Left arrow Go Back

SE JIBDEW IX-XOGĦLIJIET FUQ TRIQ IR-RAMLA FIN-NADUR GĦAWDEX

PR0356
Date Icon 09/03/2007

Fil-jiem li ġejjin hu mistenni li jibda x-xogħol fuq l-ewwel parti tat-triq arterjali li minn Nadur tieħu għall-bajja pittoreska tar-Ramla l-Ħamra. Din il-bajja, li tiġi frekwentata minn Għawdxin, Maltin u turisti speċjalment waqt l-istaġun tas-sajf, hija ta’ importanza kbira fil-proġettazjoni ta’ Għawdex bħala prodott turistiku.

Ix-xogħol li se jkun għaddej f’din li hi l-ewwel fażi tal-proġett se jinkludi asfaltar ta’ 1.6km fil-parti mhux residenzjali ta’ Triq ir-Ramla. It-tieni fażi mbagħad tikkonsisti f’xogħlijiet fil-parti residenzjali.

Fejn tippermetti l-wisa’ tat-triq li fuqha ser jibda x-xogħol fil-ġranet li ġejjin ser isiru passaġġi għall-mixi u x-xogħol ser jinkludi wkoll tisbiħ u rranġar ta’ passaġġi u ħitan li jmissu ma’ din it-triq biex ikomplu jikkumplimentaw il-pajsaġġ pittoresk li wieħed jista’ jgawdi minn hawnhekk. Dan il-proġett qiegħed ikun iffinanzjat minn fondi tal-Ministeru għal Għawdex, li f’dawn l-aħħar ġimgħat kompla għaddej bil-programm ta’ titjib ta’ toroq f’żoni residenzjali u arterjali f’Għawdex. Sa fejn hu possibbli l-aċċess għal din il-bajja ser jibqa’ matul il-fażijiet differenti tax-xogħol filwaqt li ser tingħata attenzjoni partikolari biex dawn ix-xogħlijiet ta’ l-ewwel fażi jkunu lesti sal-bidu tas-sajf meta l-użu ta’ din it-triq isir aktar frekwenti minħabba l-popolarita’ ta’ din il-bajja unika.

Il-Ministru għal Għawdex, l-Onor. Giovanna Debono, qalet li din is-sena kienet waħda impenjattiva ħafna għal Għawdex bil-Gvern iniedi diversi proġetti għall-ġid tal-gżira. Fost dawn il-proġetti hemm dawk tal-bini mill-ġdid ta’ għadd ta’ toroq residenzjali f’lokalitajiet madwar Għawdex inkluż dawk f’Għajnsielem, fir-Rabat, fix-Xagħra u f’Kerċem kif ukoll bini ta’ toroq arterjali fosthom f’dawk li jgħaqqdu lir-Rabat ma’ San Lawrenz u l-Imġarr max-Xewkija.

Il-Ministru Debono fakkret ukoll li minbarra għadd ta’ proġetti ta’ bini mill-ġdid ta’ toroq li ġew imnedija mill-Ministeru għal Għawdex bħalissa l-istess Ministeru qiegħed jaħdem fuq diversi proġetti oħra li minnhom se jibbenefikaw l-oqsma ta’ l-edukazzjoni, tas-saħħa, ta’ l-ekonomija, tat-turiżmu u ta’ l-ambjent. Dawn jinkludu l-proġetti ta’ l-espansjoni taċ-Ċentru Għawdxi ta’ l-Arti u l-Artiġjanat Wistin Camilleri u l-bini ta’ Incubation Centre f’Għajnsielem; il-bini mill-ġdid ta’ l-Istitut ta’ l-Istudji Turistiċi fil-Qala u l-bini ta’ l-Impjant tat-Tisfija tad-Drenaġġ fost l-oħrajn. Xogħlijiet oħra jinkludu dawk ta’ modernizzar f’diversi skejjel madwar Għawdex kif wkoll fid-diversi taqsimiet fi ħdan l-Isptar Ġenerali t’Għawdex.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow