ESIBIZZJONIJIET DWAR IL-ĠIMGĦA MQADDSA FIR-RESIDENZA TA’ L-ANZJANI SAN VINCENZ DE PAUL
L-Onor. Louis Deguara, Ministru tas-Saħħa, Anzjani u Kura fil-Komunita’ flimkien ma’ l-Onor. Helen D’Amato, Segretarju Parlamentari għall-Anzjani u Kura fil-Komunita’, inawguraw tmien esibizzjonijet fid-diversi swali tar-residenza San Vincenz De Paul.
L-esibizzjonijet jikkonsistu f’Wirja ta’ L-Ort tal-Getsemani Life Size maħdum minn żewġ impjegati ta’ din ir-residenza, Ráphael Ronayne u Joe Ellul; Wirja ta’ Ċenaklu Life Size, xogħol l-istatwarju Michael Bonnici, vara xbieha ta’ Ġesù Redentur, diversi Mwejjed ta’ l-Appostli fuq stil Lhudi u sett vari zgħar tal-Via Sagra. Ma jonqsux ix-xogħlijiet artistici tal-melħ u smid, xogħlijiet sinonimi ma’ dan iz-zmien tas-sena, li ġew maħduma apposta mill-impjegati ta’ din ir-residenza. Din is-sena għal ewwel darba qed tittella’ wkoll wirja ta’ vari u aċċessorji kompluti ta’ purċisjoni tal-Ġimgħa l-Kbira maħduma kollha mis-Sur Rene Sacco, qarib ta’ wieħed mill-anzjani residenti f’San Vinċenz.
Il-Ministru Louis Deguara qal li huwa xieraq li kemm-il darba r-residenti ma jkunux jistgħu jittieħdu biex igawdu l-festi tal-Ġimgħa l-Kbira, jittieħdu inizjattivi bħal dawn biex ir-residenti jgħixu wkoll l-ispirtu ta’ dawn il-festi. Dan jgħinhom biex iħossuhom parteċipi fl-attivitajiet reliġjużi li jkunu organizzati fil-komunità. Ma rridux ninsew ukoll li bosta anzjani huma mgħaġunin b’valuri nsara u allura japprezzaw ferm dawn it-tip ta’ attivitajiet.
Il-Ministru faħħar l-impenn ta’ l-impjegati tar-Residenza ta’ San Vincenz talli volontarjament jieħdu inizjattivi simili, ħafna drabi b’sagrifiċċju personali biex jaraw l-anzjani kuntenti. Minn dawn l-attivitajiet wieħed jifhem li f’din ir-Residenza ma hemmx il-pazjent fuq naħa u l-impjegati fuq in-naħa l-oħra, imma għandek familja waħda fejn kulħadd b’mod partikulari il-ħaddiema, jagħmlu dak kollu possibbli biex l-anzjani jkollhom ħajja mimlija b’esperjenzi li jgħinuhom jgħixu ħajjithom kemm hu possibbli b’mod sħiħ.
Minn naħa tagħha l-Onor. D’Amato ukoll faħħret l-impenn u l-inizjattiva tal-ħaddiema ta’ din ir-residenza li b’dedikazzjoni kbira jagħmlu ħilithom sabiex jipprovdu lill-anzjani ta’ din ir-residenza ambjent xieraq għal dan iz-zmien skond iż-żmien tas-sena.
Hija qalet li għalkemm il-prijorita’ tal-ħidma tagħna hi li tingħata l-aqwa kura lill-anzjani tagħna, irridu wkoll nassiguraw li r-residenti jkomplu jgawdu l-ħajja spiritwali u socjali anke f’dan iz-zmien tant emottiv, zmien ferm sinifikanti għal dawk kollha li jħaddnu t-twemmin Nisrani.
Hija fakkret li huma diversi l-attivitajiet li ser jittellgħu f’din ir-residenza f’dawn il-Jiem. Fost dawn insibu l-eżerċizzi tar-Randan, l-purċissjoni tar-Redentur li saret nhar il-Ħadd, iċ-Ċerimonja tal-Ħasil tar-Riġlejn, li ser issir nhar Ħamis ix-Xirka, it-tqassim tal-figolli, u l-festa ta’ l-Irxoxt nhar l-Għid il-Kbir u l-festa ta’ San Girgor.
Hija ħeġġet lill-anzjani u l-familjari tagħhom kif ukoll lill-pubbliku in ġenerali biex jiġu jżuru dawn il-wirjiet, b’hekk ikunu apprezzati l-ħiliet artistiċi tal-ħaddiema li taw is-sehem sħieħ tagħhom biex jittellgħu dawn il-wirjiet.
L-Onor. D’Amato irringrazjat lil kull min ta s-sehem tiegħu, inklużi l-anzjani u l-qraba tagħhom, li f’dawn il-ġranet ikunu qed jaqsmu l-abitazzjoni tagħhom ma tant nies li jiġu jżuru l-wirjiet. Hija ħeġġithom ukoll sabiex jipparteċipaw bis-sħieħ fl-attivitajiet kollha li se jkunu organizzati. .
Dawn il-wirjiet ser ikunu miftuħa għall-pubbliku minn għada sa nhar Ħadd il-Għid bejn id-9.30 a.m. u n-12.30 a.m., u mit-3.00 p.m. sad-9.00 p.m.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959