Left arrow Go Back

Il-Jum Nazzjonali taż-Żgħażagħ ...  IŻ-ŻGĦAŻAGĦ TEŻOR MILL-AQWA

PR0391
Date Icon 18/03/2007

“Iż-żgħażagħ huma teżor mill-aqwa li jista` jkollu pajjiżna. Iż-żgħażagħ huma l-grupp l-aktar frisk, dinamiku, krejattiv, ikkulurit, tolleranti, u pluralist li għandna fis-soċjetà Maltija. Jekk l-esperjenza tagħna l-kbar hi ta’ valur, iż-żgħażagħ għandhom ħafna x’jgħallmu u x’jgħidu lilna l-kbar. Aħna fid-dmir li nisimgħu, nirriflettu, u naħdmu maż-żgħażagħ biex flimkien nirrestawraw iċ-ċivilità tagħna biex issir ambjent sabiħ u b’saħħtu għall-aqwa tgawdija tal-ħajja fi spirtu ta’ ugwaljanza u ġustizzja.” Dan kien il-qofol tal-messaġġ ta’ Louis Galea, il-Ministru responsabbli mill-politika għaż-żgħażagħ, fil-ftuħ f’Bay Street ta’ ġimgħa ta’ attivitajiet marbuta mal-Jum Nazzjonali taż-Żgħażagħ. 

Il-Jum Nazzjonali taż-Żgħażagħ hu inizjattiva tal-Kunsill Nazzjonali taż-Żgħażagħ (KNZ) li jiġbor fi ħdanu l-għaqdiet taż-żgħażagħ f’Malta u Għawdex. Il-motto magħżul għal din is-sena hu ‘Ilkoll Differenti, Ilkoll Indaqs’. Il-ħidma qed issir bil-kollaborazzjoni taċ-Ċentru Nazzjonali ta’ Informazzjoni għaż-Żgħażagħ (NYIC) u l-Kummissarju għat-Tfal.   

L-attività tal-ftuħ f’Bay Street kienet tinkludi spettaklu miż-żgħażagħ ta’ kant, żfin u drama, diskussjonijiet, spazji ta’ kreattività u stands ta’ informazzjoni li kollha b’xi mod jew ieħor għandhom x’jaqsmu mat-tema magħżula bl-iskop li tippromowovi id-diversità u l-opportunitajiet indaqs fost iż-żgħażagħ. 

Louis Galea stieden liż-żgħażagħ Maltin u Għawdxin biex jagħtu s-sehem tagħhom sa minn issa fl-iżvilupp li qed iseħħ biex Malta ssir pajjiż mill-isbaħ u mill-aqwa f’seklu ġdid li ser jara l-milja ta’ rivoluzzjoni umana u teknoloġika li qed tbiddel id-destin tal-bniedem fid-dinja. Il-Ministru Galea fisser kif il-Gvern prezenti huwa qrib iż-żgħażagħ bil-fatti u mhux bil-kliem għaliex kuljum qed jinvesti u jgħin liż-żgħażagħ Maltin u Għawdxin biex jibnu l-futur tagħhom, isibu x-xogħol, u jiksbu kwalità ta’ ħajja f’dinja ġdida. 

Il-Ministru Louis Galea qal li għall-Gvern iż-żgħażagħ kollha huma importanti, sew dawk li jafu l-iskola kif ukoll dawk li għal xi raġuni jew oħra ma kisbux edukazzjoni u kwalifiki biżżejjed. “Aħna naċċettaw u nifirħu bid-differenzi u d-diversità għax nafu li mhux kulħadd huwa l-istess. Nafu li mhux kulħadd kellu l-istess opportunitajiet mill-familja, minn natura jew mis-soċjetà. Hekk kien u hekk jibqa` għal dejjem. Iżda aħna rridu li, int min int, intix raġel jew mara, hi x’inhi l-orjentazzjoni sesswali tiegħek, ir-razza, ir-reliġjon, id-diżabilità, l-iżvilupp edukattiv tiegħek, ilkoll ngħinuhom biex igawdu l-ħajja indaqs. Ahna konvinti li kull ġuvni u kull tfajla, hu x’inhu l-iżvantagg tagħhom, jistgħu jgħelbu l-ostakoli u jkunu persuni sħaħ, krejattivi u produttivi.” Il-Ministru Galea fakkar li l-Gvern qed jinvesti miljuni ta’ liri biex il-Korporazzjoni tat-Taħriġ u x-Xogħol (ETC) twettaq programmi speċjali biex tgħin li kull grupp ta’ żgħażagħ, speċjalment dawk li għandhom xi bżonn ta’ appoġġ speċjali, biex jieħdu posthom fid-dinja tax-xogħol. 

