Left arrow Go Back

MaltA TIffirma L-KONVENZJONI DWAR ID-DRITTIJIET TA’ PERSUNI B’ DIŻABILITÀ MA’ L-EWWEL PAJJIŻI

PR0469
Date Icon 30/03/2007

Illum, Malta kienet fost l-ewwel pajjiżi li ffirmat il-Konvenzjoni tan-Nazzjonijiet Uniti dwar id-Drittijiet ta’ Persuni b’Diżabilità u l-Protokoll li hemm magħha. Din il-Konvenzjoni nfetħet għall-firem mill-Istati Membri llum stess. Malta, permezz tal-Kummissjoni Nazzjonali Persuni b’Dizabilità hadet sehem attiv fit-tfassil ta’ din il-Konvenzjoni.

L-għan tal-Konvenzjoni hu li tippromwovi, tħares u tassikura li persuni b’diżabilità jgawdu d-drittijiet kollha tagħhom b’mod sħiħ u titkellem dwar oqsma differenti bħalma huma l-aċċessibilità, is-saħħa, l-edukazzjoni, ix-xogħol, id-divertiment, l-abilitazzjoni u riabilitazzjoni, il-parteċipazzjoni fil-ħajja politika, l-ugwaljanza u l-projbizzjoni ta’ diskriminazzjoni minħabba d-dizabilità. 

Il-Konvenzjoni tħares lejn id-diżabilità mil-lenti tad-drittijiet umani u tirrikonoxxi li l-ostakali maħluqa mis-Socjetà stess u l-preġudizzji huma fihom infushom sors ta’ diżabilità. 

Fil-waqt li tipprojbixxi kull forma ta’ diskriminazzjoni kontra persuni minhabba d-diżabilità tagħhom, huwa ttamat li din il-Konvenzjoni sservi ta’ strument li jwassal sabiex dawn il-persuni jgawdu b’mod sħiħ id-drittijiet tagħhom anke fl-oqsma tal-parteċipazzjoni fil-ħajja pubblika u soċjali. 

Protokoll anness ma’ din il-Konvenzjoni u li Malta ffirmat ukoll jipprovdi għall-ħolqien ta’ Kumitat għad-Drittijiet ta’ Persuni b’Diżabilità li jkun kompost minn 12-il espert, li jikber sa 18-il membru meta n-numru ta’ pajjiżi li jirratifikaw il-Konvenzjoni jiżdiedu b’60 pajjiż ieħor. Dan il-Kumitat ikun jista’ jirċievi petizzjonijiet minn individwi jew gruppi, li ma jsibux rimedju għall-ilmenti tagħhom wara li jkunu rrikorrew għar-riżorsi proċedurali ta’ pajjiżhom stess. Il-pajjiżi firmatarji tal-Konvenzjoni għandhom jirrapurtaw lill-Kumitat dwar il-progress li jkun sar fl-implimentazzjoni tal-provvedimenti tagħha u fejn isib li ma jkunx sar progress biżżejjed, dan jagħmel rakkomandazzjonijiet li jidhirlu xierqa. 

Fil-waqt li ffirmat din il-Konvenzjoni, Malta ppreżentat nota ta’ interpretazzjoni. F’din in-nota, pajjiżna jistqarr li jifhem li l-frażi ‘saħħa sesswali u riproduttiva’ fl-Artiklu 25(a) tal-Konvenzjoni ma tikkostitwix rikonoxximent ta’ dritt għall-abort. Malta temmen li l-persuni b’dizabilità huma fost l-aktar nies vulnerabbli għall-abort minhabba l-prattika komuni li tarbija f’ġuf ommha b’difett tiġi abortita. 

Saret ukoll riserva oħra fuq partijiet minn Artiklu 29 tal-Konvenzjoni, li jitkellem dwar id-dritt tal-vot. Hawnhekk Malta qed tgħid li “filwaqt li l-Gvern Malti hu kommess biex jassigura li persuni b’diżabilità jipparteċipaw b’mod sħiħ u effettiv fil-ħajja politika u pubblika, inkluż id-dritt li jivvutaw b’vot sigriet fl-elezzjonijiet u r-referenda u li jikkontestaw l-elezzjonijiet, tirriserva d-dritt li tibqa’ tapplika l-liġi elettorali attwali f’dawk li huma proċeduri tal-votazzjoni, il-faċilitajiet u l-assistenza.” 

F’dan il-kuntest, fil-waqt li Kostituzzjoni ta’ Malta (artiklu 56, 10 (b)) tipprovdi għall-ħarsien tad-drittijiet tal-persuni b’diżabilità fil-kaz ta’ votazzjoni assistita, il-Gvern jawgura li l-Kummissjoni Elettorali tipproċedi fuq it-talbiet tal-persuni b’diżabilità u l-partiti politiċi f’dan il-qasam. 

Wara l-iffirmar tal-Konvenzjoni llum, imiss li jsir studju dwar x’jeħtieġ isir fid-dettal biex Malta tkun konformi kompletament ma’ din il-Konvenzjoni. Wara dan, Malta tagħti l-pass li jmiss, jiġifieri r-ratifika ta’ din il-Konvenzjoni. Ix-xewqa tal-Gvern Malti hija li mar-ratifika tal-Konvenzjoni, ir-riserva fuq Artiklu 29 tal-Konvenzjoni titneħħa għal kollox.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow