Left arrow Go Back

KUNĊERT MINN JOSÉ CARRERAS

PR0264
Date Icon 23/02/2007

José Carreras twieled f’Barċellona fl-1946. Minn żgħir wera interess fil-mużika wara li ta’ sitt snin ra lil Mario Lanza fil-film “The Great Caruso”. Ta’ tmien snin ta l-ewwel dehra pubblika tiegħu fuq ir-radju nazzjonali Spanjol. Kien ukoll f’dak iż-żmien li beda jistudja l-pjanu. Ta’ 17-il sena beda jieħu lezzjonijiet tal-vuċi taħt Jaime Francisco Puig fil-Conservatorio Superior de Musica del Liceo  f’Barċellona. 

Carreras għamel id-debutt tiegħu ta’ 18-il sena bħala Fulvio fl-opra Norma ta’ Giuseppe Verdi. Fl-1971 rebaħ l-Internatiomal Verdi Lyrical Song Contest f’Parma. Hu ddebutta f’Londra fl-1971. Fl-1976 kien mistieden minn Herbert von Karajan biex jidher fil-festivals tas-Sajf u x-Xitwa f’Salzburg. Hu irrekordja taħt id-direzzjoni ta’ Herbert von Karajan, inkluż ir-Requiem ta’ Giuseppe Verdi. Irrekordja wkoll “The West Side Story” ma’ Leonard Bernstein. 

Fis-snin 70 u 80 Carreras kanta bħala t-tenur ewlieni f’24-il opera differenti. Bejn l-1964 u l-1987 kellu ’l fuq minn 60 rwol u kanta aktar min 1,000 parti f’opri, kunċerti, recordings u festival recitals. 

Fl-1987 Carreras instab li kellu l-leukemia u ftit ingħata ċans li jgħix. Għal sena sħiħa ngħata l-kura kollha meħtieġa u għamel autologus bone marrow transplant f’Seattle.  

Carreras reġa’ beda jkanta u ngħata merħba kbira minn 150,000 waqt wirja għall-apert f’Barċellona. Fl-1990 flimkien ma’ Placido Domingo u Luciano Pavarotti kanta fil-ftuħ tat-Tazza tad-Dinja. It-tliet tenuri flimkien għamlu diversi wirjiet oħra.

 Fl-1988 José Carreras waqaaf il-‘José Carreras International Leukaemia Foundation’ biex jiġbor fondi bħala appoġġ għal stħarriġ dwar il-marda tal-leukemia. 

Il-Ministru għat-Turiżmu u Kultura Francis Zammit Dimech, li nieda l-kunċert li José Carreras ser jagħmel f’Malta fit-8 ta’ Ġunju, qal li kien ta’ unur għal pajjiżna li jilqa’ fostna tenur ta’ fama internazzjonali li wera bil-fatti li fejn hemm ir-rieda kapaċi tirbaħ kwalunkwe battalja. Hu qal li Carreras kien meqjus li ftit kellu żmien quddiemu meta ġie attakkat mill-marda tal-leukemia, iżda kien kapaċi jirreżisti, jagħmel il-kura u ħareġ f’saħħtu daqs qabel. 

Il-Ministru Zammit Dimech żied igħid li kien ta’ sodisfazzjon kbir għalih li, bħalma sar għall-kunċert ta’ Andrea Bocelli f’Malta, José Carreras se jkun akkompanjat mill-Orkestra Nazzjonali tagħna. L-Orkestra Nazzjonali, li taqa’ taħt il-Ministeru għat-Turiżmu u Kultura. għamlet fis-snin li għaddew passi ta’ ġgant ’il quddiem. Hu ta’ sodisfazzjon li ser tipparteċipa wkoll il-kantanta Maltija Lydia Caruana li diġa’ tat prova tal-kapaċita’ tagħha meta kantat flimkien ma’ Andrea Bocelli. 

Il-Ministru Zammit Dimech qal li pajjiżna sar destinazzjoni turistika orjentata lejn  avvenimenti ta’ kalibru. Hu qal li minbarra d-diversi attivitajiet fuq skala internazzjonali u attivitajiet tal-massa li kienu qed jiġu organizzati mill-Ministeru tiegħu u aġenziji li jagħmlu parti minn dan il-Ministeru, is-settur privat kien qed iġib f’pajjiżna kantanti importanti fix-xena internazzjonali bħal Marco Masini, Andrea Bocelli, Amadeo Minghi, Sting, Roger Waters u l-Alan Parson Project. 

Il-Ministru għat-Turiżmu u Kultura awgura lill-poplu Malti li jieħu l-opportunita’ li jisma’ tenur ta’ fama hekk kbira filwaqt li tenna ċ-ċertezza tiegħu li kunċerti bħal dawn kienu jiġbdu lejn pajjiżna turisti li huma attirati minn attivitajiet ta’ livell kulturali għoli.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow