Left arrow Mur Lura

Tnedija tar-Rapport Annwali tal-Kummissjoni Nazzjonali Persuni b’DiŻabilità’

PR0186
Date Icon 13/02/2007

Kull sena, il-Kummissjoni Nazzjonali Persuni b’Diżabilità tagħti rendikont tal-ħidma f’żewġ okkazjonijiet:  

  • waħda tirrigwarda l-ħidma tagħha dwar il-Liġi Opportunitajiet Indaqs -  din saret f’Diċembru li għadda ;
  • it-tieni tirrigwarda l-ħidma l-oħra kollha tal-Kummissjoni u din qed issir permezz tal-prezentazzjoni tal-lum, 13 ta’ Frar, tar-Rapport Annwali.

Fl-indirizz tagħha, l-Onor. Dolores Cristina, Ministru għall-Familja u Solidarjetà Soċjali, faħħret ix-xogħol siewi li qed tagħmel din il-Kummissjoni u qalet li dan ir-rapport dettaljat juri fil-fatt l-impenn tal-Gvern f’dan il-qasam.  

" Il-persuni b’diżabilità huma fuq nett ta’ l-aġenda tagħna. Dan narawh ukoll permezz ta’ l-iżviluppi li qed isiru f’dan il-qasam," kompliet il-Ministru. "Naraw kif dan il-Gvern dejjem saħaq fuq l-importanza li persuni b’diżabilità jingħataw rwol ċentrali fis-soċjetajiet tagħna, u dan permezz ta’ strutturi u miżuri li jinħolqu biex dan il-għan isir realtà għalihom u għall-familji tagħhom. Lejn dan qed nimmiraw, la darba ċ-ċentri għal matul il-jum għall-persuni b’diżabilità jimxu taħt l-Aġenzija Sapport."  

Il-Ministru fakkret ukoll fis-sena għall-opportunitajiet indaqs għal kulħadd u qalet li f’dan ir-rigward żgur li l-qasam tad-diżabilità f’Malta kif ukoll il-Kummissjoni nfisha kienet u għadha minn ta’ l-ewwel li ħadmu biex jitqajjem aktar tagħrif f’dan il-qasam. "Flimkien ma’ rappreżentanti tan-National Implementing Body, kif ukoll mas-Sur Camilleri u ma’ Dr Janet Mifsud, Chairperson ta’ l-NCPE, ghadni kif ipparteċipajt fl-ewwel Summit dwar l-Ugwaljanza. Żgur li din hija t-triq li rridu naqbdu lkoll kemm aħna, kemm lokalment kif ukoll fuq livell Ewropej u internazzjonali. Jiena ċerta li l-Kummissjoni ser tkompli taqdi dmirha għall-persuni b’diżabilità f’Malta imma wkoll għas-socjetà Maltija kollha kemm hi," temmet il-Ministru Cristina. 

Minn naħa tiegħu, is-Sur Joe Camilleri, Chairman tal-Kummissjoni Nazzjonali Persuni b’Diżabilità, beda billi fakkar li din is-sena l-KNPD tiċċelebra l-għoxrin sena mit-twaqqif tagħha. Huwa kompla billi wera’ l-apprezzament tal-membri tal-Kummissjoni għax-xogħol siewi li jsir mill-ħaddiema tal-KNPD. Huwa wkoll emfasizza s-sodisfazzjon tiegħu għall-kunsens nazzjonali li jeżisti fejn jidħlu oqsma tad-diżabilità f’kull livell. "Ir-rapport annwali ta’ ħidma tal-Kummissjoni," qal is-Sur Camilleri,  juri biċ-ċar il-progress li qed isir f’dan il-qasam. Dan jixħdu kemm iż-żieda fid-domanda għas-servizzi li tmexxi jew tamministra l-Kummissjoni, kif ukoll il-ħidma tagħha fil-qasam ta’ l-opportunitajiet indaqs għal kulħadd permezz tal-Liġi Opportunitajiet Indaqs (Persuni b’Diżabilità)."  

Is-Sur Camilleri awgura li bis-‘support’ sħiħ tas-soċjetà kollha Maltija, il-Kummissjoni tkompli dejjem tiżviluppa s-servizz li qegħda toffri lill-persuni b’diżabilità u l-familji tagħhom. 

Matul l-2006, il-Kummissjoni rnexxiela għal darb’oħra ġġib fondi mill-UE biex tiffinanzja kampanji ta’ għarfien (awareness-raising campaigns) kemm għas-sena 2006 kif ukoll għas-sena li qegħdin fiha, l-2007, li barra li hi s-Sena Ewropea għall-Opportunitajiet Indaqs għal Kulħadd, taħbat ukoll l-20 anniversarju mit-twaqqif tal-Kummissjoni.  

Permezz ta’ dawn il-fondi, il-Kummissjoni setgħet tkun aktar effettiva f’dan il-qasam ta’ għarfien u wkoll  tamministra l-fondi tagħha b’mod li jrendu aktar. F’dan is-sens il-Kummissjoni organizzat diversi attivitajiet ta’ għarfien: konferenzi, riklami, u pubblikazzjonijiet, fost l-oħrajn. Pubblikazzjoni mportanti ħafna kienet il-ħames edizzjoni tal-ktieb “Servizzi u Benefiċċji għall-Persuni b’Diżabilità.” 

Fl-2006 il-Kummissjoni rnexxiela tirreġistra żidiet sostanzjali fin-numru ta’ persuni li qdiet meta pprovditilhom is-servizzi li hi tmexxi fosthom:

  • Il-Karta ta’ l-Identità Speċjali - żieda ta’ 5%;
  • Is-Servizz Għajnuniet Speċjali -  31%;
  • Korsijiet dwar l-Oqsma fid-Diżabilità - żieda ta’ 30%;
  • Ivvettjar ta’ applikazzjonijiet tal-MEPA - żieda ta’ 40%;
  • Iċ-Ċentru tar-Rizorsi - żieda ta’ 76%;

Matul din is-sena, il-Kummissjoni ħadmet ħafna biex is-Servizz tal-Blue Sticker ikun wieħed sostennibbli. Għalkemm in-numru ta’ applikazzjonijiet għal dan is-servizz baqa’ fl-istess livell tas-sena l-oħra, in-numru ta’ Blue Stickers li nħargu matul din is-sena naqas b’madwar 24%. 

Fil-qasam internazzjonali, il-Kummissjoni kienet attiva fid-diskussjoni li saru dwar il-Konvenzjoni li l-Ġnus Maqgħuda qed tipproponi dwar id-Drittijiet tal-Persuni b’Diżabilità u b’sodisfazzjon tinnota li din issa ġiet adottata mill-Assemblea Ġenerali f’Diċembru li għadda. 

Ir-rapport tal-KNPD jinkludi wkoll statistika dwar il-persuni b’diżabilità reġistrati mal-Kummissjoni, maqsuma skond l-età, is-sess, il-lokalità u n-nuqqas tagħhom (nuqqas fiżiku, intelletwali, psikoloġiku, ta’ dawl u ta’ smigħ). 

Kopja ta’ dan ir-rapport bil-Malti, bl-Ingliż, b’tipa kbira u fuq ‘audio’ jistgħu jinkisbu mill-uffiċini tal-Kummissjoni, Ċentru Ħidma Soċjali, Santa Venera. Verżjoni bil-Malti u aktar tard bl-Ingliż, tinstab ukoll fuq il-website tal-Kummissjoni: www.knpd.org

DOI – 13.02.2007

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE OFFICE OF THE SPEAKER  The Speaker of the House of Representatives Meets Ambassadors of Guatemala, Lebanon and Vietnam

PR261959en

PRESS RELEASE BY THE OFFICE OF THE SPEAKER The Speaker of the House of Rep...

STQARRIJA MILL-UFFIĊĊJU TAL-ISPEAKER  L-Ispeaker tal-Kamra tad-Deputati jiltaqa’ mal-Ambaxxaturi tal-Guatemala, il-Libanu u l-Vjetnam

PR261959

STQARRIJA MILL-UFFIĊĊJU TAL-ISPEAKER L-Ispeaker tal-Kamra tad-Deputati jil...

Aktar Stqarrijiet Right arrow