Left arrow Mur Lura

AKTAR MINN 90% TAL-BINI Fl-ISPTAR MATER DEI GĦADDA F’IDEJN IL-GVERN

PR0531
Date Icon 14/04/2007

F’diskors li għamel dalgħodu waqt ċerimonja ta’ għoti ta’ premjijiet għall-kompetizzjoni ta’ l-arti tat-tfal organizzata minn Sptar Mater Dei, is-Segretarju Parlamentari Tonio Fenech ħabbar li hekk kif fadal madwar xahrejn u nofs għat-tlestija tal-proġett, aktar minn 90% tal-bini f’Mater Dei għadda minn idejn il-kuntrattur ewlieni, Skanska Malta JV, għal għand il-Fondazzjoni għas-Servizzi Mediċi. Dan ifisser li dawn iż-żoni huma lesti mix-xogħol ta’ kostruzzjoni u finishes, servizzi u sistemi ta’ inġinerija. B’hekk, il-Fondazzjoni għas-Servizzi Mediċi ħadet ir-responsabbilta’ ta’ dawn iż-żoni biex kuntratturi oħrajn ewlenin, INSO għall-apparat mediku u Frezza għall-għamara, ikunu jistgħu jkomplu bl-aħħar fażi tax-xogħol tagħhom. 

Is-Segretarju Parlamentari qal li l-ġimgħa li għaddiet, il-Fondazzjoni għas-Servizzi Mediċi ħadet ir-responsabbilta’ tal-kappella ewlenija fl-Isptar, il-blokk tan-nofs li fih hemm auditorium ta’ 300 persuna, 6 seminar rooms u chaplain’s quarters. Ġew trasferiti wkoll l-istaff restaurant, l-istaff quarters, il-bank tad-demm u diversi żoni oħra. 

L-Onorevoli Fenech, li jmexxi il-Mater Dei Steering Committee, ħabbar ukoll li d-Dipartiment tar-Radjoloġija se jkun lest minn kollox sa’ l-aħħar tax-xahar. Bħalissa għaddejja l-installazzjoni ta’ l-aħħar biċċa apparat (mammography) li jonqos qabel il-proċess ta’ migrazzjoni. Ġie deċiż li l-makna ta’ l-MRI ta’ Sptar San Luqa tiċċaqlaq għal Mater Dei wara li jintemm il-proċess ta’ migrazzjoni. Din il-makna kienet inxtrat apposta bil-ħsieb li tiċċaqlaq għal Sptar Mater Dei. Għaddej ukoll il-proċess ta’ taħriġ ta’ l-istaff ta’ dan id-dipartiment peress li d-dipartiment se jopera b’mod kompletament ġdid għal kif jopera llum f’San Luqa. F’Mater Dei, id-dipartiment tar-radjoloġija jaħdem kompletament fuq sistemi diġitali.  

Is-Segretarju Parlamentari qal li l-installazzjoni ta’ l-apparat mediku daħlet fl-aħħar fażi fejn l-istaff diġa’ beda jingħata taħriġ fuq l-apparat mediku waqt li għaddej ukoll il-proċess ta’ testijiet li jwasslu biex il-klijent jiċċertifika li l-apparat qed jaħdem kif suppost u kif intalab fid-dokumenti tat-tender. 

F’dak li għandu x’jaqsam ma’ installazjoni ta’ għamara, 3 mill-erbgħa blokok fejn hemm swali tal-pazjenti, tlestew mill-proċess kollu ta’ installazzjoni, testing u commissioning.

L-Onorevoli Fenech qal li Sptar Mater Dei huwa villaġġ mediku ta’ eċċellenza mgħammar b’teknologija state of the art, li jopera b’metodi ta’ management modern u livelli għolja ta’ effiċjenza. B’hekk jitnaqqas il-piż ta’ xogħol amministrattiv u anċillari minn fuq l-istaff u tingħata iktar attenzjoni lill-pazjent waqt il-proċess ta’ fejqan.

Is-Segretarju Parlamentari qal li d-data ta’ l-1 ta’ Lulju 2007 se timmarka bidu ta’ era ġdida fl-għoti tas-servizzi tal-kura tas-saħħa f’pajjiżna. “Mater Dei se jfisser qabża fil-kwalita’ u titjib li se jgawdi minnhom kulħadd: ambjent tax-xogħol komdu u modern għall-istaff, aktar privatezza u attenzjoni għall-pazjenti u servizzi pubbliċi estensivi għall-viżitaturi” qal l-Onorevoli Fenech.

Is-Segretarju Parlamentari Fenech kompla li dak li sa’ ftit ilu kien ġebel u konkos mikxuf, illum huwa bini mill-isbaħ li se jilqa’ fih sptar state of the art li se jaqdi l-bżonnijiet tal-kura tas-saħħa tal-poplu Malti u Għawdxi fis-seklu 21. 

Fiċ-ċerimonja tkellem ukoll il-President Emeritus Dr Ugo Mifsud Bonnici bħala c-Chairman tal-Mater Dei Hospital Healing Arts Committee u l-Kap Eżekuttiv ta’ Sptar Mater Dei Ms. Marion Rizzo.  

Għall-kompetizzjoni daħlu ‘il fuq minn 1,200 biċċa arti minn mijiet ta’ tfal ta’ l-iskola bejn l-etajiet ta’ 5 u 13-il sena. Kien hemm żewġ kategoriji maqsuma bejn il-5 u 8 snin u 9 u 13-il sena. It-temi magħżula kienu l-kampanja, l-baħar, il-fjuri u l-belt jew raħal fejn joqogħdu l-parteċipanti. 

L-Onorevoli Fenech irringrazzja lill-President Emeritus Dr Ugo Mifsud Bonnici bħala Chairman tal-Kumitat li jikkordina l-arti f’Mater Dei kif ukoll lill-membri kollha tal-Kumitat, kapijiet ta’ l-iskejjel li pparteċipew u lit-tfal kollha li ħadu sehem fil-kompetizzjoni. 

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow