-Trasport ta’ Malta kienet iffinanzjat ukoll il-bini ta’ Triq Patri Taddew Schembri u stormwater culvert bejn Triq l-Iskola u Triq is-Santwarju biex tittaffa l-problema ta’ l-għarar mill-ilma tax-xita.  

Il-valur totali tax-xogħolijiet li saru f’din il-lokalità fl-aħħar tnax -il xahar jaqbeż il-Lm200,000 (€465,874). 

Il-Ministru għall-Iżvilupp Urban u Toroq faħħar lill-kuntrattur li kien qed jaħdem fuq dawn it-toroq talli ser ikun fost l-ewwel li lesta x-xogħolijiet li kellu fil-period contract tiegħu. Dawn it-toroq fil-fatt ser ikunu qed jingħataw it-tarmak sa’ tmiem din il-ġimgħa.    

“Dan il-kuntrattur kien wieħed minn dawk li kienu eleġibbli biex jieħdu wieħed mill-period contracts il-ġodda li ttellgħu bil-polza l-ġimgħa l-oħra. B’hekk ser ikun jista’ jimmobilizza l-ħaddiema tiegħu fuq lant ieħor ftit jiem wara li jlesti x-xogħol tiegħu f’Ħaż-Żabbar. Dan huwa xhieda li s-sistema tal-period contracts mhux biss qed twassal biex ix-xogħol isir sew u fil-ħin, iżda qed isservi ta’ ġid anke għall-kuntratturi li qed jingħataw xogħol b’ritmu kostanti,” qal il-Ministru. 

Hu żied jgħid li l-Awtorità ser tkun qed toħroġ period contracts ġodda fil-jiem li ġejjin hekk kif jitlestew aktar mit-23 kuntratt oriġinali li ħarġu f’Diċembru. Il-kuntratti ġodda ser jinkludu wkoll xogħolijiet ġodda f’Ħaż-Żabbar. 

“Il-Gvern huwa impenjat li jkompli jwettaq il-Programm li għandu għall-bini tal-bqija tat-toroq residenzjali l-oħra li hemm x’jinbnew f’Ħaż-Żabbar biex inwasslu fihom ukoll it-titjib fil-kwalità tal-ħajja ta’ għexieren ta’ familji li joqgħodu fl-inħawi li qed inżuru llum,” temm jgħid il-Ministru għall-Iżvilupp Urban u Toroq.  

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow