Jum il-Commonwealth: Nirrispettaw id-Differenzi – Nippromwovu l-Ftehim
Fl-Abbazija ta’ Westminster f’Londra, illum saret iċ-ċerimonja magħrufa bħala “Observance” li fiha tfakkar Jum il-Commonwealth. Iċ-ċerimonja kienet preseduta mill-Maesta’ Tagħha r-Reġina Elizabetta II, bħala Kap tal-Commonwealth u l-Ministru għall-Affarijiet Barranin, Michael Frendo li rrappreżenta lil Malta, li bħalissa hija c-Chair-in-Office ta’ din l-organizzazzjoni.
Jum il-Commonwealth ikun ċelebrat kull sena fit-tieni Tnejn ta’ Marzu u din is-sena t-tema magħżula hija: “Nirrispettaw id-Differenzi – Nippromwovu l-Ftehim”.
F’din l-okkażjoni, kull sena ssir ċelebrazzjoni multi-reliġjuża u multi-etnika f’Westminister li għaliha jipparteċipaw, barra mill-M.T. r-Reġina, il-pajjiż li jkollu l-presidenza ta’ l-organizzazzjoni, din id-darba Malta permezz tal-Ministru Michael Frendo, il-Prim Ministru Ingliż Tony Blair, u l-Kummissarji Għolja tal-pajjiżi membri tal-Commonwealth.
Il-Commonwealth tirrappreżenta kważi terz tal-popolazzjoni tad-dinja bi kważi żewġ biljun ċittadin li ġejjin minn 53 pajjiż mifruxa f’diversi kontinenti, razez, kulturi, tradizzjonijiet u reliġjonijiet.
F’messaġġ fl-okkażjoni ta’ Jum il-Commonwealth, ir-Reġina Elizabetta II appellat liċ-ċittadini tal-Commonwealth biex ikomplu jaqsmu flimkien il-wirt immens li għandhom. Il-pajjiżi u ċ-ċittadini tal-Commonwealth għandhom ikunu kburin u jivvaloriżżaw il-passat, jagħmlu l-aħjar li jistgħu fil-preżent u flimkien jibnu l-futur. Dan jista’ jsir billi jirrispettaw id-differenzi ta’ bejniethom u jippromwovu l-ftehim biex il-futur ikun aħjar għalina lkoll.
Fiċ-ċerimonja ta’ Westminster, ħadu sehem numru ta’ korijiet u mużiċisti li bejniethom jirriflettu l-kultura għanja tal-Commonwealth modern f’taħlita ta’ ħsejjes u kuluri.
Sadanittant, il-Prim Ministru Malti, l-Onor. Lawrence Gonzi, bħala Chair-in Office tal-Commonwealth, bagħat messaġġ ta’ l-okkażjoni lill-pajjiżi kollha membri ta’ din l-organizazzjoni.Other Press Releases:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959