Left arrow Mur Lura

Kultura ta’ ftehim bejn il-popli

PR0436
Date Icon 27/03/2007

AEGEE, Association des Etats Généraux des Etudiants de l’Europe, hi l-Forum ta’ l-Istudenti Ewropej. Din l-assoċjazzjoni ta’ l-istudenti, waħda mill-akbar fl-Ewropa, hi rappreżentata minn 17,000 student li huma attivi f’260 Belt Akkademika, f’40 pajjiż madwar l-Ewropa kollha. 

L-AEGEE f’Malta twaqqfet fl-1997 u għalhekk din is-sena qed tiċċelebra 10 snin mit-twaqqif tagħha f’Malta. Minn dak iż-żmien ’l hawn l-AEGEE-Valletta tat kontribut qawwi lill-istudenti. L-‘Antenna’ ta’ l-AEGEE f’Malta ġiet rikonoxxuta fl-1998. Minn dik is-sena wkoll l-AEGEE f’Malta bdew jorganizzaw l-Università tas-Sajf  li hi mfittxija b’domanda kbira, ivvutata dejjem bħala fost l-aqwa madwar l-Ewropa.  Fl-2002 kien organizzat għall-ewwel darba l-Avveniment tax-Xitwa sabiex ġie ċċelebrat il-Ħames Anniversarju ta’ l-Antenna ta’ Malta. F’Marzu 2005 l-AEGEE-Valletta organizzat l-ewwel Laqgħa tal-Bordijiet Ewropej. Din is-sena ser tiġi organizzata f’Malta l-AGORA biex tikkoinċidi ma’ l-10 Anniversarju ta’ AEGEE-Valletta. 

Il-Ministru għat-Turiżmu u Kultura Francis Zammit Dimech, meta nieda l-proġett AGORA waqt konferenza ta’ l-aħbarijiet, qal li l-AEGEE ta’ Malta qed tagħti kontribut qawwi għall-ħajja ta’ l-istudenti f’pajjiżna u madwar l-Ewropa. Hu qal li din l-assoċjazzjoni, permezz ta’ l-attivitajiet li torganizza, qed jirnexxiela tressaq aktar lejn xulxin studenti Ewropej minn  40 pajjiż differenti. 

Il-Ministru Zammit Dimech qal li meta l-istudenti jiltaqgħu bejniethom, jiddiskutu f’ambjent demokratiku, jikkoperaw flimkien billi jittolleraw aktar lil xulxin. Hu qal li m’hemmx dubbju li dan kollu jwassal biex jifhmu lil xulxin aħjar u hekk jikkontribwixxu lejn il-paċi fl-Ewropa u fid-dinja. 

Il-Ministru għat-Turiżmu u Kultura qal li din l-organizzazzjoni tikkontribwixxi wkoll lejn is-settur turistiku. Hu qal li l-bdil ta’ studenti kien minnu nnifsu qasam turistiku. Hu qal li fl-Universita’ ta’ Malta llum għandna madwar elf student barrani li wieħed jista’ jqishom bħala turisti permanenti. 

Il-Ministru Zammit Dimech qal li niċċa mportanti fis-settur turistiku hi dik tat-tagħlim ta’ l-Ingliż. Hu qal li skond ċifri ippubblikat mill-Uffiċju Nazzjonali ta’ l-Istatistika fl-2004 ġew Malta 55,578 barranin biex jitgħallmu l-Ingliż. Hu qal li ċ-ċifra telgħet għal 61,607 fl-2005 u minn stimi ta’ l-Awtorita’ għat-Turiżmu ta’ Malta – minħabba  li ċ-ċifri uffiċjali għadhom ma ħarġux –  is-sena li għaddiet ġew Malta 67,000 persuna biex jitgħallmu l-Ingliż. 

Il-Ministru Zammit Dimech qal li l-kultura tat-tagħlim kienet il-kultura tal-ftehim bejn il-popli. Għalina kienet ukoll mezz ta’ dħul għal pajjiżna. Hu qal li l-AEGEE-Valletta qed jagħtu sehemhom biex jikber il-ftehim bejn l-istudenti Ewropej u biex jiżdied in-numru ta’ barranin li jiġu Malta biex jitgħallmu. Hu qal li l-istudent kien ukoll ambaxxatur tajjeb ta’ pajjiżna u għalhekk kellna nagħmlu minn kollox biex meta jżurna nħajjruh idur is-siti storiċi ta’ pajjiżna biex isir jaf aktar dwar Malta u jgħaddi l-esperjenzi tiegħu lill-qraba tiegħu u lill-ħbiebu. 

Il-Ministru għat-Turżimu u Kultura feraħ lill-AEGEE-Valletta talli bil-ħidma tagħhom irnexxilhom jattiraw l-proġett AGORA lejn Malta li mhux biss ser iġib lejn pajjiżna rappreżentanti ta’ studenti mill-Ewropa kollha iżda għandu jkun vetrina ta’ pajjiżna fost l-istudenti żgħażagħ.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow