Proposti TA’ L-OPPOŻIZZJONI ‘nofs leħja’ dwar l-ambjent storiku
Il-Ministeru għat-Turiżmu u Kultura jemmen li l-abbozz ta’ stqarrija ta’ viżjoni tal-partit Laburista dwar il-ħarsien ta’ l-ambjent storiku mhi xejn għajr taħlita ta’ proposti li l-Gvern preżenti wettaq jew qed iwettaq.
Il-Ministeru għat-Turiżmu u Kultura qal li l-Att dwar il-Wirt Kulturali flimkien ma’ l-Att dwar il-Kunsill Malti għall-Kultura u l-Arti, waqqfu s-sisien meħtieġa biex pajjiżna jħares il-wirt kulturali vast li għandna u biex ninkoraġixxu u nippromwovu l-kultura fl-isfond ta’ perspettiva wiesgħa ta’ attivita’ soċjo-ekonomika. L-Att dwar il-Wirt Kulturali wassal biex twaqqfet Heritage Malta, is-Sovrintendenza tal-Wirt Kulturali u l-Kumitat tal-Garanzija.
Il-Ministeru għat-Turiżmu u Kultura qal li d-dokument tal-Partit Laburista jitkellem dwar l-iżvilupp ta’ riċerka dwar l-oqsma kollha ta’ l-ambjent storiku. Dan l-aħħar ġiet inawgurata l-Cultural Heritage Inventory Management System (CHIMS) bl-iskop doppju li tkun ta’ inventarju u fl-istess waqt għodda għall-immaniġġjar tal-wirt kulturali ta’ pajjiżna. Is-sistema hi ukoll maħsuba li tgħin fl-iggvernar tal-wirt kulturali f’Malta u biex tipprovdi lill-pubbliku aċċess għal informazzjoni li llum hu diffiċli li tinstab.
Il-Ministeru għat-Turiżmu u Kultura qal li l-proposta li jitwaqqaf “team apposta li jaħdem fil-qrib ma’ l-Awtorita’ Maltija tat-Turiżmu u s-settur privat fuq materji fost l-oħrajn ta’ marketing ta’ siti storiċi” qed tkun implimentata permezz tas-segment turistiku, immexxi minn segment leader, dwar il-wirt storiku ta’ pajjiżna. Il-Ministeru għat-Turiżmu u Kultura fakkar li fl-MTA diġa’ hemm rappreżentanza wiesgħa tas-settur privat li fi ħdan l-MTA jagħmlu l-proposti meħtieġa għal kull qasam li għandu x’jaqsam mat-turiżmu, inkluż il-marketing tas-siti storiċi.
Il-Ministeru għat-Turiżmu u Kultura qal li l-pjani li qed isemmi l-Partit Laburista “għar-riġenerazzjoni ta’ ċentri storiċi bil-priorità tkun il-Port il-Kbir u l-ibliet storiċi tal-madwar, u ċ-Ċittadella u r-Rabat f’Għawdex”, ilha sseħħ. Il-Ministeru fakkar li fuq in-naħa tal-Kottonera, fix-Xatt tal-Birgu ġew restawrati diversi palazzi u binjiet li llum qed jikkontribwixxu għar-riġenerazzjoni tal-Kottonera. Fost dawn hemm il-Palazz tal-Kaptan tax-Xwieni li nbidel f’Casinò, l-Old Bakery li llum hi l-Mużew Marittimu, l-Imħażen li nbidlu fi stabbilimenti tal-catering u swali għall-wirjiet.
Il-Ministeru għat-Turiżmu u Kultura żied li fuq in-naħa tal-belt Valletta l-Imħażen ta’ Pinto u Forni ġew restawrati u llum inbidlu fil-Cruise Liner Passenger Terminal, u l-Power Station il-qadima li ġiet restawrata u riabilitata bħala parti minn dan il-kumpless. Il-proġett ta’ Manoel Island u Tigne’ jinkludi r-restawr u r-riabilitazzjoni tal-Forti Manoel u tal-Fortizza ta’ Tigne’. Il-Kavallier ta’ San Ġakbu fil-belt Valletta ġie restawrat b’investiment ta’ Lm4.6 miljun biex illum inbidel f’Ċentru għall-Kreattività.
Il-Ministeru għat-Turiżmu u Kultura nnota li dawn il-proġetti kienu fil-prattika dak li qed jissuġġerixxi bil-kliem il-Partit Laburista, meta jgħid li “għandhom ikunu identifikati opportunitajiet ta’ investiment li jattiraw lis-settur privat biex f’public/private partnerships, japprofittaw mill-potenzjal ta’ l-ambjent storiku”.
Il-Ministeru għat-Turiżmu u Kultura qal li l-Gvern mhux biss jitkellem mal-Kunsilli Lokali iżda fl-isfond tal-qagħda finanzjarja jgħin mill-aħjar li jista’ fi proġetti li jikkontribwixxu għall-iżvilupp kulturali u storiku fil-lokalitajiet.
Il-Ministeru għat-Turiżmu u Kultura fakkar li kemm ilha li twaqqfet Heritage Malta din ingħatat ħafna aktar fondi milli kien hemm qabel għall-wirt storiku. Il-Ministeru jfakkar ukoll li, bl-appoġġ ta’ fondi mill-Unjoni Ewropea qed jitwettqu proġetti għall-iżvilupp ta’ l-ambjent kulturali. Proġett sinifikanti hu dak li ser jitwettaq biex jitgħattew it-tempji ta’ l-Imnajdra u Ħaġar Qim, li huma wirt dinji u ċ-ċentru għall-viżitaturi li ser jinbena fl-istess post.
Il-Ministeru għat-Turiżmu u Kultura qal li minn partit politiku li qed jipprova juri kemm hu lest biex ikun fil-Gvern, il-poplu jistenna proposti konkreti u li jkollhom viżjoni u mhux proposti vagi u ‘nofs leħja’ jew li diġa’ twettqu bil-fatti mill-Gvern preżenti.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959