FTUĦ MILL-ĠDID TAL-KNISJA DDEDIKATA LILL-QALB IMQADDSA TA’ ĠESU FIR-RESIDENZA SAN VINĊENZ DE PAUL
Il-President ta’ Malta u s-Sinjura Fenech Adami flimkien ma’ l-Onor. Louis Deguara u l-Onor. Helen D`Amato attendew għall-Quddiesa Konċelebrata mill-E.T. Mgr. Paul Cremona, Arċisqof ta’ Malta f’l-okkażjoni tal-Ftuħ mill-ġdid tal-Knisja ddedikata lill-Qalb Imqaddsa ta’ Ġesu.
Wara ngħata kunċert mużikali minn Banda mlaqqa’ apposta minn fost ħaddiema tar-Residenza San Vinċenz De Paul u l-ħbieb tagħhom, taħt id-Direzzjoni tas-Surmast Charles Pace u l-Kor Cantate Domino, mill-Parroċċa taż-Żurrieq, bil-parteċipazzjoni tat-Tenuri Joseph Aquilina u Vincent Farrugia, s-Soprana Catherine Frances Farrugia u l-kantanta Yorika Attard. Is-serata ġiet immexxijja minn Josephine Zammit.
Preżenti għal din l-attivita’ kien hemm ukoll s-Sinjura Kate Gonzi, u l-ex Segretarji Parlamentari għall-Anzjani Prof. Rizzo Naudi u l-Onor. Antoine Mifsud Bonnici.
Il-Knisja tal-Qalb Imqaddsa ta’ Gesu sarilha restawr estensiv kemm fuq barra kif ukoll fuq ġewwa. Dan ir-restawr jagħmel parti minn proġett ikbar li ġie inawgurat f’Settembru 2006. Dan il-proġett kien jikkonsisti fil-Blokk il-ġdid Mother Teresa, li nbena minflok is-swali tan-nisa 1, 2, 3, 4. u l-Blokk Padre Piju li ġie nawgurat tliet snin ilu. Flimkien miegħu sar ukoll pavimentar ġdid fil-pjazza li tgħaqqad il-Blokk Patri Piju mal-blokk Mother Teresa. Dan il-proġett sar b’investiment ta’ madwar Lm 4 miljun (€9,317,493). Ir-restawr fuq din il-Knisja ġie jiswa madwar Lm220,000 (€512,462). Din il-knisja hija aċċesibbli minn ġewwa s-swali u tista’ tilqa fiha sa 600 ruħ permezz ta’ żewġ pontijiet imsaqqfa. Permezz tat-teknoloġija moderna li ġiet instalata fis-swali l-ġodda r-residenti jistgħu jsegwu l-quddies mis-swali tagħhom stess.
Fl-ippjannar tal-kumplessi Patri Piju u Mother Theresa ngħatat attenzjoni partikulari biex l-anzjani barra li jħossuhom f’ambjent komdu jkunu wkoll f’ambjent li jixbaħ ferm dak tal-komunità minn fejn ikunu ġew. Fil-kuntest ta’ dan l-ambjent, il-kappella li tiddomina il-pjazza bejn dawn iż-żewġ kumplessi għandha tifsira speċjali. Barra s-sinifikat reliġjuż li ħafna anzjani jikkunsidraw bħala parti integrali mill-mod kif jgħixu, din il-knisja dominanti fuq il-bini tal-madwar tfakkrek f’raħal tipikament Malti mibni madwar il-Knisja.
F’din il-Knisja wieħed isib kwadru tal-Madonna tal-Bambin, xogħol il-pittur magħruf Solimena.
Il-bini ta’ kappella f’ San Vinċenz kien parti mill-pjanijiet għall-bini ta’ dar għall-fqar. Il-proposta tal-bini ta’ din id-dar u l-kappella kienet saret fl-1861 flimkien mal-proposta li jinbena t-Teatru Rjal. Iżda waqt li t-tejatru nbena b’nefqa ta’ 75,000 sterlina, id-dar għall-fqar baqgħet ma nbnietx. Kellhom jgħaddu iktar minn għoxrin sena biex fl-1885, wara ħafna tgergir mill-Maltin, ittieħdet id-deċiżjoni li dan il-proġett jinbeda.
Waqt li d-dar għall-fqar tlestiet fl-1893, jidher li l-bini tal-kappella ma bediex qabel 1900. Barra minn hekk, il-kostruzzjoni tagħha damet għaddejja għal kważi għaxar snin sħaħ.
Il-kappella kienet tbierket fis-seba’ ta’ Lulju, 1910 mill-Arċisqof ta’ Malta, Pietro Pace.
Stqarrijiet Oħra:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959