IL-MINISTERU TAL-FINANZI JNIEDI L-ISKEMA TA' REĠISTRAZZJONI TA' FLUS KONTANTI U DEPOŻITI BANKARJI
Bi tħejjija għall-adozzjoni ta’ l-ewro bħala l-munita nazzjonali ta’ Malta, il-Ministeru tal-Finanzi ddeċieda li jniedi l-Iskema ta’ Reġistrazzjoni ta’ Flus Kontanti u Depożiti Bankarji. L-iskop ta’ din l-Iskema hi li tipprovdi lill-individwi residenti f’Malta b’opportunità ta’ darba biex jirregolarizzaw il-pożizzjoni tagħhom fir-rigward tal-pussess ta’ assi eliġibbli f’dawk il-każijiet fejn id-dħul tagħhom ma kienx iddikjarat għall-fini ta’ l-Att tat-Taxxa fuq id-Dħul. Din l-Iskema għandha wkoll l-għan li tħeġġeġ ritorn gradwali u organizzat ta’ flus kontanti moħbija u mhux iddikjarati u biex tkun iffaċilitata l-integrazzjoni tagħhom fl-ekonomija formali permezz tas-sistema finanzjarja.
Din l-iskema ta’ Reġistrazzjoni se tidħol fis-seħħ fit-23 ta’ April 2007 u se tintemm fil-31 ta’ Lulju 2007. L-assi eliġibbli li jistgħu jkunu reġistrati taħt din l-Iskema huma karti tal-flus denominati fil-Lira Maltija u fl-ewro, u depożiti fil-Lira Maltija u fl-ewro miżmuma f’banek lokali fejn dawn l-assi jirrappreżentaw dħul li ma kienx iddikjarat għall-fini ta’ l-Att tat-Taxxa fuq id-Dħul.
Biex wieħed jibbenefika minn din l-Iskema, dawn l-assi eliġibbli għandhom jiġu reġistrati bl-użu ta’ formola speċifika ma’ aġenti ta’ reġistrazzjoni appuntati mill-Bank Ċentrali ta’ Malta (li għandhom ikunu banek kummerċjali, stockbrokers u intermedjarji finanzjarji awtorizzati oħra). Ir-reġistrazzjoni hija protetta b’kunfidenzjalita’ u l-Aġenti Maħtura ta’ Reġistrazzjoni kollha u l-Bank Ċentrali huma marbuta bis-segretezza professionali.
Għar-reġistrazzoni ta’ depożiti bankarji fil-Lira Maltija u/jew fl-ewro li jirrappreżentaw dħul mhux iddikjarat, l-applikant għandu jissottometti evidenza permezz tad-dokumenti oriġinali li jikkonfermaw li huwa l-proprjetarju benefiċjarju ta’ tali assi reġistrati fis-16 ta’ April 2007. Għar-reġistrazzjoni ta’ karti tal-flus tal-Lira Maltija u l-ewro miksuba minn dħul mhux iddikjarat, tali karti tal-flus iridu jiġu depożitati fil-banek lokali f’kont ta’ depożitu speċjali għal terminu fiss għal perjodu ta’ sena mingħajr imgħax.
Ir-reġistrazzjoni ta’ karti tal-flus tal-Lira Maltija u l-ewro hi suġġetta għall-ħlas ta’ darba ta’ 4% ta’ l-ammont reġistrat filwaqt li r-reġistrazzjoni ta’ depożiti fil-lira Maltija u/jew l-ewro mal-banek lokali hi suġġetta għal ħlas ta’ 6%.
Permezz tar-reġistrazzjoni f’din l-Iskema, il-proprjetarju benefiċjarju ta’ l-assi reġistrati se jkun eżentat minn azzjoni retrospettiva mill-Gvern fil-konfront ta’ dħul mhux iddikjarat rappreżentat minn tali assi f’termini ta’ l-Att dwar it-Taxxa tad-Dħul. L-applikanti għandhom jiffirmaw dikjarazzjoni li l-assi reġistrati ma jirrappreżentawx dħul minn attivitajiet ta’ ħasil ta’ flus jew minn xi attività kriminali oħra ħlief ksur ta’ l-Att dwar it-Taxxa tad-Dħul. Is-sottomissjoni ta’ informazzjoni falza se tirrendi r-reġistrazzjoni bħala nulla u jkunu jistgħu jittieħdu passi legali kontra l-applikant. L-Iskema ma teżenta lill-ebda persuna milli tikkonforma mal-ħtiġijiet ta’ l-Att dwar il-Prevenzjoni tal-Ħasil ta’ Flus u regoli marbuta magħha.
Aktar informazzjoni dwar l-Iskema tista’ tinkiseb mill-banek, minn stockbrokers u minn intermedjarji finanzjarji awtorizzati oħra kif ukoll mill-Bank Ċentrali ta’ Malta.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959