Il-Ministru Galea stieden liż-żgħażagħ biex jagħmlu suċċess miż-żgħożija tagħhom billi bl-edukazzjoni u t-taħriġ isiru ħaddiema u artisti tax-xogħol mill-aqwa. “Qatt ma kien hawn Gvern li investa fl-edukazzjoni u t-taħriġ daqs kemm qed isir bħalissa. Ir-riformi li qed indaħħlu fl-edukazzjoni sa mill-edukazzjoni bikrija, il-bini u l-immodernizzar ta’ skejjel, l-iżvilupp ta’ l-ITS, l-MCAST u l-Università huma kollha għodda f’idejn iż-żgħażagħ biex huma jibnu lilhom infushom u bil-bini tagħhom ikomplu jibnu lill-pajjiżna.”  

Louis Galea fisser li diġà fl-Università hemm aktar tfajliet milli ġuvintur. “Din hija rivoluzzjoni li sa ftit snin ilu lanqas biss konna noħolmuha. Iżda dan mhux biżżejjed. It-tfajliet hemm bżonn jinvadu t-territorji li l-irġiel s’issa żammew għalihom – l-oqsma ta’ l-inġiniera, l-arkitettura, x-xjenzi, u t-teknoloġiji l-ġodda. B’mod partikolari hemm bżonn aktar tfajliet li jidħlu f’dawn l-oqsma fl-MCAST. Id-dinja tax-xogħol tal-lum u ta’ għada tinħtieġ tfajliet li jkollhom dawn il-ħiliet u kwalifiki.” 

Louis Galea qal li “l-programmi Ewropej Leonardo da Vinci, YOUTH u Socrates ikomplu jgħinu f’dik li hi edukazzjoni formali u informali u t-taħriġ taż-żgħażagħ Maltin. L-ETC, bl-għajnuna finanzjarja ta’ l-Unjoni Ewropea, ukoll qed tkompli taħdem biex iż-żgħażagħ ikollhom aktar opportunitajiet fid-dinja tax-xogħol.” 

Il-Ministru Galea fisser li għalkemm meta nitkellmu fuq Smart City l-emfasi isir fuq it-teknoloġija tal-kompjuters u l-informatika, il-verità hi li dan il-proġett se jfisser dinja sħiħa ta’ xogħol ta’ kwalità u ta’ valur aktar għoli minn dak li kellna s’issa f’diversità ta’ oqsma ta’ xogħol. “Veru li ser ikollna bżonn ix-xjentisti, l-inġiniera u t-tekniċi tal-kompjuters, tal-informatika u tal-kommunikazzjoni. Iżda se jkollna bżonn ta’ ħafna ħaddiema fis-sales and marketing, nies tajbin fil-matematika, fl-istatistika u fir-riċerka, managers tar-riżorsi umani, nies kapaċi jaħdmu fis-servizzi finanzjarji u ta’ l-insurance, nies ta’ l-arti u l-kultura, nies tat-turiżmu, u ħaddiema li kapaċi jappoġġaw belt sħiħa fl-indafa, il-ġonna u ż-żamma ta’ ambjent mill-isbaħ u mill-aqwa. Mhux il-ħaddiema kollha ser ikollhom bżonn degree jew diploma. L-aqwa kwalifika li għandna bżonn hi ħaddiema bieżla, b’natural u manjieri sbieħ, nafu l-Malti u l-Ingliż, u nafu min aħna bħala Maltin u x’inhi l-istorja, l-identità u l-kultura ta’ Malta u nuru li aħna kburin u ngħożżuha. Jekk ikollna dawn ikollna l-aqwa ċertifikati għall-opportunitajiet kbar li ġejjin. Qatt ma kien hawn ġenerazzjoni ta’ żgħażagħ li kellhom l-opportunitajiet sbieħ li għandhom il-ġenerazzjoni tal-lum,” temm il-messaġġ Louis Galea.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow