Left arrow Go Back

Lm170,000 għall-bini  ta’ 12-il triq residenzjali ġdida f’Ħ’Attard

PR0203
Date Icon 15/02/2007

Ix-xogħol fuq is-70 triq residenzjali li ngħataw l-offerti għalihom fl-aħħar ġimgħa ta’ Diċembru issa qabad ritmu tajjeb tant li l-parti l-kbira minn dawn mistennija tkun lesta sa xahrejn u nofs oħra. 

Waqt żjara f’Ħ’Attard, fejn bħalissa qed jinbnew mat-12-il triq residenzjali, il-Ministru Mugliett qal li s-sistema li l-Gvern qed juża biex jagħti xogħlijiet f’toroq bħal dawn diġà qed tħalli l-effett mixtieq.   

“L-għanijiet tas-sistema tal-period contracts kienu li x-xogħol f’toroq residenzjali isir b’inqas telf ta’ ħin, filwaqt li tinżamm il-kwalità. Minn dak li rajna fl-aħħar sitt ġimgħat jidher li l-kuntratturi qed jaħdmu b’aktar tempestività tant li x-xogħol diġa’ beda fil-parti l-kbira tat-22 lot ta’ toroq li ttellgħu bil-polza fi tmiem Diċembru,” qal il-Ministru Mugliett. 

Hu qal li bħalissa f’Ħ’Attard għaddej ix-xogħol fuq xejn inqas minn 12-il triq residenzjali, bi tnejn minn dawn jingħataw it-tarmak propju ftit tal-jiem ilu. Il-valur ta’ dawn ix-xogħlijiet jiżboq il-Lm170,000. 

It-toroq li qed jinbnew mill-Gvern huma Triq Lorenzo Manche, Triq iż-Żbiba, Triq is-Sardinella, Triq il-Fikus, Triq il-Bettija, parti minn Triq iż-Żraġen, Triq il-Mixtla, Triq iż-Żahar, Triq il-Larinġ, Triq it-Taħħan, parti minn Triq Emvin Cremona u Triq Peter Paul Rubens. 

Il-Ministru Mugliett qal li dan il-volum imdaqqas ta’ xogħol ser itejjeb mhux biss l-ambjent ta’ triq individwali, iżda ta’ żoni sħaħ f’dan ir-raħal, u dan għandu jġib titjib fil-kwalità tal-ħajja għal dawk kollha li jgħixu f’Ħ’Attard. 

“Dan ifisser ukoll li l-Gvern għad irid jibni biss 7 toroq li jinsabu fil-Programm. Dawn ser ikunu qed jintefgħu f’lott ġdid meta fi ftit ġimgħat oħra jitlesta x-xogħol fuq il-lottijiet li għaddejjin bħalissa. Imbagħad ĦH’Attard jingħaqad mal-lista ta’ lokalitajiet li mhux ha jkollhom aktar toroq residenzjali ġodda x’jinbnew,” kompla jgħid il-Ministru Mugliett. 

Hu żied jgħid iżda, li għalkemm il-ħeffa fir-ritmu tax-xogħol illum qed tingħata prijorità għolja, l-Awtorità Dwar it-Trasport qed tiffoka wkoll fuq l-aspett tal-kwalità tax-xogħlijiet. Fil-fatt il-kuntratturi li daħlu għal dawn il-period contracts għandhom l-obbligu li jibgħatu l-foremen tagħhom għal-kors ta’ taħriġ fil-kostruzzjoni tat-toroq. Dan il-kors, li qed isir għat-tieni sena konsekuttiva, issa wasal f’nofsu u l-madwar 15-il parteċipant mistennija jlestu mill-istudji tagħhom fl-aħħar ta’ Marzu.  

Filwaqt li rringrazzja lill-kunsilliera lokali ta’ Ħ’Attard għall-għajnuna tagħhom waqt li kien qed jitħejja l-Programm ta’ Bini ta’ Toroq 2006-2008, il-Ministru saħaq fuq l-importanza li l-Kunsilli Lokali kollha jibżgħu għal dawn it-toroq ġodda. 

“Dawn it-toroq qed jitlestew minn kollox, u tkun tassew ħasra jekk xi ħadd irresponsabbli jitħalla jagħmlilhom il-ħsara. L-għożża għal dawn it-toroq trid tmur oltre’ l-indafa,” qal il-Ministru. 

Hu temm jgħid li l-Gvern qed juri bil-fatti li l-isfida li daħal għaliha meta ppubblika l-programm ta’ toroq residenzjali ser jirbaħa. 

“Minn Awissu ‘hawn missejna mal-150 triq, jiġifieri terz tal-programm ta’ 450 triq. Aħna fiduċjużi li biż-żamma ta’ dan ir-ritmu ta’ xogħol, dan il-programm ikun jista’ jitwettaq sa tmiem is-sena 2008,” temm jgħid il-Ministru Mugliett.

DOI  - 15.02.2007

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

More Press Releases Right arrow