Left arrow Mur Lura

IL-MINISTRU NINU ZAMMIT JQASSAM WARRANTS LILL-PERITI

PR0352
Date Icon 09/03/2007

Is-sigriet ta’ l-iżvilupp ekonomiku ta’ pajjiżna hu f’investiment intensiv u għaqli fl-edukazzjoni sabiex pajjiżna jkun ippreparat għall-isfidi tal-ġejjieni. Pajjiżna jista` jimxi ’l quddiem billi jkollu professjonisti mgħallma u mħarrġa f’kull qasam li kapaċi jilqgħu dawn l-isfidi u jsarrfuhom f’ġid nazzjonali ħalli pajjiżna jkollu ekonomija b’saħħitha u sostenibbli. 

Dan qalu l-Ministru Ninu Zammit meta kien qed iqassam warrants lil għoxrin perit li ggradwaw fl-aħħar xhur. Dawn il-periti l-ġodda ser ikomplu jżidu r-reġistru tal-periti f’pajjiżna li b’sodissfazzjon illum jaqbeż il-550 perit. Għalkemm il-linja professjonali tal-periti ssegwi b’mod prinċipali l-arkitettura u l-inġinerija ċivili, illum insibu ħafna mill-periti li apparti li jkunu segwew b’suċċess il-kors universitarju qed jispeċjalizzaw f’diversi oqsma bħar-restawr, bini ta’ toroq, enerġija u oħrajn. Dan qed iwassal biex f’pajjiżna qed ikollna spectra wiesgħa ta’ professjonisti f’kull qasam u għaldaqstant l-industrija tal-bini u l-infrastruttura qed tkun mirquma minn kull aspett. 

Bis-sistemi moderni, bl-andament tal-bini kif ukoll bit-teknoloġija fl-infrastruttura lokali huwa meħtieġ li l-professjonisti jkunu aġġornati maż-żminijiet sabiex dak li jiddisinjaw u jfasslu jkun kompatibbli u jiffitja fl-ambjent in ġenerali. Il-Ministru Ninu Zammit insista li għalkemm għandna nżommu mar-ritmu tal-progress globali, għandna nibqgħu nirrispettaw il-punti bażiċi ta’ l-arkitettura ta’ pajjiżna. Hu ghaqli li kemm it-tagħlim kif ukoll il-gwidi prattiċi jkunu konformi ma’ standards u livelli Ewropej, pero’ fuq in-naħa l-oħra hu kruċjali li dak li jiġi mgħallem fit-teorija jkun assigurat li jista’ jitwettaq fil-prattika. L-istrutturi infrastrutturali kemm fil-kostruzzjoni, f’toroq, eċċ għandhom jiġu assigurati l-prinċipji ta’ public safety, kompatibbilta` ma’ l-ambjent urban u rurali ta’ pajjiżna u mal-prinċipju ta’ energy conservation. 

Il-Ministru spjega lill-periti preżenti li l-għoti tal-warrant iġġorr magħha sfidi u responsabbilita` u għalhekk kull professjonist hu obbligat li dak li jimplimenta fis-soċjeta` jagħmlu bl-akbar responsabbilita` u integrita`. Il-Gvern hu determinat li jibqa’ joffri edukazzjoni b’saħħitha u ta’ l-għola livelli kif ukoll li jagħti l-għodda kollha disponibbli sabiex pajjiżna jkollu professjonisti ta’ l-għola kwalita`. Bħala parti minn dan l-impenn il-Ministeru għar-Riżorsi u l-Infrastruttura qed iħejji qafas legali sabiex aktar professjonijiet ikunu koperti b’warrant li jingħata skond l-ispeċjalizzazzjoni tal-periti u l-inġiniera.  

Fl-aħħarnett il-Ministru awgura lill-periti preżenti għaċ-ċerimonja ta’ l-għoti tal-warrants, sabiex dak li l-pajjiż investa fihom jissarraf f’ġid nazzjonali permezz ta’ kontribut siewi favur it-tisħiħ ta’ l-arkitettura ta’ pajjiżna.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow