STQARRIJA MILL-MINISTERU GĦALL-AFFARIJIET RURALI U L-AMBJENT RIGWARD Allegazzjonijiet infondati minn Birdlife Malta
Il-Ministeru għall-Affarijiet Rurali u l-Ambjent jikkundanna l-impressjoni żbaljata li tipprova tagħti l-istqarrija maħruġa llum mill-Birdlife Malta.
Ta’ min jgħid qabel xejn li d-deċiżjoni tal-Ministru Pullicino kienet ikkomunikata verbalment liċ-Chairman tal-Kumitat Ornis il-bieraħ wara nofsinhar. L-istqarrija ippubblikata mill-Ministeru għall-Affarijiet Rurali u l-Ambjent il-bieraħ filgħaxija bid-dati ta’ l-istaġun tal-kaċċa u nsib fuq gamiem u summien ħarġet waqt il-ħin tal-protesta tal-FKNK u qabel ma kienu seħħew l-inċidenti fuq il-ġurnalisti.
Mhuwiex ġust dak li qed tipprova tagħmel il-Birdlife li tinsinwa li hemm xi konnessjoni bejn l-istqarrija tal-Gvern u l-inċidenti tal-Belt Valletta. Il-Ministeru għall-Affarijiet Rurali u l-Ambjent, bħal kull entita` ċivili oħra f’dan il-pajjiż, jikkundanna kwalunkwe forma ta’ vjolenza fiżika bħalma seħħet il-bieraħ fil-Belt Valletta. Madankollu, il-Ministeru għall-Affarijiet Rurali u l-Ambjent ma jistax ma jikkundannax ukoll forom oħra ta’ inġustizzja, inkluż li wieħed jipprova jgħawweġ il-fatti.
Il-Ministeru għall-Affarijiet Rurali u l-Ambjent jinnota li mkien fl-istqarrija tal-Birdlife Malta ma hemm riferenza għall-fatt li b’deċiżjoni tal-Ministru George Pullicino, l-istaġun tal-kaċċa fuq gamiem u summien fir-rebbiegħa ġie mnaqqas b’għaxart ijiem minn dak li kien irrakkomanda l-Kumitat Ornis. Mhux talli ma issemmiex dan il-fatt, talli l-Birdlife tipprova tagħti l-impressjoni li l-Gvern ċeda għat-talbiet tal-kaċċaturi.
Il-protesta tal-bieraħ filgħaxija fil-Belt Valletta minn kaċċaturi u nassaba hija l-aqwa risposta ta’ kemm hija fiergħa l-allegazzjoni tal-Birdlife li l-Gvern ċeda għall-kaċċaturi. Il-Ministeru jfakkar ukoll kif il-Ministru Pullicino spiċċa fil-mira ta’ diversi attakki u theddid fl-aħħar ġimgħat u dan ikompli jikkonferma kemm ir-realta’ tas-sitwazzjoni hija ferm ‘il bogħod minn dak li ppruvat tpinġi l-Birdlife Malta.
Din l-istqarrija qed tkun ippubblikata sabiex jiġu ċċarati l-fatti. Filwaqt li l-Gvern japprezza r-rwol ta’ għaqdiet bħalma hi l-Birdlife, il-Gvern jifhem ukoll li f’ċerti deċiżjonijiet huwa diffiċli li kull naħa tieħu kull ma titlob. Il-Gvern jappella għas-sens ta’ bilanċ u korrettezza mill-partijiet kollha kkonċernati. La l-vjolenza fiżika u lanqas il-vjolenza verbali mhu se xxejjen l-isforzi kontinwi biex jinżamm il-bilanċ li l-Gvern qed ifittex b’mod responsabbli.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959