Left arrow Go Back

AKTAR SERVIZZI TAL-GVERN ONLINE GĦALL-BENEFIĊĊJU TAL-FAMILJI MALTIN U GĦAWDXIN

PR0305
Date Icon 01/03/2007

Waqt konferenza ta’ l-aħbarijiet indirizzata mill-Ministru Austin Gatt u l-Ministru Dolores Cristina ġew mnedija żewġ servizzi ġodda ta’ l-eGovernment, l-applikazzjonijiet online għaċ-children’s allowance u għall-allowances supplimentari.  

Persuna tista’ taċċedi għal dawn iż-żewġ servizzi permezz tas-sit elettroniku www.beneficcjisocjali.gov.mt.  

F’diskors li għamel waqt din il-konferenza ta’ l-aħbarijiet il-Ministru Austin Gatt ħabbar li l-Gvern għaddej bil-preparazzjoni tiegħu biex joħroġ enabling tender li jiġbor flimkien mal-45 servizz ġdid li ser jibda jiġi pprovdut fix-xhur li ġejjin.  

Il-Ministru Austin Gatt, Ministru ta’ l-Investiment, Industrija u Teknoloġija ta’ l-Informazzjoni, fakkar li tul dawn is-seba’ snin il-Gvern irnexxielu jasal biex jipprovdi l-maġġoranza l-kbira tas-servizzi tiegħu b’mod elettroniku tant li pajjiżna ġie klassifikat fit-tieni post fl-Unjoni Ewropea, fejn jidħol il-kwantità ta’ servizzi elettroniċi.  

Mhux biss, iżda ftit tas-snin ilu ttieħdet id-deċiżjoni li dawn is-servizzi flok isiru mill-Gvern jibdew jiġu prodotti mill-industrija privata taħt is-superviżjoni tal-MITTS. Il-Gvern jemmen fil-ħiliet ta’ l-industrija lokali u jrid ikompli jsaħħaħ u jipprepara l-industrija lokali ta’ l-IT għall-miġja ta’ SmartCity Malta.  

Il-Ministru Austin Gatt kompla li l-mira tal-Gvern hija li nkunu l-aħjar u d-deċiżjoni biex nagħmlu dan l-enabling tender ġiet wara li nħasset il-ħtieġa li jiżdied il-pass li biha nipproduċu servizzi elettroniċi tal-Gvern u noħolqu sistema iktar effettiva biex nkomplu ntejbu l-kwalità tal-ħajja tal-Maltin u l-Għawdxin. 

Minn naħa tagħha l-Ministru għall-Familja u Solidarjetà Soċjali, l-Onor. Dolores Cristina, spjegat li dan is-servizz huwa mmirat li jagħmel il-ħajja tal-klijenti li jagħmlu użu minn dawn is-servizzi aktar faċli. Fil-fatt hemm ’il fuq minn 60,000 persuna li tista’ tagħmel użu minn dawn is-servizzi (32,000-il klijent li jieħu ċ-children’s allowance u 30,000-il klijent li jieħu s-supplementary allowance). Il-Ministru Cristina spjegat li l-fatt li dawn is-servizzi issa qegħdin online għandha twassal biex minbarra li l-klijent jikseb is-servizz b’aktar kumdità, ser ikun hemm aktar effiċjenza fl-għoti ta’ dawn is-servizzi. Hija spjegat li dan is-servizz huwa xhieda ta’ kif dan il-Gvern b’mod sħiħ u b’inizjattivi inter-ministerjali jwassal biex jipprovdi servizz li jtejbu il-kwalità tal-ħajja ta’ dak li jkun.  

Fil-fatt qabel it-tnedija ta’ dan is-servizz b’mod elettroniku kull benefiċjarju kien ikun irid japplika għal dawn is-servizzi kull sena, biex kull sena jivverifika li hu eliġibbli. Minn issa ser jispiċċa l-bżonn li individwu jiġri għall-P3, għall-formoli u għaċ-ċertifikat tal-bank. Kollox ser jibda jsir f’applikazzjoni elettronika waħda u d-Dipartiment jivverifika hu l-informazzjoni li għandu bżonn. Għal dan is-servizz elettroniku hemm bżonn li persuna jkollha l-identità elettronika, dik li tissejjaħ e-id.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow