BINI TA’ SALA ĠDIDA FL-ISKOLA PRIMARJA TA’ ĦAL SAFI
Miexi b’rittmu mgħaġġel ix-xogħol fuq il-bini ta’ sala ġdida u librerija fl-iSkola Primarja ta’ Ħal-Safi li issa jinsab fl-aħħar fażijiet ta’ kostruzzjoni. “Dan huwa proġett ieħor f’katina ta’ xogħlijiet li qed twettaq il-Fondazzjoni għall-Iskejjel ta’ Għada madwar Malta. Fl-istess ħin fix-xhur li ġejjin ser ikunu inawgurati żewġ swali ġodda fl-iskejjel primarji ta’ l-Imqabba u s-Siġġiewi rispettivament. Dan minbarra l-bini ta’ skola sekondarja ġdida f’Ħal Qormi u l-bini mill-ġdid ta’ l-iskola tal-Verdala f’Bormla.” Dan qalu l-Ministru ta’ l-Edukazzjoni, Żgħażagħ u Xogħol Louis Galea meta żar l-iskola primarja ta’ Ħal Safi.
Il-sala u l-librerija biswit l-iskola ta’ Ħal Safi huma mibnija fuq medda ta’ art ta’ 500 metru kwadru. Is-sala l-ġdida ta’ Ħal Safi ser tkun tesa’ tliet mitt persuna u se tkun mgħammra bl-apparat kollu li għandha bżonn sala moderna biex tintuża għad-drama, għall-mużika, laqgħat u attivitajiet oħrajn li torganizza l-iskola, inkluż attivitajiet sportivi meta t-temp ma jippermettix li jsiru barra. Maġenb is-sala nbnew ukoll faċilitajiet ta’ backstage u changingrooms kif ukoll foyer u librerija. Il-bini huwa servut b’faċilitajiet sanitarji moderni fil-backstage u fil-foyer kif ukoll għal dawk bi bżonnijiet speċjali. L-art madwar is-sala mistennija tissebbaħ b’landscaping u entratura separata mill-iskola li tkun speċifika għas-sala. Dan biex is-sala tkun tista’ tintuża wkoll mill-komunità ta’ Ħal Safi.
Meta titlesta s-sala, l-iskola tkun tista’ tagħmel użu minn kmamar li bħalissa jintużaw bħala sala, biex dawn ikunu jistgħu iservu bħala guidance room, resource room, klinika żgħira u għall-attivitajiet kreattivi.
Fl-iskola primarja ta’ Ħal Safi saru wkoll xogħlijiet oħrajn li jinkludu l-bdil ta’ l-aperturi esterni kollha kif ukoll titjib tal-faċilitajiet sportivi għat-tfal. Ix-xogħlijiet kollha li qed isiru f’din l-iskola se jfissru investiment ta’ kważi Lm200,000 (€ 465,874).
Il-Ministru Louis Galea qal li l-Gvern hu kommess li f’kull skola, f’kull lokalità l-ambjent jitjieb b’mod sostanzjali u li nipprovdu riżorsi u faċilitajiet mill-aqwa biex uliedna ikunu jistgħu jilħqu l-milja tagħhom u b’hekk jirnexxu ilkoll. Louis Galea qal li f’skola moderna, skola ta’ għada, irid ikun hemm kmamar speċjalizzati, faċilitajiet sportivi, riżorsi fil-klassijiet, u ambjent ġenerali li jħeġġeġ it-tagħlim. Hu tenna li l-iskola ta’ Ħal Safi toffri ambjent sabieħ u miftuħ u li jilqa’. Bi ftit aktar minn 160 tifel u tifla, l-iskola ta’ Ħal Safi qed tagħti lit-tfal ħafna attenzjoni individwali u qed torganizza diversi attivitajiet kemm bħala skola kif ukoll bħala parti min-network ta’ skejjel li jiffurmaw il-kulleġġ San Benedittu.
Il-Ministru qal li l-ġenituri ta’ din l-iskola primarja qed ikunu involuti f’taħdidiet u taħriġ fuq livell ta’ kulleġġ u dan qed iwassal biex il-ġenituri jieħdu sehem aktar attiv u jkollhom idea aktar ċara tal-mixja edukattiva ta’ uliedhom. Hu faħħar lill-kap ta’ l-iskola, l-amministrazzjoni u l-għalliema għall-ħidma tagħhom għax jidher ċar li f’din il-lokalità l-ġenituri huma kuntenti bil-mod kif qed titmexxa l-iskola u mill-livell ta’ edukazzjoni li qed jirċievu uliedhom. Fost affarijiet oħra l-Ministru semma l-inizjattiva li ħadet l-iskola favur il-qari u anke l-inizjattiva ta’ Eko-Skola biex l-istudenti isiru jafu aktar dwar l-ambjent u kif nistgħu nirrispettawh.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959