Left arrow Mur Lura

GRAZZI GĦALL-PROGETT MILL-AQWA  GĦALL-EDUKAZZJONI TAL-POPLU

PR0329
Date Icon 06/03/2007

“Il-MUSEUM mhux biss hu proġett provvidenzjali għall-formazzjoni reliġjuża u t-tagħlim tar-reliġjon nisranija, iżda hu wieħed mill-aqwa proġetti li qatt rat Malta li firex u saħħaħ l-edukazzjoni u l-litteriżmu tal-poplu Malti u Għawdxi. Il-poplu Malti u Għawdxi ma jista` qatt ikun grat biżżejjed lejn Dun Ġorġ u l-membri kollha nisa u rġiel tal-MUSEUM, tal-bieraħ u tal-lum, li matul mitt sena ta’ ħidma fetħu Oqsma f’kull belt u raħal u ddedikaw ħajjithom u ġidhom biex jgħallmu t-tfal u ż-żgħażagħ tagħna u jagħtuhom edukazzjoni f’kull sens.” Dan stqarru l-Ministru ta’ l-Edukazzjoni, Żgħażagħ u Xogħol Louis Galea f’għeluq iċ-ċentinarju li jaħbat għada 7 ta’ Marzu mit-twaqqif tas-soċjeta` tal-MUSEUM mill-fundatur il-Beatu Dun Ġorġ Preca. 

Il-Ministru Galea qal li biex wieħed japprezza l-viżjoni u l-kariżma tas-soċjeta` tal-MUSEUM wieħed irid jiftakar fiċ-ċirkostanzi soċjali u ekonomiċi tal-poplu tagħna mitt sena ilu. F’dawn iċ-ċirkostanzi ta’ faqar u injoranza Dun Ġorġ u sħabu kienu pijunieri ta’ l-aqwa kwalita` li riedu mhux biss iwettqu l-vokazzjoni tagħhom reliġjuża iżda fehmu li wieħed mill-aqwa strumenti għall-iżvilupp tal-poplu kien il-litteriżmu u l-edukazzjoni. Wieħed irid japprezza wkoll id-dimensjoni ġdida li daħħal Dun Ġorġ fil-Knisja Maltija meta waqqaf waħda mill-ewwel organizazzjonijiet magħmula kollha kemm hi minn lajċi, nisa u rġiel. 

“Minn kmieni nsibu lil tal-Mużew jippubblikaw kotba bil-Malti u jiftħu l-ewwel ċentri ta’ dak li llum insejħulhom il-Kindergartens. Taw kontribut kbir għall-iżvilupp ta’ l-ilsien Malti. Minn kmieni ħasbu biex jibnu l-iskola St Michael’s fil-Ħamrun. Ma kienux jitkellmu fuq l-importanza tat-tagħlim tad-duttrina nisranija jekk mhux fil-kuntest ta’ edukazzjoni sħiħa tal-bniedem. Min jaf kemm membri tal-Mużew li huma wkoll għalliema taw privatijiet b’xejn u għinu fl-istudju tant tfal u żgħażagħ fiċ-ċentri tal-Mużew. Mill-ewwel provdew l-okkażjoni ta’ l-eżerċizzju fiżiku bil-passiġati ta’ nhar ta’ Ħadd wara nofs in-nhar u bil-logħob ta’ kull tip li kien isir fl-Oqsma tagħhom. Mill-ewwel provdew opportunita` għal żvilupp ta’ ħiliet ta’ crafts bl-eluf ta’ presepji u pasturi li kienu jinħadmu għall-okkażjoni tal-Milied.” 

Il-Ministru Louis Galea fakkar ukoll li l-membri tal-Mużew huma fost l-aqwa ħaddiema eżemplari fuq kull post tax-xogħol fejn jaħdmu, inkluż fit-Tarzna. “Wieħed isib dawn il-ħaddiema f’kull kwalita` u qasam ta’ xogħol, ta’ l-id u tal-moħħ, ta’ management u ta’ labourer, gradwati u mhumiex, ta’ self-employed, biedja u sajd. Dawn il-ħaddiema dejjem urew sens kbir ta’ solidarjeta` ma’ sħabhom il-ħaddiema u urew il-ħila u l-impenn ta’ kif kuljum seba` t’ijiem fil-ġimgħa wara ġurnata xogħol kienu jsibu l-ħin u jintefgħu għax-xogħol diffiċli tat-tagħlim l-edukazzjoni tat-tfal, żgħażagħ u poplu in ġenerali.” 

Il-Ministru ta’ l-Edukazzjoni temm mill-messaġġ tiegħu billi f’isem il-Gvern u l-poplu Malti u Għawdxi irringrazzja lill-membri kollha tas-soċjeta` MUSEUM għall-ħidma ta’ fejda bla qies li huma qed iwettqu għat-tagħlim u l-edukazzjoni f’pajjiżna. 

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow