ECVET - European Credit Transfer System for Vocational Education and Training
“Irridu sistema li tkejjel it-tagħlim u l-kapaċitajiet f’Qafas Nazzjonali ta’ Kwalifiki. Irridu sistema li toħloq sinerġija fl-edukazzjoni Ogħla bejn l-edukazzjoni akkademika u dik vokazzjonali. Irridu li l-istituzzjonijiet edukattivi f’pajjiżna jipparteċipaw f’din l-innovazzjoni biex inkomplu nkattru l-mobilità u l-opportunitajiet ta’ tagħlim u taħriġ għal kulħadd.” Dan qalu l-Ministru ta’ l-Edukazzjoni Louis Galea meta dalgħodu fetaħ il-Konferenza Nazzjonali ta’ Konsultazzjoni dwar l-ECVET (European Credit Transfer System for Vocational Education and Training), sistema li biha jkun jista’ jsir trasferiment, tifdil u rikonoxximent tat-tagħlim li jsir fil-qasam vokazzjonali. F’din il-konferenza qed jieħdu sehem l-imsieħba f’dan is-settur inkluż l-istituzzjonijiet edukattivi, organizzazzjonijiet ta’ l-istudenti, unions u min iħaddem. Dan huwa process Ewropew li beda f’Kopenhagen (2002) u tkompla f’Maastricht (2004) fejn għall-ewwel darba ġiet proposta s-sistema ta’ ECVET.
Fl-Ewropa numru kbir ta’ persuni jsegwu korsijiet u opportunitajiet ta’ taħriġ barra minn pajjiżhom. Għalkemm hemm ħafna li jixtiequ jagħmlu din l-esperjenza u l-pajjiżi Ewropej iħeġġu dan it-tip ta’ mobilità, hemm numru ta’ ostakoli u limitazzjonijiet kemm biex dak li wieħed ikun tgħallem ikun rikonoxxut f’pajjiżi oħra, kif ukoll meta wieħed jiġi biex ikompli minn livell għall-ieħor fl-edukazzjoni vokazzjonali jew saħansitra minn sitwazzjoni ta’ tagħlim informali għal dik formali.
Is-sistema għaldaqstant trid tgħin biex wieħed ikun jista jimxi minn livell għall-ieħor jew minn sitwazzjoni għall-oħra biex ikompli jtejjeb il-kapaċitajiet u l-ħiliet tiegħu. F’dan is-sens l-ECVET trid tkun għodda li biha jkun hemm skambju ta’ informazzjoni li jwassal biex l-edukazzjoni u t-taħriġ kemm formali kif ukoll informali ikun jista’ jsir madwar l-Ewropa mingħajr xkiel u mingħajr diffikultajiet. Waħda mill-isfidi ewlenin hi l-firxa wiesgħa u d-differenzi kbar fil-qasam vokazzjonali fil-pajjiżi Ewropej.
Is-sistema ECVET qed tiġi żviluppata b’mod li t-taħriġ u l-kwalifiki miksuba ikunu jistgħu jiġu kkwantifikati f’units ta’ tagħlim li għalihom jingħataw punti skond il-livell. Wieħed imbagħad ikun jista’ juża dawn il-punti f’pajjiżi oħra ta’ l-Ewropa biex ikompli jitħarreġ jew inkella biex jagħmel xi tip ta’ esperjenza fuq il-post tax-xogħol.
Bħalissa fuq livell Ewropew qed issir konsultazzjoni bl-iskop li minn din il-konsultazzjoni, is-sistema tkun tista’ tiżviluppa aktar u jkun hemm ir-rakkomandazzjonijiet meħtieġa. Wara dan iż-żmien ta’ konsultazzjoni ser issir konferenza f’Ġunju 2007 taħt il-presidenza Ġermaniża u jiftaħ il-proċess ta’ l-approvazzjoni fejn il-Kummissjoni tiddeċiedi kif dan il-proġett se jimxi l-quddiem. Sadattant se jsiru numru ta’ studji u proġetti pilota taħt il-programm Leonardo da Vinci biex jikkumplimentaw dawn il-proċessi.
Fid-diskors tiegħu il-Ministru Galea qal li biex wieħed iqabbel is-sistemi u t-tagħlim differenti fil-pajjiżi ewropej trid tkejjel, u biex tkejjel irid jkollok kejl tajjeb. “Dan huwa il-prinċipju bażi tal-proposta ta’ l-ECVET. Din il-konsultazzjoni ta’ llum hija immirata biex Malta tagħti l-veduti tagħha dwar sistema ta’ akkreditazzjoni fis-sistema vokazzjonali biex wara, l-enti responsabbli mill-kwalifiki vokazzjonali tiddefinixxi x’sistema għandha taddotta f’dan il-qasam.” Hu qal ukoll li din is-sistema trid tiġi marbuta ħaġa waħda mal-Qafas Nazzjonali tal-Kwalifiki.
