IL-PRESIDENT EDDIE FENECH ADAMI PPREŻENTAT BIL-KOPJA TAL-KONVENZJONI TAL-ĠNUS MAGĦQUDA DWAR ID-DRITTIJIET TAL-PERSUNI B’DIŻABILITÀ
Waqt żjara li l-President Eddie Fenech Adami għamel fl-uffiċini tal-Kummissjoni Nazzjonali Persuni b’Diżabilità, huwa ġie ppreżentat b’kopja bil-Malti u bl-Ingliż tal-Konvenzjoni tal-Ġnus Magħquda dwar id-Drittijiet tal-Persuni b’Diżabilità.
Din il-Konvenzjoni ġiet adottata mill-Assemblea Ġenerali tal-Ġnus Magħquda f’Diċembru 2006 u Malta kienet mill-ewwel grupp ta’ pajjiżi li ffirmat din il-Konvenzjoni meta bdiet tiġi ffirmata mill-iStati Membri fl-aħħar ta’ Marzu, 2007. Malta ffirmat ukoll il-Protokoll Mhux Obbligatorju li hemm ma’ din il-Konvenzjoni u li permezz tiegħu ċittadini Maltin jistgħu jitolbu lill-Kumitat dwar il-Persuni b’Diżabilità li se twaqqaf il-Ġnus Magħquda sabiex jagħmel l-investigazzjonijiet tiegħu jekk il-pajjiż ma jsegwiex il-provvedimenti ta’ din il-Konvenzjoni.
Il-preżentazzjoni saret fil-preżenza ta’ l-Onor. Dolores Cristina, Ministru għall-Familja u Solidarjetà Soċjali. Hija rringrazzjat lid-delegazzjoni Maltija li tant ħadmet u tat input siewi fix-xogħol li sar lejn it-tfassil ta’ din il-Konvenzjoni. Il-Ministru għamlet referenza għat-tul ta’ snin li ilu jsir l-iżvilupp fil-kamp tad-diżabilità biex issa wasalna fis-sena 2007 li hija wkoll is-Sena Ewropea għall-Opportunitajiet Indaqs għal Kulħadd. Hija spjegat li f’din is-sena tant speċjali, il-Ministeru għall-Familja u Solidarjetà Soċjali jixtieq itella’ l-Parlament il-Guardianship Act, li fil-fatt diġà qiegħed għand l-Uffiċċju ta’ l-Avukat Ġenerali, u emendi għall-Liġi Opportunitajiet Indaqs (Persuni b’Diżabilità). Il-Ministru Cristina fakkret lil dawk preżenti li aħna għandna dejjem nisimgħu, nitgħallmu u nimplimentaw fejn possibbli s-suġġerimenti tal-persuni b’diżabilità stess. Hija semmiet ukoll avvanzi reċenti li saru fil-kamp tad-diżabilità, bħalma hija l-integrazzjoni taċ-ċentri għal matul il-jum għal persuni b’diżabilità (ATCs) li issa ġew taħt l-Aġenzija Sapport bħala parti mill-viżjoni wiesa tal-Gvern lejn żvilupp aħjar għall-persuni b’diżabilità. Il-Ministru għalqet billi fakkret li issa li Malta kienet minn ta’ l-ewwel li ffirmat din il-Konvenzjoni u l-Protokoll Mhux Obbligatorju jmiss li jsir studju fid-dettal biex naraw x’hemm bżonn li jsir biex dawn l-istrumenti jkunu ratifikati fl-aħjar interess tal-Maltin kollha.
Il-President Eddie Fenech Adami qal li f’Malta saret bidla ta’ kif inħarsu lejn persuni b’diżabilita’. Sfortunatament snin ilu, is-soċjeta’ kienet taħbi lil dawn in-nies iżda bil-mod il-mod aħna sirna iktar konxji ta’ kemm huwa d-dmir tagħna nirikonoxxu d-drittijiet u d-dinjinta’ li għandha tgawdi kull persuna b’diżabilità, bħal kull bniedem ieħor fis-soċjetà. Il-President qal li grazzi għall-entużjażmu u d-dedikazzjoni ta’ bosta nies bħas-Sur Joseph Camilleri u s-Sur Alfred Bezzina wasal biex inħoloq anke f’Malta, qafas legali biex nirrikonoxxu din ir-realtà. Il-President awgura lill-Kummissjoni biex tkompli għaddejja bil-ħidma tant importanti fostna.
Il-Kummissjoni wriet l-apprezzament kbir tagħha li pajjiżna ffirmat din il-Konvenzjoni u dan il-Protokoll. Dan juri b’mod ċar l-impenn qawwi li pajjiżna għandu biex il-persuni b’diżabilità jkollhom garantiti d-drittijiet fundamentali umani kollha u hekk jiġi assigurat li huma jgawdu mill-ogħla kwalità ta’ ħajja possibbli. Il-Kummissjoni tistenna bil-ħerqa li tiġi ratifikata l-Konvenzjoni biex il-provvedimenti kollha meħtieġa jidħlu fis-seħħ.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959