JUM NAZZJONALI TAŻ-ŻGĦAŻAGĦ: IŻ-ŻGĦAŻAGĦ EWROPEJ JIĊĊELEBRAW IL-50 ANNIVERSARJU MIT-TWAQQIF TA’ L-UE
“Il-Kunsill Nazzjonali taż-Żgħażagħ jħeġġeġ is-sehem taż-żgħażagħ fis-soċjeta’ u jirrikonoxxi l-kontribut taż-żgħażagħ fid-dinja tax-xogħol, fil-qasam studentesk, fir-riċerka u fil-volontarjat. Din il-ġimgħa hija waħda speċjali mhux biss għaż-żgħażagħ Maltin li qed jiċċelebraw il-Jum Nazzjonali taż-Żgħażagħ iżda anke għaż-żgħażagħ Ewropej. Lejn tmiem din il-ġimgħa ser ikun qed jiġi ċelebrat il-50 Anniversarju ta’ l-UE u għal din l-okkazjoni speċjali, ż-żgħażagħ Ewropej se jiltaqgħu f’Ruma bejn it-23 u l-25 ta’ Marzu biex jiddiskutu l-futur ta’ l-Unjoni Ewropea. Wara jifformulaw dokument finali li jiġi ppreżentat lil mexxejja tas-27 pajjiż membru ta’ l-UE. Fid-dawl ta’ dan kollu, l-KNŻ iħeġġeġ liż-żgħażagħ jagħtu sehemhom fl-għaqdiet lokali filwaqt li jagħmlu l-aħjar użu mill-opportunitatjiet li toffri l-Unjoni Ewropea.” Dan qalitu l-President tal-Kunsill Nazzjonali taż-Żgħażagħ Alessia Zammit meta dalgħodu l-kunsill iltaqa’ mal-Ministru responsabbli miż-żgħażagħ, Louis Galea.
Hi qalet li fil-ħidma tiegħu, l-KNŻ qed jagħti sehem sħiħ fil-kampanja ta’ l-UE, ‘Ilkoll Differenti, Ilkoll Indaqs’ u dan għaliex jemmen li ż-żgħażagħ għandhom ikollhom opportunitajiet indaqs u m’għandhomx jiġu ddiskriminati fuq bażi ta’ razza, sess, reliġjon, orjentazzjoni sesswali, eta’ jew disabilita’. Għalhekk il-KNŻ jawgura xewqat sbieħ liż-żagħzagħ kollha f’dan il-jum specjali, iżda jsellem b’mod speċjali liż-żgħażagħ fl-isptarijiet, fil-faċilitajiet korrettivi u fil-postijiet ta’ riabilitazjoni. Hi qalet li biex jassigura li jaħdem favur iż-żgħażagħ kollha, l-eżekuttiv il-ġdid tal-KNŻ, f’dawn il-jiem se jzur xi żgħażagħ fis-soċjeta’ sabiex jiddentifika b’mod aktar prattiku l-bżonnijiet ta’ dawn iz-żgħażagħ.
Hi qalet ukoll li matul din il-ġimgha il-KNŻ se jkun qed jippublika wkoll il-pjan ta’ ħidma tiegħu li jiġbor fih attivitajiet sportivi, kulturali, u internazzjonali kif ukoll pjanijiet oħra li permezz tagħhom, il-KNŻ ikun qed jagħti sehem attiv anke fl-avvenimenti nazzjonali.
Il-Ministru Galea qal li ż-żgħażagħ Maltin iridu jkollhom viżjoni fit-tul kemm fuq livell personali kif ukoll fuq livell nazzjonali. “Pajjiż li jrid jibqa’ jimxi l-quddiem, pajjiż li jrid joffri l-aqwa kwalità ta’ ħajja, irid ikompli jiġġedded kontinwament u jħares il-quddiem b’ottimiżmu u b’kawtela; imma konvint mill-ħiliet tiegħu u tan-nies tiegħu li dawn ukoll ikunu viżjonarji, kreattivi, ħawtiela u innovattivi.”
Louis Galea qal li l-Gvern dejjem emmen li l-ekonomija tal-pajjiż hi mibnija fuq l-edukazzjoni tal-poplu. Hu qal li n-numru ta’ żgħażagħ li qed ikomplu jistudjaw qed jiżdied bil-figura titla għal madwar 70% ta’ dawk li għandhom 17-il sena ikomplu f’xi istituzzjoni edukattiva. Il-MCAST u l-Università kibru biex jilqgħu aktar studenti u qed jippjanaw biex l-ammont ta’ studenti jiżdied b’mod sostanzjali fis-snin li ġejjin. Din is-sena l-Gvern daħal fi ftehim ma istituzzjonijiet privati biex dawk kollha li applikaw għal korsijiet ta’ l-ICT ma’ l-MCAST setgħu jibdew il-kors. Hu qal li l-Gvern baqa’ jappoġġja lill-istudenti permezz ta’ l-għotjiet ta’ manteniment u ta aktar għajnuna lil dawk li l-aktar għandhom bżonn, filwaqt li offra inċentiv lil dawk l-istudenti li qed isegwu korsijiet tax-xjenza permezz ta’ għotjiet supplimentari.
Il-Ministru Galea tkellem ukoll dwar ix-xogħol li huwa żgur l-ewwel priorità għall-parti l-kbira taż-żgħażagħ. “Il-Gvern qed jaħdem biex l-ewwel net iħarreġ liż-żgħażagħ sa l-għola livelli u t-tieni billi jiġbed lejn pajjiżna investiment u xogħol. L-istituzzjonijiet edukattivi qed jaħdmu wkoll biex joqorbu dejjem aktar lejn id-dinja tax-xogħol biex l-istudenti ikunu aktar preparati għad-dinja tax-xogħol.” Hu fakkar kif mill-2004 ‘l hawn, dawk jirreġistraw naqsu b’kważi 1500. Il-Gvern qed jaħdem biex l-ekonomija tal-pajjiż tiġġenera biżżejjed xogħol biex mhux biss dawk li joħorġu mill-iskola jsibu x-xogħol, imma wkoll biex dawk qiegħda jsibu mpjieg.
Louis Galea tkellem ukoll mal-KNZ dwar ir-rwol importanti tan-nisa fis-soċjetà u fl-ekonomija tal-pajjiż u qal li qed issir ħidma biex aktar nisa ikollhom opportunitajiet ta’ xogħol u biex ikun hemm l-appoġġ meħtieġ biex iż-żewġ ġenituri jkunu jistgħu isegwu l-karrieri tagħhom partikolarment bl-iżvilupp li qed isir fil-qasam taċ-Childcare u l-edukazzjoni bikrija.
Huwa fatt li dawk li huma qegħda jew li jsibuha diffiċli li jsibu xogħol huma l-aktar nies li għandhom livell baxx ta’ edukazzjoni jew saħansitra m’għandhomx edukazzjoni bażika. Huwa wkoll fatt li ftit huma dawk li jiggradwaw u ma jsibux ix-xogħol mill-ewwel u l-parti l-kbira jsibu x-xogħol wara ftit żmien.
Minbarra l-iskemi li toffri l-ETC kemm f’apprentistati kif ukoll għal dawk iż-żgħażagħ li jtemmu l-edukazzjoni tagħhom, bħala membri ta’ l-UE qed ingawdu minn fondi għal skemi oħrajn maħsuba biex ż-żgħażagħ isibu x-xogħol. Diversi żgħażagħ li temmew l-iskola mingħajr ħiliet bażiċi jew li kellhom problemi ta’ litteriżmu, ingħataw għajnuna u taħriġ biex isibu x-xogħol. L-ETC qed toffri wkoll għajnuna lil dawk li qed ifittxu esperjenza ta’ xogħol fl-Ewropa permezz tas-servizz tal-EURES.
Il-President tal-KNZ semmiet kif il-Kunsill mistenni ikompli jibni fuq dak li wettqu kunsilli ta’ qabel u li din is-sena l-kunsill se jiffoka b’mod partikolari fuq il-kultura u l-isport. Louis Galea qal li jemmen li dawn huma żewġ oqsma li fihom ż-żgħażagħ għandhom kontribut qawwi x’jagħtu. Dwar il-kultura hu qal li pajjiżna għandu storja u kultura unika fir-reġjun u dan jagħtina vantaġġ komparattiv jekk nagħrfu nitlaqqmu minnha u nkomplu niżviluppawa għall-futur. Dwar l-isport il-Ministru qal li rridu nħarsu lejn l-isport mhux biss bħala kompetizzjoni imma bħala stil ta’ ħajja li tinkludi ammont ta’ ħin kull jum jew fil-ġimgħa fejn nipprattikaw xi sport. Hu fakkar kif il-Gvern kompla jinvesti fil-qasam ta’ l-isport kemm billi kompla jtejjeb il-faċilitajiet tiegħu kif ukoll billi joffri skemi u programmi għal kulħadd. Il-Gvern qed jinvesti f’diversi faċilitajiet sportivi fl-iskejjel li qed jimmodernizza u dawn se jkunu jistgħu jintużaw mill-komunitajiet tal-madwar. Il-Kunsill Malti għall-Isport qed jorganizza diversi skemi fosthom l-iskola sport, il-girls on the move, u sport għall-komunità. Il-Gvern qed jaħdem ukoll biex jinseġ flimkien l-iskejjel ta’ l-Arti, tal-Mużika u tad-Drama biex dawn joffru taħriġ interdixxiplinari u jtejjbu l-kwalità tat-taħriġ li jagħtu.
Pajjiżna kommess li jipprovdi opportunitajiet indaqs għal kulħadd. L-edukazzjoni inklużiva ġabet bidliet kbar kemm fil-mod kif inħarsu lejn persuni b’diżabilità u wasslet biex nindunaw x’potenzjal għandhom u b’hekk kif jistgħu jipparteċipaw fis-soċjetà u l-ekonomija. Il-Gvern qed jaħdem fuq diversi rakkomandazzjonijiet tar-rapport Spiteri dwar l-edukazzjoni speċjali u inklużiva. Qed issir ukoll ħidma biex tfal u żgħażagħ jikbru b’aktar tolleranza lejn dak li huwa barrani jew differenti minnhom u biex ikollhom rispett lejn kulħadd.
Il-Ministru semma wkoll iż-żgħażagħ Għawdxin li jingħataw attenzjoni patikolari. Hu qal li l-Gvern kattar l-għajnuna li joffri lill-istudenti Għawdxin partikolarment permezz ta’ l-għotjiet ta’ manteniment. Komplew jiżdiedu l-korsijiet offruti f’Għawdex mill-MCAST u l-Università u qed jinbena mill-ġdid l-ITS.
Louis Galea faħħar ukoll l-inizjattiva tal-Kunsill biex isiru il-kunsilli lokali taż-Żgħażagħ li jagħtu l-opportunità liż-żgħażagħ mil-lokalità biex flimkien mal-kunsilli lokali jaħdmu biex iġibu l-quddiem iż-żgħażagħ u l-lokalità tagħhom. L-iskejjel Sekondarji wkoll qed joffru l-opportunità lill-istudenti li jagħtu l-kontribut tagħhom fit-texxija ta’ l-iskola. Faħħar ukoll l-impenn tal-KNZ fl-Empowerment Centres li issa jinsabu f’B'Kara, Mosta, Qormi, Tarxien, Żurrieq, Fgura, Żejtun u fir-Rabat Għawdex. Hu fakkar li l-ewwel ‘empowerment centre’ infetaħ f’Birkirkara f’Marzu 2000. Dawn iċ-ċentri jipprovdu liż-żgħażagħ informazzjoni u taħriġ biex dawn ikunu jistgħu isibu x-xogħol partikolarment billi jħeġġu l-intrapriża.
Dwar l-appoġġ għaż-żgħażagħ, il-Ministru Galea qal li l-Gvern joffri appoġġ lill-organizzazjonijiet taż-żgħażagħ kemm b’mod finanzjarju kif ukoll permezz tar-riżorsi u informazzjoni biex ikunu jistgħu jwettqu l-ħidma tagħhom. Il-Gvern jagħti b’madwar Lm12,000 (€ 27,952) fis-sena taħt il-Youth Support Programme u jorganizza l-Għarfien Nazzjonali taż-Żgħażagħ biex jippremja lil dawk l-organizzazzjonijiet li jwettqu l-ħidma fost iż-żgħażagħ. Il-Gvern joffri wkoll appoġġ liż-żgħażagħ b’mod dirett biex ikomplu jitħarrġu permezz tal-Youth Specialisation Studies Scheme (ma’ l-APS) u l-Malta Government Scholarship Scheme li beda jħaddem is-sena li għaddiet b’għotjiet li laħħqu l-Lm200,000 (€ 465,874) u li se jerġgħu jingħataw din is-sena.
Il-Ministru Galea qal li permezz tal-Programmi Edukattivi ta’ l-UE, il-Gvern Malti nvesta miljuni ta’ liri fiż-żgħażagħ Maltin li gawdew minn opportunitajiet ta’ taħriġ u esperjenzi ta’ xogħol f’pajjiżi oħra fl-UE; kif ukoll permezz ta’ diversi proġetti. Taħt il-programm Socrates diversi skejjel sekondarji ipparteċipaw fi proġetti u taħt il-programm Erasmus mijiet ta’ studenti u edukaturi fil-livell ta’ l-edukazzjoni ogħla kellhom l-opportunità jkollhom esperjenzi f’istituzzjonijiet edukattivi fl-UE.
L-istudenti jistgħu ikomplu l-istudji tagħhom f’universitajiet Ewropej għal bejn 3 xhur u sena. Bejn l-2000 u l-2006, b’investiment ta’ €1.8m għamlu din l-esperjenza mat-800 student u mat-300 edukatur. Il-programm jaħseb ukoll biex ikun hemm kollaborazzjoni bejn l-universitajiet u biex jinħolqu networks tematiċi. Taħt il-Programm Leonardo Da Vinci, Malta żiedet b’mod sostanzjali kemm l-ammont ta’ fondi miksuba kif ukoll l-ammont ta’ persuni li jibbenefikaw minn dan il-programm. Fis-sena 2000 ingħataw €180,000 lil 191 benefiċjarju, filwaqt li s-sena li għaddiet, dawn żdiedu għal kważi nofs miljun Ewro lil 361 benefiċjarju. B’kollox aktar minn €2m ġew investiti fiż-żgħażagħ Maltin. Dan minbarra aktar minn €2m li ingħataw lil pajjiżna biex isiru diversi proġetti pilota. Taħt il-programm Leonardo da Vinci hemm ukoll l-uffiċċju tal-Euro Guidance li jipprovdi riżorsi u appoġġ lil dawk il-persuni li jkunu jridu jsibu xogħol f’xi pajjiż ieħor ta’ l-UE.
Minn meta beda jopera l-programm tal-YOUTH fl-2001, mijiet ta’ żgħażagħ Maltin kellhom l-opportunità li jiltaqgħu ma’ sħabhom żgħażagħ Ewropej u jieħdu sehem f’diversi proġetti. U bid-dħul ta’ Malta fl-Unjoni Ewropea fl-2004, il-programm YOUTH ħa spinta finanzjarja qawwija.
Il-Programm tal-YOUTH huwa wieħed edukattiv u jiffoka fuq edukazzjoni nformali għal żgħażagħ bejn il-15 u l-25 sena. Il-programm hu mfassal biex jolqot il-gosti u l-interessi taż-żgħażagħ u l-youth workers, mhux biss billi joffrilhom għajnuna finanzjarja, iżda billi jipprovdi informazzjoni, taħriġ u opportunitajiet biex jiżviluppaw kollaborazzjoni u mobilità bejn pajjiżi Ewropej u pajjiżi oħrajn.
L-iskop tal-programm YOUTH hu li jżid l-inizjattiva taż-żgħażagħ fis-soċjetà, titneħħa kull tip ta’ diskriminazzjoni, razziżmu u xenofobja, u jkun hemm apprezzament tad-diversità bjen il-kulturi varji li jeżistu fl-Ewropa. Barra minn hekk kull sena tintagħżel tema differenti li l-proġetti jridu jiffukaw fuqha, per eżempju l-obeżità, l-isport u l-inklużjoni. Il-programm tal-YOUTH, li jikkonsisti f’ħames azzjonijiet, mill-2001 sal-lum, diġà għen lil 1,800 żagħżugħ u żagħżugħa Maltin, b’għajnuna finanzjarja mill-Unjoni Ewropea ta’ kważi € 3 m. L-azzjonijiet ivarjaw f’dak li joffru u jinkludu xogħol volontarju barra minn xtutna, proġetti għas-soċjetà u youth exchanges, bi prijorità lil dawk fil-marġini tas-soċjetà.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959