Meta kompla jitkellem dwar is-sistema, Dr. Galea qal li kull livell ta’ kwalifika irid jkollu numru ta’ credits marbutin miegħu kemm fl-edukazzjoni formali kif ukoll dik informali u mhux formali. Hu qal li kull kwalifika jrid ikollha numru ta’ credits assenjati ma’ riżultati speċifiċi ta’ tagħlim li jkunu jistgħu jiġu mkejla u li rridu ukoll naslu biex noħolqu sistema ta’ credits marbutin mar-rikkonoxximent ta’ tagħlim li jkun sar fuq postijiet tax-xoghol jew permezz ta’ xi sengħa – (Recognition of Prior Learning ), xogħol li jrid isir mill-Kunsill Malti għall-Kwalifiki. “Huwa ta’ sodisfazzjon għalija li nara li diġa hemm abbozz ta’ proposta dwar sistema ta’ credits fis-sistema vokazzjoni mfassal mill-Kunsill Malti għall-Kwalifiki għall-konsultazzjoni. Dan se jiġi ppubblikat f’wieħed minn tlett dokumenti li l-Kunsill lesta u li għandhom jiġu ppreżentati fil-ġimgħat li ġejjin,” sostna Louis Galea.
Louis Galea qal li idealment Credit System għas-settur ta’ l-edukazzjoni u t-taħriġ vokazzjonali tkun tixbaħ li dik li hemm fis-settur ta’ l-edukazzjoni ogħla. Dan għaliex fil-ħames livell tal-Qafas Nazzjonali tal-Kwalifiki hemm kwalifiki li jwasslu għas-sitt livell kemm fl-edukazzjoni ogħla akkademika kif ukoll vokazzjonali. Il-Ministru qal li din il-credit system trid toħloq pont u sinergija bejn edukazzjoni magħrufa bħala akkademika u l-edukazzjoni vokazzjonali.
Louis Galea qal li għalkemm l-Unjoni Ewropeja qed tippreżenta din is-sistema bħala waħda li l-pajjiżi u l-istituzzjonijiet jistgħu jidħlu fiha b’mod volontarju, il-maġġoranza ta’ l-istituzzjonijiet se jidħlu fiha hekk kif seħħ meta daħlet is-sistema ta’ ECTS (European Credit Transfer System), fejn illum l-parti l-kbira ta’ l-Universitajiet madwar l-Unjoni jużaw din is-sistema li ffaċilitat l-mobilita’ ta’ l-istudenti bejn Universita’ u oħra.
Louis Galea qal li lkoll irridu parita’ ta’ stima bejn is-sistema vokazzjonali u dik ta’ edukazzjoni ogħla, ilkoll irridu li jsiru aktar skambji u mobilita’ bejn studenti Ewropej, ilkoll irridu aktar programmi edukattivi li jwasslu għal tagħlim reċiproku, u jistgħu jittieħdu f’pajjiż jew ieħor fl-Unjoni Ewropea. Fuq kollox ilkoll irridu li tistudja fejn tistudja fl-Ewropa tkun tista’ taħdem fejn trid u bl-istess kompetenzi u stima. Hu għalhekk appella biex l-istituzzjonijiet edukattivi partikolarment dawk ta’ edukazzjoni vokazzjonali u taħriġ jiftħu l-bibien taghhom ghal din l-innovazzjoni u jibdew minn issa jaraw kif l-ewwelnett il-kwalifiki jinbidlu fl-istruttura tagħhom u jkun mfassla fuq leaning outcomes (riżultat tat-tagħlim) u t-tieni li flimkien mall-Kunsill Malti għall-Kwalifiki jiddiskutu l-aħjar sistema ta’ akkreditazzjoni li tkun tixbaħ lil dik proposta mill-Kummissjoni Ewropeja.
“Il-partecippazzjoni attiva fil-proċessi ta’ konsultazzjoni kemm dwar l-ECVET kif ukoll dwar il-Qafas Nazzjonali tal-Kwalifiki għandhom iwasslu biex is-sistema edukattiva tagħna tkompli timxi l-quddiem fil-kwalita’. L-ambizzjoni tal-Gvern hi li Malta sservi ta’ ċentru tat-tagħlim tul il-ħajja u ċentru tat-tagħlim vokazzjonali u taħriġ. Biex dan isseħħ nenħtieġu flessibilta’ u tfassil ta’ kwalifiki li jattiraw l-industrja mhux internament biss, imma ukoll fir-reġjun tal-Mediterran u fl-Ewropa ta’ isfel.” qal Louis Galea. Il-Ministru temm jgħid li “Malta għandha il-potenzjal biex dan jitlaħaq. B’Qafas Nazzjonali tal-Kwalifiki mfassal fuq dak Ewropew u b’sistema ta’ credits fil-livelli kollha tal-Kwalifiki jkollna attrazzjoni mportanti ħafna biex is-settur tat-tagħlim f’pajjiżna jikber fuq livell internazzjonali.”
Il-konferenza ġiet ukoll indirizzata mid-Direttur Ġenerali ta’ l-Edukazzjoni Dr. Cecilia Borg, mis-Sur Karsten Krüger tas-CEDEFOP (European Centre for the Development of Vocational Training), mis-Sur Anthony DeGiovanni - Direttur Studji Ogħla u Edukazzjoni għall-Adulti, s-Sur Joseph Farrugia - Direttur Ġenerali tal-Malta Employers Association, Dr James Calleja - CEO tal-Kunsill Malti għall-Kwalifiki, is-Sinj. Katya DeGiovanni, is-Sur Teddy Camilleri mill-Istitut ta’ l-Istudji Turistiċi (ITS) is-Sur Ray Farrugia, Registrar ta’ l-MCAST u s-Segretarju Permanenti fil-Ministeru ta’ l-Edukazzjoni, Żgħażagħ u Xogħol, is-Sur Frans Borg.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959