Left arrow Mur Lura

Jitlesta x-xogħol fuq il-bypass ta’ l-imtarfa

PR0470
Date Icon 30/03/2007

Il-bypass ta’ l-Imtarfa ser tinfetaħ kollha kemm hi għat-traffiku fi ftit jiem oħra, hekk kif illum beda jingħata l-aħħar saff ta’ asfalt fuq il-karreġġjata li tieħu lejn in-Nigret. 

Waqt żjara li għamel fuq il-lant tax-xogħol dal-għodu, il-Ministru għall-Iżvilupp Urban u Toroq, l-Onor. Jesmond Mugliett qal li bit-tlestija ta’ din l-aħħar fażi tax-xogħlijiet ser ikun qed jinġieb fi tmiemu proġett infrastrutturali kkumplikat. 

“Din it-triq hija waħda minn dawk li nbniet fuq it-tafal fis-snin 80. Għalkemm mhux impossibbli li tinbena triq fuq dan it-tip ta’ materjal, trid tieħu bosta miżuri biex l-istruttura tat-triq ma ċċedix. Ebda waħda minn dawn il-miżuri ma ttieħdu meta kienu qed jinbnew toroq bħall-Bypass ta’ San Pawl il-Baħar u propju l-Bypass ta’ l-Imtarfa aktar minn għoxrin sena ilu.” qal il-Ministru Mugliett. 

Hu spjega li b’konsegwenza t’hekk din it-triq bdiet iċċedi ftit snin wara li nfetħet. L-istat tagħha tant iddeterjora li kienet saħansitra saret tippreżenta periklu għal min jużaha u kellha tingħalaq biex tinbena mill-ġdid. 

“Ir-rikostruzzjoni ta’ din it-triq arterjali kien jippreżenta bosta sfidi li n-Network Infrastructure Directorate qatt ma kien iltaqa’ magħhom. L-isfida ewlenija kienet il-bini ta’ retaining wall għoli fuq il-wied biex iżomm lit-triq milli ċċedi għal isfel. Dan il-ħajt, li f’ċertu partijiet huwa għoli ma’ l-10 sulari, huwa l-akbar retainingwall li qatt bniet l-Awtorità dwar it-Trasport ta’ Malta,” qal il-Ministru għall-Iżvilupp Urban u Toroq. 

Il-Bypass ġiet mgħammra wkoll b’kanali biex l-ilma tax-xita jinġabar u ma ssirx ħsara lill-pedamenti tat-triq. Ġie mgħoddi wkoll main tad-drenaġġ u main ta’ l-ilma ġdid, filwaqt li nbnew bankini ġodda. Ix-xogħlijiet kollha fuq din it-triq ta’ 1.3 kilometri ser ikunu swew madwar Lm1.2 miljuni (madwar €2.8 miljuni). Din ir-rata ta’ nfiq titqabbel sew ma’ dik ta’ proġetti ta’ toroq simili, minkejja li r-retaining wall tagħha sewa aktar min-nofs ta’ l-investiment totali. 

Il-bypass ta’ l-Imtarfa tmiss mas-16.5 kilometri ta’ toroq li nbnew bil-fondi tal-Ħames Protokoll Taljan. Il-poplu Malti b’hekk issa jista’ jsuq minn Birżebbuġa sar-Rabat fuq toroq ta’ l-ogħla livell. It-tlestija ta’ din it-triq tfisser ukoll li mas-26% tat-toroq arterjali u distributorji f’Malta nbnew mill-ġdid mis-sena 2000 ’l hawn. 

Il-Ministru Mugliett qal li l-ftuħ mill-ġdid ta’ din it-triq ser iwassal għal titjib immedjat fil-kwalità tal-ħajja tar-Rabtin, peress li t-traffiku dirett lejn il-Baħrija, Ħad-Dingli u parti mir-Rabat stess ser ikun jista’ jgħaddi minn din il-bypass minn flok jgħaddi mit-telgħa tas-Saqqajja u ċ-ċentru tar-Rabat.  

“Il-Gvern qed jaħdem ukoll fl-Imtarfa nnifsha bil-bini mill-ġdid ta’ Triq l-Imtarfa, li hija it-triq ewlenija li tintuża mill-vetturi li jkunu ħerġin minn dan ir-raħal. Ix-xogħol fuq din it-triq residenzjali ser jiġi jiswa ftit aktar minn Lm60,000 (€139,762),” qal il-Ministru Mugliett. 

Triq l-Imtarfa hija l-unika triq residenzjali li għad fadal x’tinbena mill-Gvern Ċentrali. Bit-tlestija ta’ din it-triq, l-Imtarfa tingħaqad ma’ dawk il-lokalitajiet li m’għandhomx aktar toroq residenzjali x’jinbnew. 

“Ix-xogħlijiet ta’ toroq li wettaqna fil-punent ta’ Malta huma ċertifikat ta’ l-impenn tal-Gvern li jtejjeb in-network ta’ toroq ta’ pajjiżna b’mod ħolistiku,” temm jgħid il-Ministru għall-Iżvilupp Urban u Toroq.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow