Il-qniepen ta’ l-Arloġġ taċ-Ċittadella f’Għawdex ser jisktu ... għar-restawr
Il-qniepen ta’ l-arloġġ taċ-Ċittadella f’Għawdex, li ilhom idoqqu l-ħin fil-pożizzjoni preżenti tagħhom sa mill-1858, ser ikunu siekta għal ftit żmien sakemm jittieħdu għar-restawr. Ix-xogħol ġie kummissjonat mill-Ministeru għal Għawdex bħala parti mix-xogħol ta’ restawr li qiegħed isir fiċ-Ċittadella.
Skond riċerka dettaljata li saret jirriżulta li l-eqdem waħda miż-żewġ qniepen hija dik li fuqha jindaqqu l-kwarti. Attribwita lill-aħwa Luca u Mederico Menville, fondituri tal-Ferreria ta’ l-Ordni ta’ San Ġwann, bejn l-1697 u l-ewwel snin tas-seklu tmintax. Probabilment, din il-qanpiena kienet imdendla iktar kmieni fuq l-arloġġ il-qadim li jinsab fil-Pjazza tal-Katidral.
Il-qanpiena li fuqha jindaqqu s-siegħat iġġib id-data 1819 u hija attribwita lill-fonditur Ferdinando Leotta li flimkien ma’ ħuh Sebastiano ħadmu bħala fondituri tal-qniepen f’Għajn Dwieli wara li l-Ferreria ta’ l-Ordni kienet ġiet magħluqa wara li l-Ordni tkeċċiet minn Malta mill-Franċiżi.
Ir-restawr fuq dawn il-qniepen ser isir mill-kampanoloġista Kenneth Cauchi li għamel xogħol simili fuq għadd ta’ qniepen storiċi f’Malta, inklużi dawk tal-Kattidral ta’ l-Imdina, tal-Kon-Kattidral ta’ San Ġwann fil-Belt u dawk tal-Kattidral ta’ Għawdex fiċ-Ċittadella.
Qanpiena oħra ta’ qies iżgħar, li qabel kienet ta’ l-isptar ta’ l-Ordni fir-Rabat Għawdex u li dan l-aħħar kienet tinsab fl-Isptar Ġenerali ta’ Għawdex ukoll ser tiġi restawrata. Din kienet magħmula fil-Ferreria ta’ l-Ordni u probabilment saret fl-aħħar snin tas-seklu sbatax.
Waqt li l-qniepen ikunu qed jiġu restawrati, impjegati tad-Dipartiment tal-Proġetti u Żvilupp fi ħdan il-Ministeru għal Għawdex ser iwettqu xogħol urġenti ta’ manutenzjoni fuq il-bejt tat-torri tal-Arloġġ kif ukoll fil-mekkaniżmu li jżomm il-ħin u jdoqq il-kwarti u s-siegħat.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959