Left arrow Mur Lura

“Biex nirbħu fil-kompetittivita’ rridu nitgħaLlmu nkunu pro-attivi” – IS-Segretarju Parlamentari Edwin Vassallo

PR0442
Date Icon 27/03/2007

“Kull persuna li taħseb li trid tidħol fin-negozju trid taħseb l-ewwel u qabel kollox kif tista’ tkun ta’ servizz.  Persuna li tiftaħ negozju bl-unika għan li tagħmel il-flus, mhux ser tagħti servizz ta’ valur.  Għalhekk hemm bżonn li nagħtu importanza lill-aspetti kollha tan-negozju.”  Is-Segretarju Parlamentari għan-Negozji Żgħar u s-Self Employed, Edwin Vassallo kien qiegħed jitkellem fil-ftuħ ta’ djalogu pubbliku dwar il-kompetittivita’.  Dan id-djalogu sar fil-kampus ta’ l-Universita’ ta’ Malta u kien organizzat mis-Segretarjat Parlamentari flimkien mad-Dipartiment ta’ l-Ekonomija fi ħdan il-FEMA. 

F’dan id-djalogu ppartecipaw ukoll il-Prof. Lino Briguglio mid-Dipartiment ta’ l-Ekonomija, Brian Camilleri mill-Bord tat-Tenants Association tal-Mosta Technopark, kif ukoll rappreżentanti minn numru ta’ entitajiet, fosthom is-Small Enterprise Directorate fi ħdan il-Malta Enterprise, id-Diviżjoni għall-Kummerċ, l-ETC, u l-BOV, flimkien ma’  rappreżentanti minn għaqdiet ta’ l-istudenti, bħalma huma Young Enterprise, AIESEC u SIFE. 

It-tema tad-djalogu kienet il-kompetittivita’, u ġie diskuss kif l-istudenti għandhom jippreparaw lilhom infushom għad-dinja tax-xogħol, li ma tfissirx bil-fors li wieħed isib impjieg ma’ negozju, iżda tista’ tfisser ukoll li jkunu self-employed.  Is-Segretarju Parlamentari Edwin Vassallo spjega li llum m’għadux daqshekk komuni li wieħed isib xogħol u ma jibdlux sakemm jirtira.  L-Onor. Vassallo qal li “kull entita’ tgħaddi minn proċess ta’ bidla, u l-istess jiġri fid-dinja tax-xogħol.  Negozju li jiftaħ illum mhux bilfors li ser jibqa’ l-istess negozju, u jbiegħ l-istess affarijiet, għal 40 sena. 

“Kumpaniji ta’ suċċess kontinwament jagħmlu r-riċerka u l-innovazzjoni tagħhom u hemm bżonn li aħna lkoll nagħmlu dan fix-xogħol tagħna llum.  Hija realta’ li l-kompetizzjoni żdiedet, iżda ma rridux nibżgħu minnha.  Hi l-kompetizzjoni li tgħolli l-livell ta’ kwalita’, kemm fin-negojzu, kif ukoll fl-universita’.  Il-kompetizzjoni ma toħloqx l-inċertezza.  Irridu nitgħallmu nkunu kreattivi biex nirbħu fil-kompetizzjoni.” 

L-Onor. Vassallo għamel sejħa lill-istudenti u qal “tridu tippreparaw lilkom infuskom biex tirbħu fil-kompetizzjoni, u tridu taraw kif ser tiżviluppaw il-ħiliet tagħkom f’ekonomija bbażata fuq l-għerf (knowledge-based economy).  Biex l-ekonomija ta’ Malta tikber, kull wieħed minna jrid iżid il-valur miżjud (value added) tiegħu.  Il-kelma ‘profitt’ ma tistax tibqa’ titqies bħala kelma ħażina.  Il-profitt huwa d-dritt ta’ kull min qiegħed fin-negozju.  Iżda fl-istess ħin irridu naraw li l-profitt ikun ġust.” 

Il-Prof. Briguglio qal li huwa importanti li jkollna ekonomija mibnija fuq l-għerf, u l-ekonomija ta’ Malta trid tibbaża fuq negozji mmexxija minn persuni li ħarġu mill-universita’, mhux għax gradwati biss jistgħu jirnexxu fid-dinja tan-negozju, iżda hija verita’ li persuni li ħarġu mill-universita’ għandhom aktar ċans ta’ suċċess. 

Is-Segretarju Parlamentari Edwin Vassallo kompla dwar il-kompetittivita’ u qal li “f’Malta għad għandna biża’ kbira mill-kompetittivita.  Minn naħa, kulħadd irid suq miftuħ, iżda fl-istess ħin għad hawn mentalita’ ta’ protezjoniżmu.  Il-kompetizzjoni hi garanzija ta’ suċċess.  Il-kompetizzjoni ħolqot l-impjiegi.  Dawk l-impjiegi li ntilfu minn dawk il-kumpaniji li ma kienux għadhom vijabbli ntrebħu minn negozji oħra li saru aktar vijabbli.  Il-kompetizzjoni ma tagħlaqx l-opportunitajiet, anzi, tagħti ċertezza. 

Waqt id-djalogu tkellmu numru ta’ studenti li kienu preżenti, u tkellmu wkoll ir-rappreżentanti ta’ l-għaqdiet ta’ l-istudenti.  L-Onor. Vassallo faħħar il-ħidma ta’ dawn l-għaqdiet u qal li “l-Gvern jemmen fl-importanza u l-ħiliet ta’ organizazzjonijiet bħalma huma s-SIFE u l-Young Enterprise u nħeġġiġkom biex tagħmlu r-riċerka tagħkom fuq il-ħtiġijiet ta’ l-istudenti llum.  Laqgħa bħal tal-lum għalija wkoll hi riċerka, biex imbagħad noħloq inizjattivi li huma meħtieġa u innovattivi.” 

Is-Segretarju Parlamentari esprima x-xewqa li fuq il-kampus ta’ l-universita’ jkun hemm ukoll uffiċċju għal dawk l-istudenti li, anke waqt li għadhom qegħdin jistudjaw, jixtiequ jiftħu n-negozju tagħhom.  L-Onor. Vassallo qal li li tkun self-employed ma jfissirx biss li tiftaħ negozju, iżda anke li taħdem b’kuntratt jew bħala free-lancer. 

“Irridu nippreparaw lilna nfusna għal mentalitajiet ġodda, u rridu noħolqu nies li jfittxu kif jistgħu jkunu aħjar mill-bieraħ” temm is-Segretarju Parlamentari Edwin Vassallo. 

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow